الثانية عشرة ظهرا من ايام حظر التجوال كارفيوا خرجت من بيت جدي الي بيتنا بنفس الحافة والدورية لمحتنا ورجعوا ريوس من حافة جدي الاصنج ، يحاول ابي يكلمهم لكن عفلج عفلج مافي فائدة فقال لهم باروح مع ابني قالوا نو بروبلم ،ابي بالقسم شاف جمعدار يتعنطز سقله ومعاريف ابي مليان غمزوا له العسكر ، قليل وجابوا لنا خبز وروتي ومطبقة فاصوليا وشلونا للبيت بسيارة ،، برع برع ياستعمار ان ال اف ،، فلوسي بمسيرة كنا بحافة الهاشمي طوقونا الانجليز وضربوا مسيلة الدموع وكورنا جري لاحد الدرج هبشة ،، جابوا لنا اهل البيت البصل والماء وخففوا هنا لهيب البسباس وكلنا نعرق من بطوننا وظهورنا اما انا كنت زايد عليهم خائف ما دراكم السروال امتلى عرق وستر الله ليل والا بيقولوا بلت فوق السروال وشخيت ،، لما راحوا خرجنا واحد واحد سكته وجري على بيوتنا وساني للحمام اتغسل واريح البال. وبالعام الثاني بالليل مع الساعة تسع روحت من عند صديق شفت واحد يمشي من طرف مسجد العيدروس لنص الطريق قلت بنفسي صافي ادريس سيفلين ، وصلت الي عنده قال لي هانز اب رفعت ايدي وفتشنا وقال جو ، من الفجعة جلست اشرب شراب بركن الحافة كي اهدأ قليل ، شفته اجى لما طرف الدكان لما خرجت قال انت قلت انا قال ارفع ايدك بالعربي المرة ذي وهو يفتش قلت له : يو انسبكتيد مي بيفور ، رد : ديد اي؟ قلت : يس ، قال جو اي ام سوري . مع الساعة ست والدنيا حامي الوطيس في بداية سبعة وستين روحت من ميدان الكرة بالشيخ وشفت دوريتين واجية من جنب دكان جدي المحلوي قاسم الحاج ورحت اكلم صاحبي كان بباب بيته ولما شاف الانجليز قال باي ،، رجعت من ركن المقابل لمسجد العبادي والانجليز منتشرين والضابط تقول تولقة طول وعرض انا من جهة وهو من الاخرى ما شفتوش ولا شافني ،ماشي هوب اجيت لصدرة ورجولي ترجفان رجف قال سوري سوري لكن بعد ايش !! واستقلينا وبعد كم شهر قدنا بكامب الصولبان مع بعض الزملاء في الاتحاد الطلابي بسبب اضراب بعد حركة مارش عشرين دخلي الظابط لساحة المدرسة وهُب الي الكامب ،، قلت بسم الله بدأنا . جلست اتذكر ايش صار وفجاءه اشوف نفسي ببئر احمد عند بعض اهلي وحبة حبة قده معي الي امنته ولحمته كمان لعاد يفتك وعند المغرب اخرج بمسدس اضرب رصاص قريب الغدرة المهم وصيحت للمصور يصورني وانا اصلي وانا اهتز نسيت ان الالي مؤمن وملحم وحبة حبة قدنا مسؤل الوقود ومعي شاص اوزع للرجال وبعضه ابادل به منشان راشن لهم وازيد قليل للتجار ديزل بفلوس اضرب بها الجيب ، شوية شوية الراشن اصبح قليل والفلوس زادت بالجيب ، وبعدها اجت الريالات اكيد والدراهم وانا اول القوم واسمي بالليست الاول وقمت بتوزيع الاغاثات للناس كما كنا ايام الوقود ساني للسيلة وقدكم عارفين الباقي وطلعت الرياض واتصورت مع المسئولين وحبة حبة قدنا مدير ومعي دفتر شيكات ومن زي حراسة وكرشي تقول دبة فول، وياوليد امر واتهي شللك هذه الخمسمائة روح خزن لك والا الالف ، والا والمدام تصيح رفقي رفقي قم صلي الظهر !! رفقي !! عادنا قبل قليل كنت ابو الحريب !! وهذه باختصار قصة نضالي ايام الاستعمار وكيف تحولت ايام الاحتلال شفتم كيف !!