على الحزم عَولّ في أمورك ولا تخافي وقِس ما بقى باللّي مضى بَيِّن وخافي ترى الدهر بحرٍ والعمر به سفينِه والأحداث شروا الرّيح خِبٍّ ورِفرافي فركِّب قياسك واجعل البِلْد زاهب وعدّل وطالع دَيرتِك قبل خِتلافي وحافظ على عرضك وطولك بعدها بالأميال والسَّاعات واحذَر تجي غافي ووثِّق حبالِك واجعل القلب حاضر معْ ما يعوزك من شراع ومجدافي ولا تهمل الأسباب إن حان وقتها تندَّمت واستعراك بالخوف رجّافي ترى الرَّجل يبلغ باجتهاده مراده وإن عاقته الأقدار فالعذر له وآفي على الحِر صَرْف الفكْر فيما ينوبَه وإن حار شاوَر فيه من يعلَمِه صافي خليلك خليلك لو بدت منه زلِّه تفطَّن بموجبها وعاتب ولا تجافي ******** على الدار دارت بي تباريح الامثالي ولا يلام لي مثلي ولي حالته حالي سهيرٍ أجر النوح لي عسعس الدجى عويجٍ ولا حدٍّ من الناس يرثالي صبورٍ ولكني اذا طال صبري شكيت الندم واصفقت بالكف خالي ومن كثر حزني حارب النوم ناظري كما حزن يعقوبٍ على يوسف الغالي تقضّى زماني بالأماني وعاقني رسول يودّي لي ولو بعض الاسوالي ويخبِّرِه أني صويبٍ ومبتلي سجيمٍ وعيني تسكب الدمع همَّالي سباني وشقّاني وداده وشط بي سلبني وخلاني شرى البَوْ لي خالي غريمٍ وليعٍ في المحبه ومشتجي نهيبٍ سليبٍ في الحشا نار تصلاي تسلَّط غرامه في حشايه وسيطرت جيوشه على قلبي كما #الجيش الايطالي فرسني وخلاني طريحٍ على الثرى جريحٍ بسيفٍ ماضي الحد سلاّلي رجيته تشفعته ولا فادني الرجا حتى رجع لي أوقال هذا م الامحالي عزومٍ ولا ظنّي عن العزم ينثني عنودٍ ولا تتيبه معاذيل واسوالي كريمٍ اذا يعطي عطوفٍ إذا سخا ظريفٍ نجيبٍ زاكي الجد والخالي