الكلام ده كله في مصر ومالوش علاقة باليمن علشان المعلم عوضين ميرفعش علينا قضية ويكسبها تاني .. متصدرا ديوانه ( الغرزة ) يجلس كبير المعلمين (عوضين ) و هو يمسك بخرطوم الشيشة و يسحب منها نفسا طويييلا يجعل المياه في باطنها تفور بصخب ، يرفع رأسه بزاوية 45 درجة حتى يبدو وكأنه ذئب يعوي في ليلة ثلجية مقمرة و يطلق سحابة من الدخان كتلك التي تعقب الطائرة النقاثة يرسله في الهواء ببطء و استمرارية ويكرر العملية عدة مرات والصمت المطبق يخيم على المكان الذي امتلأ بالمعلمين الصغار و صبيان المعلمين من تجار الشنطة والقلم والكامرا ، يلتقم كل واحد منهم شيشته ويبحر في مجرات الدماغ العالي .. فجأة يقطع المعلم حبل السكون و يتساءل بصوت مرتفع فيه حشرجة مشبوبة بسعال خفيف . - إيه رأيكم يا معلمين ؟ الخطة الإعلامية للمرحلة القادمة حيكون شكلها عامل إزاي الوقت متأخر وعاوزين نخلص أوام أوام ... يرفع الصبي دؤرم يده - بعد إزنك يا كبير يرد المعلم . - يا فتاح يا عليم يعني ينفع كده يا معلمين ، دؤرم هو اللي يفتتح الجلسة المتكيفة ديت .عموما إزنك معاك ياخوية كنت عاوز تئول إيه إشجيني . يجيب دؤرم - أنا شايف يامعلم إن أهم حاجة الأن نركز على الريس . - نركز عليه إزاي ؟ يعني نخليه مركوز والا أيه يا دؤرم . يقهقه الجميع . ويحمر وجه الصبي و ينكمش على نفسه . ينبري رائف حساس أنا فهمت اللي بيئصده دؤرم يامعلم هو أصده نركز الهجوم على الريس : مانشيت كذا عريض يقول الرئيس يعجز عن إقالة قحطان مانشيت ثاني مزاجية جلسات الرئيس الليلية ، مانشيت عن مهزلة انتزاع التفويض للرئيس .. نكتر في المهازل والمخازي والبلاوي والمحااااشي . - المعلم عوضين مندهشا ، يعني دؤرم كان دا أصده ؟ معليش يا حبيبي أنا اتسرعت ، عموما الفكرة جميلة وحنعممها علينا كلنا . إحنا ولله الحمد صار عندنا بسم االله ما شاء سيطرة على الصحف وعندنا عدد كويس منها وصارت الأوسع إنتشارا وعندنا أنوات فضائية شغالة زي الفل . . يرد أبو سريع - وعلى زكر الأنوات .أنا رأيي كمان نخلي المعلمة فتكات هانم تشد حيلها معانا و تستغل المؤابلات اللي بتعملها في التلفزيون على آناة ( الغرزة اليوم ) في الهجوم على الريس !! عاجز ، ضعيف ، فاشل ، ساذج وحاجات زي كده . يعقب المعلم عوضين - لا متخفش ، هي عارفه شغلها كويس و أحلى حاجة عاجباني في البنت دية إنها بتأدم شكل جديد .. المزيع هو اللي يتكلم والضيف ما عليه إلا يتصور ويئولوا كم كلمتين صُغَيرين . فكرة محصلتش . بتريح الزبون .. يزيح المعلم وهدان الدخان عن وجهه ، - متنسوش يا جماعة النئطة التانية إللي هي تمجيد الزعيم . تمجيد الزعييييم ، أوعوا تنسوا الحاجة دية ، لازم الكل يشيد فيه كل واحد بطريئته . مآلات تعليآت برامج حوارات صور أخبار متواصلة . يردف حنفي - صدآني يا بيه السنة دي مش حتخلص إلا والزعيم ع الكرسي .. من كثر ما احنا بنتكلم عنه وعن عظمته وحكمته وأوته ورحمته خلينا الناس