اه يا بلد الشاعر علي الدشناوي مصر الحلم أتسرق.... وغصن الزيتون ...في عيون الصبايا.....اختفي بعد ما أترسم واه يا بلد سرقوا الحلم مني وأنتي حلمي.....سرقوا الأمان اللي فيه عشتي...قتلوا الحب في القلوب....لما عرفوا انك هتصحي واه يا بلد كبيرك تاه في سكه الضلمه.....ماشي في طريق بلا رجعه............بيدور علي كرسي وسط الزحمة.....وديابه تخطف مننا اللقمة واه يا بلد اختلف فيكي الزمان.....بقينا زي الخرفان.....حياتنا زريبة وعليها سجان.....وحرامي في لقمتنا طمعان واه يا بلد الظلم في شوارع لياليكي.....والغدر من كل اللي حواليكي.....خلاص ما عدش حد خايف عليكي....كفاية الحزن أترسم ف عينيكي واه يا بلد يا اللي حملتينا ف بطنك....عشنا واتربينا علي أرضك.....بيدنا هنقتلك وحافرين قبرك....ولادك سلاحك قالوا بكره ذبحك واه يا بلد فرقتنا المناصب والكراسي...وسلطه قتلت فيه إحساسي...بعت علشانها أهلي وناسي.....وشعب حوليه بيعاني ويقاسي واه يا بلد مين هيخاف عليكي غير غلبان فقير أتظلم فيكي وقلب طيب نفسه يرضيكي وعامل يشقي ويتعب ولا راضيكي وبنت تحب وتعشق ولد وعيون جفاها النوم دبلها السهر خلاص الكحل في العيون صبح رماد وأساور الدهب في يد الصبايا بقت أصفاد حتى اللعبة في يد الولاد بقدرة قادر أتحولت لبارود ورصاص وقلوب مليانه أحزان وأهات وشهيد راح علشان البلد واه يا بلد محتاجة للمعجزات قولولي ولا الوقت فات البنت تاهت والولد مات والعمر راح والحلم اتسرق وااااااااااااااااااااااااااااااه يابلد