استمتعي بالفطار مع العيش بالموز النهارده وصفتنا مميّزة وسهلة وبسيطة، هتقدري تعملي عيش في البيت وكمان بالموز، ممكن تقدّميه مع الشاي أو النسكافيه أو وجبة فطار لأطفالك.. المهم إنه من عمايل إيديكي. عيش الموز والشيكولاتة المقادير: 3 ثمرة موز ملعقة صغيرة بيكينج صودا ملعقة صغيرة بيكينج بودر 1⁄4 ملعقة صغيرة فانيليا 1⁄4 كوب شيكولاتة خام 1⁄2 كوب مكعب زبدة ملعقة صغيرة ملح ملعقة كبيرة لبن 2 كوب دقيق كوب كاجو كوب سكر 2 بيضة الطريقة: 1- اهرسي الموز وسيبيه على جنب، واخلطي الدقيق مع الملح والبيكينج بودر والبيكينج صودا مع بعض وسيبيهم على جنب. 2- ضيفي على الزبدة السكر وابدئي اهرسيهم مع بعض لحد ما تدّيكي شكل الكريمة، بعد كده ضيفي عليها خليط الموز وقلّبيهم مع بعض كويس، وبعد كده ضيفي البيض واخلطيهم مع بعض، وبعد كده ضيفي الفانيليا واللبن والكاجو والشيكولاتة وخليط الدقيق، واستمرّي في التقليب لحد ما الخليط كله يبقى متجانس. 3- افردي الخليط في الصينية، وبعد كده حطّيها في الفرن لمدة تتراوح من 1 : 2 ساعة، وطلّعيها من الفرن.. وبالهنا والشفا. إضغط لمشاهدة الفيديو: خلصت وصفتنا النهارده.. استنونا كل يوم مع وصفات جديدة.. سلام،،،