عاوزاه يرجع تاني . يتستنكر الواد محمدين . مع احترامي ليكم كلكم ما تخلوش المسألة كلها في نؤطتين بس ، هجوم على الريس و تلميع للزعيم ، لأن السنة كدة مش حتخلص والزعيم ع الكرسي دي حتخلص وهو على الكرسي الكهربائي . لازم شوية أكشن ورعب . حضرموت سقطت ، ابين وقعت ، شبوة راحت خلو الناس متوترة 24 ساعة لازم يحسوا بالفرق بين الاتنين . يدخل سمسم على الخط - إحنا كدا يا معلمي بئينا متفئين على 3 حاجات - الأولى الهجوم على الريس ، التانية تلميع الزعيم – التالتة نشر حالة من الإحباط الشديد حول وضع المحافظات الجنوبية وتصوير كل حدس في أي محافظة وكأنها قد انسلخت من كيان البلد . يقاطعه المعلم - لا حلوة منك .. عجبتني حكاية ( قد انسلخت من كيان ) ! لا والله وبئيت بتفهم ياد وتؤول كلام كبير ، دنت بتؤول درر ! أمال بيؤولوا عليك عبيط واهبل ليه .؟ هنا تملكت الغيرة الصبي سمعة فيتدخل ليكمل هو صارخا - الجنرال العجوز ! يصرخ فيه المعلم . - في إيه مالك ؟ أرصك تعبان ؟ ماله الجنرال العجوز ؟ يرد سمعه - لازم الناس تحس إنه هو اللي ملخبط الدنيا وهو اللي بيمنع الريس من عمل حاجات حلوة للبلد وإن مجلس الأمن حاطه في دماغه وناوي عليه نية سودا . وكلما كان في خبر عن تهديد من مجلس الأمن للزعيم إحنا نحول التهديد على الجنرال العجوز المعلم عوضين فاغرا فاهه - إيه دا يا جماعة في إيه إنتو بتزاكروا من ورايا والا أيه ، يبني انت بتشرب صنف غير اللي احنا بنشربهوالا إيه ؟ الكلام اللي بتئوله دا مش بتاعك دا بتاع حسنين هيكل .. يواصل والله فكرة ودي نؤطة رابعة .. والا بلاش ( رابعة ) خليها نؤطة جديدة . خلونا نضيف للجنرال كل الناس اللي نزلت الزعيم من الكرسي ، لازم نركز عليها هي الأخرى وبالزات عيال الأصفر .لازم البلد كلها تحس إنهم أخطر من أي حد في الدنيا . عندكو نآط تانية . يرد المعلم هريدي . - أيوه يا حج عوضين .. الغرزة دي لازم تتوسع إحنا لازم نجر إعلاميين تانيين هنا ناس كدا جديدة لنج وخاصة من الناس اللي كانت بتعمل ضدنا . المعلم عوضين - دي فكرة كويسة خلوها عليا . المعلم سِيدهم أنا رأيي كمان نصور المعارضين لينا في البلد على إنهم إخوان عشان الفلوس تكتر والدعم يزيد ، ورانا عيال عاوزين نصرف عليهم بالحلال . المعلم عوضين - الكلام حيكتر والفجر أررب يأدن أنا رأيي نختمها بكلام المعلم سبع الليل . عندك حاجة عاوز تؤلها يسبع . وتبأ هي النؤطة السابعة - شوفوا يا معلمين . ربنا رزأنا فضائيات وصحف ومواقع الكترورية يجيب المعلم - أصدك إلكترونية يا سبع - مش حتفرأ ... عموما أنا مبفهمش في الفيك بوس ولا طويطر ولا غيره وخلاصة الكلام إحنا مدام عندنا كل ده نخلينا حنينين على الغلابة من أنصار الشريعة وأنصار ربنا نرميلهم حتة كدة والا كدة مرة بيان مرة خبر مرة تغطية فعالية مرة تصوير مباشر لتفجير وكله بسوابه . فجأة طلع الصباح وأذن الديك حي على الفلاح فسكت الجميع عن الكلام غير المباح
