يقال في المثل حقنا : ( وين كنتي يا نخلة لما كان البلح فوقش..؟) والبلح معناته : (الرطب) وهذا المثل شعبي ومعروف عندنا في لحج وفي عدنولحجوعدن امثالهم وحدة ، وهم خوات من زمان وبينهم عيش وملح وصهورية واهولية وقرابات على ما تقولوا : ( دهل خرب في خوه ) كله واحد واللحوج عدانية و العدانية لحوج ، والعدني او اللحجي يفرح لما تقول له : (انت عدني من لحج) او ( لحجي من عدن ) وان كان بعض من الناس با يحسب هذا الكلام فيه : ( قليل من البلاطة واللكاعة )- لا عيب .. حتى اللحوج في يداتهم ((مشالية)) كما صحاب عدن من ايام زمن السلطان وعده بريطانيا ، وهذا تاريخ يطول فيه الكلام ، وماشي وقته الان. المهم خلونا ذلحين في كلامنا وموضوعنا .. (( وين كنتي يا نخلة لما كان البلح فوقش؟؟)) واقصد الكلام .. كانت عدن .. عدن ، وكانت الدنيا فيها دنيه وتغنى بها الشعراء والمطربين : ( يا طايرة طيري على بندر عدن **زاد الهوى زاد النوى زاد الشجن )) ..و (( جنة عدن يا جنة)) .. و ((عدن .. عدن ياريت عدن مسير يوم ** شاسير انا ليله ماشرقد النوم)) والمغاني كثيرة وجميلة التي قيلت في عدن واهل عدن الطيبين الحبايب ومنها اغاني للشاعرين اللحجيين : احمد فضل القمندان ((اذا رأيت على شمسان من عدن ** تاج من المزن يسقي الارض في تبن )) .. ومسرور مبروك بكلماته عن (( الطويلة والزعفران وحافة حسين )) والمساجلات بينه وبين الشاعر لطفي جعفر امان فهذه الصورة الحسينة والمليحة اللي كانت عليها عدن ، ايام زمان ،خلاص راحت (هشتي بشتي) ، واصبحت عدن اليوم في حال يُرثى لها ولا يسر الخاطر كل شيء فيها مدمر ومنهار ، وهيه كانت (ام الدنيا) وعروسة الجزيرة والخليج ، ومنها كانت حاجتهم وبضاعتهم وتجارتهم وملابسهم وثيابهم وحتى مأكلهم ومشربهم والنظافة والمجاري في وضع اسوا ، وحدث ولا حرج عن خدمات الكهرباء والماي ، والتعليم والصحة والعافية يا مسّلم يا سلام ، تدخل المستشفى تسير برجولك يخرجوك ميت محمول فوق مجنز ساني الى المقبرة واعمال الصعلكة والبلطجة زادت وتصوروا يا جماعة الخير ، ، وصل الامر الى ان هناك من يبول بالشوارع وبالمكشوف عيني عينك وتحت الجدران ومحد يدقر يطّلع نخس ، او حتى يقل له : عيب وراك يا وليد تبول في التريق قدام خلق الله ؟ وزاد الفسق والمعوالة والزندقة والرشوة والمحيالة ، وين هذا كله كان مخبأ لش يا عدن؟ الله يصيب ((الوحدة)) اللي دخلّت الجنوب .. ((في حجر الحمار)) ودمرت في عدن كل شيء جميل ..! والله يا جماعة الخير ما عندي لكم يمين طلعت قبل يومين فوق بابور باهب لا التواهي ثنتين نسوان من حقوت زمان تعرفوا شوه قالوا .. ؟ قالوا باللهجة العدنية القح : (عدن .. فين الاوله اه.. اه.. الله يجازي من كان السبب .. باعنا بيعة سارق)) صحيح والله هذا الكلام .. هذي ماشي عدن .. هذي ( بت جدةعدن ) عدن تبا جهد يشترك فيه الجميع ، وما يفهم رطني الا ولد بطني..!
