((أدكم الخي يفهمك الجمل )) .. هذا مثل شعبي عريق ومعروف عندنا في لحج - وفي غير لحج - يتداوله الناس كثير في حياتهم اليومية.. ونحنا في هذه البلاد.. كم ياما تداكمنا.. وتعاركنا.. وتلاطمنا.. وتقاتلنا فيما بينا البين.. وكم مأسي وكوارث وزوابع حلت بنا .. وجزعت على ريوسنا.. وشيبنا من بعدها.. بس مكانا ماشي فهمنا.. ولا تعلمنا.. وباين علينا لا بنتعلم.. ولابنفهم طول حياتنا... ولا اعتبرنا ولاتعبرنا.. مهما (( قشرونا مكانا نرجع حب )).. ودليل على كلامنا هذا .. اننا مكانا نلوك تاريخ مأسينا لوك كما نلوك (اللبان ) في حلوقنا.. ومنها كارثة (( ثلاثتعشر يناير ))- الي صادفتنا ذكراها امس الاول الجمعة- فهنوك من يحاول اليوم ان يستحضر هذي المأسي من جديد.. بكل فصولها وشخوصها وأطرافها.. وان يصطاد في الماي العكر.. بثمن مدفوع عبر بوابة المناطقية والقروية والعصبوية المقيتة والمرفوضة.. للايقاع ثاني مرة بين ابناء الجنوب الواحد الموحد شر وقيعة.. نقول لمثل هاذولا الشياطين والابالسة المأجورين خلاص كفاية.. لما هنا وبس .. عيب عليكم دوختوا ..بنا خلوا عندكم قليل حياء وقليل ناموس ..بطلوا لعب بمشاعر الناس.. خلاص نحنا كبرنا وقد نسينا (( ثلاثتعشر يناير)) ستة وثمانين وأهواله.. وأهوال أهواله.. وانتوا مكانكم تستحضروا الماضي السئ القبيح في حياتنا.. ياناس خافوا الله شي عاد معاكم عقل والا خلاص قدكم مجانين بلاديرة.. عليكم ان تعرفوا.. ان اللي خرج من بطن أمه في ذوك (( اليوم المشووم النحس ))..قده عمره اليوم.. (واحد وثلاثين سنة) - معناته قده اصبح شاب - وكمل القراية في الجامعة.. ويمكن قده مزًوج ومعاه جهال وعيال.. ويسوق (( بابور دباب )) لأن البلاد ماشي فيهاعمل غير (( سواقة البوابير )) الاجرة.. تكون انته تعلمت وقريت وقتلت نفسك قراية ليل ونهار.. والعمل بتلاقيه عند جدتي (سعدية ) في المجنة.. خلاص ياناس عيب عليكم .. لا تقلبوا المواجع ..(ثلاثتعشر يناير )مأساة وانتهت.. وأصبحت في ذمة التاريخ.. نحنا قد تصالحنا.. وتسامحنا.. وتعاهدنا.. أن نكون خوان وحبايب ويد وحده.. البدو وصحاب الضالع وردفان ويافع وكل ابناء الجنوب.. من لحج لاحضرموت.. لا المهرة.. لا عدن .. لا شبوة.. لا ابين.. ماشي عاد في بوكنا حاجة أسمها.. (طغمة ) ولا (زمرة ).. خلاص (الطغمة والزمرة ) سدوا من قبل (عشر سنين ).. وقدهم اليوم خوان.. وبينهم عيش وملح.. ويوكل من (دست واحد ).. وبشربوا ماي من ( بير وحده ).. ويخزنوا قات سوى.. ودخلت بينهم زواجه وصهورية.. فلا ( طغمة ولا زمرة ) بعد اليوم ..ونحنا في الالفية الثالثة.. والناس طلعوا المريخ.. وعادكم أسألوا الرئيس هادي .. والرئيس علي ناصر محمد (ابو جمال ).. والرئيس علي سالم البيض.. وسالم صالح محمد.. والجهبذ حسن احمد باعوم ..والقايد الرابطي العريق عبدالرحمن بن علي الجفري احد دعاة التصالح والتسامح.. وخوه في النضال وفي قادة الرابطة محسن بن فريد.. وهيثم قاسم طاهر.. ومحمد علي احمد.. واحمد مساعد حسين ..وحيدر العطاس.. وقايمة المناضلين والقيادات التاريخية الجنوبية طويلة.. خلاص ياناس كفاية.. خلونا ذلحين في الحاضر .. أسألوا نفوسكم ياجنوبيين - ولومرة وحده في حياتكم - نحنا في الجنوب لا وين رايحين ...؟ ولاوين ذاهب مصيرنا ..؟.. البلاد مكانيه في حرب حامي الوطيس من قرابة (سنتين ).. وتبان عادها بتطول.. ونحنا ولا استفدنا من أي متغير يخدم (القضية الجنوبية ) ..جالسين ندًور (خبابير ) لاراس لها ولا رجول ..تضرنا اكثر مما تنفعنا ..وهذا هوه سبب ضياع قضية شعب الجنوب .. بالله عليكم ماسدينا على فعالية (التصالح والتسامح ) وين بتقع ..؟ ومنوه بخطب في المهرجان والطيلسان ..؟ وصور منوه باتطلع ..؟ وشوه من بنادير بانرفع ..؟ وهات من الخلافات والمفاحسات والمناكفات بين المكونات الجنوبية - وما أكثرها ماشاء الله عددها كما الرز - هذا وعاد الجنوب ماشي افتك من ( وحدة ..العصيد والسحاوق ) وعادنا ماشفنا من الجمل الا ذيله .. وقدنا - للاسف -نتصارع .. ونتقارع .. ونتعاصد .. وكل واحد يشوف نفسه هوه على حق والثانيين على باطل .. طيب وبعدين .. وطيب ولما وين ..؟ ضيعنا بلاد بحالها .. ودولة بكلها كانت قايمة في الجنوب .. في لحظة عاطفية وطنية ( داخل النفق ) .. واليوم أصبحنا نبكي على الجنوب .. تبوا مني خبر أمانة وديانة ..ونصيحة لوجه الله .. على قيادات الجنوب اللي في الخارج .. أن تعود الى الداخل وأن تطوي ( صفحة الماضي ) - دون رجعة - وتعلن قيادة جنوبية واحدة موحدة .. تمثل كل الجنوب .. من الضالع الى المهرة .. ويعترف بها العالم الحي في هذا الكون الواسع الفسيح .. قبل ان تخطف الجنوب وجوه وقوى أخرى .. شوفوها جالسة قفا الباب .. عودوا ياقيادات أحسن لكم .. قبل فوات الاوان .. (ثلاثتعشر يناير ) قد أنتهى وأصبح في طي النسيان .. وأثار حرب ( أربعة وتسعين ) لن يكون مكان لها في الجنوب بعد اليوم .. والحليم تكفيه الاشارة..والمثل حقنا يقول .. ( أدكم الخي يفهمك الجمل )..!
