“ يا قلبك الخوّاف” أغنية للفنّان محمد عبده تأسرك كلماتها وتوحي بأن خلفها قصّة عظيمة، هي للشاعر الكبير (البدر) وبعد البحث وجدت لها قصّة جميلة جداً تقول على لسان صديق الشاعر: سنة 1985م كنت أيامها أدرس في أمريكا ولي سنتان ما طلعت من أمريكا وقرّرت وقتها أروح أشوف الأهل في جينيف، ما كنت أتصوّر ولا أتخيّل أني باشوفها هناك؛ لأن كل أخبارها بعد زواجها انقطعت عنّي وأنا انشغلت بدراستي، يومها رحت إلى جينيف وأنا مشتاق أشوف الأهل هناك، لكن من ثالث يوم وصلت إلا وتلمح عيوني خيالها الذي ما غاب عنّي طول أيام غربتي، وقفت في مكاني وتمنيت أن الزمن يشاركني الوقوف، حاولت أن أبتسم وأقرب منها وأسلّم عليها؛ لكني خفت، لقيتها تبتسم لي، تشجّعت أن أقرب منها،ولكني تذكرت أنها صارت مثل السراب لي وأنا العطشان..!!. وقتها ما عرفت أيش أسوّي؛ أكلمها بس أخاف أن زوجها موجود معها، لقيت أختها تجيها ويمشون وتلتفت لي بنظرة فيها وله وشوق، بعدها بيومين وأنا راجع إلى الفندق لقيت رسالة من مكتب الاستقبال وكانت منها تقول: انتظرني الساعة 2 صباحاً راح أكلمك..!!. وقتها فرحت وبنفس الوقت خفت أكثر؛ ما أدري أيش أقول ولا أيش صار لها ولا أيش تريد تقول، ومرت عليّ الساعات كأنها سنين وأنا انتظر اتصالها، وأول ما سمعت صوتها قلت لها: وحشتيني. ردّت عليّ وقالت: تدري أنك ما غبت عنّي لحظة واحدة..؟!. تكلّمنا كثيراً وبكينا وضحكنا، وقالت لي إنها شبه منفصلة عن زوجها، وإنها تعبت كثيراً معه؛ حيث إنها لا تشعر له بأي مشاعر، وغصباً عنها تصبر وترضى بقدرها كيف وهي صارت أماً الآن..؟!. أهم شيء وقتها طلبت مني أنها تشوفني، حاولت أن أعتذر وأبرّر لها أن هذا الشيء ما ينفع خلاص، ولا راح يفيدنا بالعكس راح يتعبنا أكثر. لقيتها تقول: «عطني من أيامك نهار وباقي العمر للي تبي». خلاص قلت لها أشوفك بعد بكره. ويوم قفّلت السماعة منها وأنا أتذكّر أول مرة سمعت صوتها وأتذكّر أحلى أيام عمري وأول شبابي، و أذكر أيام انكساري معها وحرماني منها، وأذكر رحلتي إلى أمريكا وذهابي إلى أبعد مكان عنها عشان أنسى اللي صار وأتحسب على اللي أبعدني عنها وعن الظروف اللي حرمتنا من بعض. ويوم قرب الموعد لقيت قلبي «الخواف» يقلّب عليّ المواجع ويقول لي البعد أحسن لك من أنك تعيش فرحة مزيفة وتأخذ مكان غيرك وترجع منكسر ثاني، وقتها وقفت بي خطاي عنها وما رحت. وفي الليل كلمتني تعاتبني؛ قلت لها ما قدرت خفت وكرهت أشوفك وأجلس معك وأنتِ خلاص صرتي لأحد غيري بعدها بكم يوم شفت بدر بن عبدالمحسن وكان تربطني به صداقة على أنه أكبر مني، قلت له وقتها القصّة كلها والأحداث وش قلت، وش قالت لي، لقيته يقول لي يا قلبك «الخواف». بعدها بيومين تعشّيت مع البدر ورحنا نحضر حفلة محمد عبده وغنّى يومها لأول مرة أغنيته الشهيرة «المعازيم» كنت أسمع محمد عبده يقول: «محبوبتي معزومة من ضمن المعازيم» كنت أتلفّت في الحفلة يمكن تكون موجودة..!!. وبعد الحفل لقيت البدر يتكلّم عن الأغنية أنها رائعة، ووافقته الرأي، فقال لي أنت يا «الخواف» كتبت قصيدة عنك..!!. لقيت البدر يعطيني ورقة من أوراق البوريفاج مكتوباً في أولها: «لا تسرق الوقت من غيري أنا ما بي زمن غيري». لقيت نفسي وعمري وأحلى أيامي في قصيدة، وتمر سنة وتجي سنة 1986م وتصير أغنية بصوت محمد عبده وكان الناس وقتها في حفلة الكرنفال يردّدون معه «يا قلبك الخواف» حسّيت كلهم يعاتبوني. يقول البدر: لا تسرق الوقت من غيري…! أنا ما أبي زمن غيري…! لا تسرق العمر يا طيري…!! مدام قلبك لاحد غيري…!! عطني من أيامك نهار … وباقي العمر للي تبي..! ما به فرح يا معذبي … وأنت لاحد غيري…!! ناظر وعدنا طاف … في اللي درا ومن شاف…!! يا قلبك الخواف ………. يا قلبك الخواف…!! يا صاحب الخوف … ما يطمن الخوف…!! لا تلمس الجوف لا لا …! لا تلمس الجوف …! وأنت إيدينك بارده …! والفرقا دايم وارده…! إنت وانا بنفس الطريق بس الخُطا متباعده…! لا تسرق الوقت …. يا أجمل الوقت…! تكذب عليّ واكذب عليك …. وألقى الدفا برعشة أيديك…! نقضي العمر .. كل العمر …! نحلم بلحظة شاردة…!!
