أخي وصديقي الحبيب إحتراماتي يا صديقي أما بعد ؛ فقد آلمني كثيراً نبأ رفض منحك الفيزا حتي يمكن أن تأخذ العلاج ليَمُدَّ منْ عُمرينا ؛ فأنت تدرك أن بقاءك يهمنا كثيراً معشر الأبالسة . فرجل مثلك قد خبرناهُ وخَبَرَنا لثلثِ قرن أحنُّ إلينا فَ ( مؤتمري تعرفه أحسن من باسندوة مشتركي ماتعرفوش ) ! العزيز الغالي في رسائلي الأخيرة لك حين وجهتك إلى أن تدفع فلوس لتعمل مقابلات ؛ فقد قلتَ لي أن كل المحطات قد طفشتْ من كلامك المعصود اللي لا له راس ولا ارجل ؛ مرة تقل أنا تمام وبنفس المقابلة تفل لا سافر إمريكا للعلاج ! أمانة انك تنح ! مو تحسب كل الرؤساء جعانن سعَّكْ .. يفدوبك عليَّ ! الرئيس .. اللي كان رئيس فضحتني عند الأمريكان يخزيك الشيطان. طيب يوما فضحتني عند دول الخليج وعند الملك قلنا معليش بيننا بين ! لكن عند إبْ حسين بكلُّهْ وعند عقَّال السوق الأوروبية ! شمَّتَّبي شمَّتْبَك الشيطان.* قدنا أقل لك من أولِهْ سيِّبْ هاولا الجن *شعبك هذا حنابه يوما يقرح القات ويركزوا عليك معدفيش شي يخارجك .. يا رجَّال بالله عليك في شعب جاوع.. ....... يجلس مراعي لك سنة. قلتُ لك من الأول إجلس لك بالسعودية وشل أواليدك معك وُبَنِّنْهُمْ سوا من جديد !.. جالس تسمع كلام أحمد ..... وقال قائد الحرس الجمهوري اللي وجَّشوا أبتهم في أبين ونهم وأرحب وِجَّاشْ ما بعده إلا وِجَّاشْ إبليس يوم القيامة !.. وإلا آذاك .... الثاني محاميحو ( الدُّنْ ....) .. لا يسكي يهدر ولا يعمل شي عدا إنُّهْ يحتفل من السنة للسنة بعيد ميلاده ! يا مَنْ كنتَ حبيبي قلتُ من الأول مالك من عبده الجَنَدِي .. شِوَدِّف بك .. رئيس عظيم وقلبه كبير .. يوما كَبَّ بك بالتَّنَكَةْ !.. قلتُ لك سلِّميها واسلمي وفُك رجولك وإندي لهم فلوسهم .. والله ما يُفَلِّتُنكْ إلا بالسجن .. ما سمعتنيش وجالس تتسمع الجعانن حقك .. الصوفي فك أرجُلُهْ ببيروت .. واليماني يأكل جيرو بالسعودية .. والشامي عند القطريين يشحت بدل ما كان يسبُّهم من بيستين رجع قيمته بيستين ! طيب يا ..... ذلحين مو إشتعملْ ؟ قدك حانب حنبةْ العصا بيد أعمى ! جالس بين هاولا المجانين المبندقين ثلاثة وثلاثين سنة .. وكل ساع تقل .. هذا شعب مجنون ! صح رئيس مجنون سعَّكْ ما يشتي له إلا شعب مجنون سعهمْ .. ما ذلحين خارج نفسك لا عد هربه ولا جلسه ولا رقده إلا بالمقليص وچون الماشي والإبر ! طيب وِلَحِين يا عِرْدْ ! أقطع يدي لا هم شفلتونَّكْ ! لا تركب المجنون ولا تخلي المجنون يركبك ودجاهكْ ثلاثين مليون مجنون ! لا وثوار مُسْبَسين زعيتري ! واحد حوثي .. وواحد إصلاحي .. وواحد سلفي والقاعدة .. وانصار الشريعة من شق .. والمشترك من شِق ناهي لك ناهي .. وقاسم سلام زعلان من شِقْ والقبائل من شِقْ ..وبا سندوة بسكتته يفكدك من شِقْ .. والشباب من شِق وكل مجموعة من الشباب المغتربين مراعين لك بباب المطار مع المحاميين .. لا وتوكل من شقْ .. أمانة شِبَرِّعُونَّك بالزَّرْجْ والزَّرْب ! إذانَا أقلْ لك .. معاناش صاحبك *لا أعرفك ولا دخل بك فضحتني وفضحت تاريخ كله وخليتني سع الجدار الزَّغير كل من جزع تِمَخَطً بُهْ .. الله يشمِّتْ بك لا قالوا أهل عدن .. ها نسيت ما ذكرتوش الحراك مع الجماعة فوق .. منو شخارجك حتى أنا معسْكيشْ أعمل لك شي ! إجزع جزعتْ نفسك من أشقاقك ! ويشتي يدخل إمريكا بالماستر كارد أو الأمريكان إكسبرس بعد ما رفضوا الڤيزا ! يحسب الدنيا كروت إبْ ..... قَدكْ سع زوجة واحد مجنون قال الزوج : إطلعي الدرج طلعتْ. قال : أوقفي عندك. لا طلعتِ درجة طالق بالثلاث ولا نزلتِ درجة طالق بالثلاث ! لا عاد طاقه إشتنفع ولا زنقه إشتنفع ولا بيب مجاري شنفع !.. آذيك عصيدك وأنتْ متِّنِهْ يا طبحْ ! ضاعتْ الحِسبة عليك .. شوفه خينة تكن عند أحمد أو يحي أو طارق أو عمار أو آمنة ! الناصح الأمين لك طوال فترة حكمك إبليس الذي بلَّسْ بصحبتك ! رسالة من إبليس للرئيس سُلِّمتْ بوساطة زعيم حزب البسباس عبدالكريم عبدالله عبدالوهاب نعمان بمناسبة راس السنة في 31 ديسمبر 2001
