في مثل هذي الأيام من حوالي سنه من سنين الدنيا .. ومع دخول (الحما) – ولا كان أبوه وأهلات أهلاته حما- كتبت في هذي الزاويه (كلام باللحجي) .. موضوع بعنوان (الكرهبه ضرطت ..؟ لافسيت..!) .. تناولت فيه (أزمة الكرهبه) ومعاناة المواطنين من هذي الأزمه .. حيث وصلت (الأنقطاعات)- حينها – إلى أكثر من (ستعشر ساعه ) في اليوم الواحد.. وهذي كانت قمة الازمه .. وقمة المأساه .. وقمة المسخره.. واللعب بحياة المواطن.. وقد لقي هذا الموضوع إستحسان كبير بين أوساط القراء وعامة الناس .. اللي ذاقوا الجحيم والمعاناة .. من (حما ) هاذيك السنه اللي (يضرط الحمير) .. وصاموا رمضان – ايمانا واحتسابا- وهم في حالة لايعلم بها الا الله الواحد القهار.. وكانوا يفطروا ويتسحروا في (الأدر) – على ماتقولوا.. بلا (سراج) .. اليوم ومع بداية دخول (الحما) اللي على قولت المثل .. (عادنا ماشفنا من الجمل الا ذيله).. وعاده الا بدا يتخاوص من عند الباب.. على ماتقولوا .. عاده ماشي دخل سوى.. ولابدا (يتراوس) .. بدت تتكرر نفس المأساه ونفس (مكعالة الكرهبه) .. وبدت لعبه (طفي لصي) من جديد – يعني يامعنى.. (حليمة رجعت لعادتها القديمه).. ووصلت (الأنقطاعات ) إلى أكثر من (أربع مرات ) في اليوم الواحد.. وكل مره بساعتين وزايد قليل حلايه – يعني جينا عليها .. (الكرهبه بالت .. لا خريت).. والله انه صحيح الكرهبه عندنا .. (بواله خرايه) .. تبالها (حفاظات) من النوع الأصلي الولايتي.. وعادكم أسألوا (الرئيس هادي) و(بن دغر).. وزيدوا أسألوا ..(المبعوث الأممي الجديد غريفيث) .. اللي بيجي لاعدن قريب – هنوك خبابير انه ماشي عاد بيجي - وشوفوه شوه بيقول على الكرهبه حقت عدن .. ونحنا نباها تطفى(عشرين مره ) في اليوم.. وهوه عندنا.. منشان يشوف كيف الناس هنا معذبين من (مشكلة الكرهبه)وهم في(عز الحما) .. بعدين يحكم بنفسه .. ونباه يعرف أن الكرهبه والماي والمشاهره والقوت.. في هذي البلاد وفي هذي الظروف أهم من السياسه ومن الحرب ومن السلام .. بعدين لكل حادث حديث.. (الكرهبه بالت .. لا خريت).. سمعت الناس شوه يقولوا يا (مبعوث أممي).. ؟ طيب يا(حكومة) .. بالله عليكم تضحكوا على منوه..؟ عاد الله بيراجعكم.. حد يرضى لشعبه بالتعب وحياة النكد..كيف يقع هذا الكلام.. وكيف تسكت يا(رئيس هادي) .. على هذي الجعثه والجعجعه والمعواله والملعابه في (الكرهبه) .. طيب خلاص شوفوا الشيطان قده في نخرنا.. من الطفاي واللصاي.. (الكرهبه بالت .. لاخريت).. كلما هبت سنه وجت سنه.. ونحنا ياخلق الله مكانا في (معراصة الكرهبه).. لهبه من فوق ولهبه من تحت.. وياساتر سترك لما متى هذا الركيض.. (الكرهبه بالت .. لاخريت).. طيب شوه هذي المصيبه اللي حلت بنا.. وبأهلات أهلاتنا.. وامهات أمهاتنا ... وحريم حريمنا وعز ماعندنا .. أٍسألكم بالله (خواني القراء ).. سامحوني على هذي الالفاظ حقت السوق – بس شوه نسوي – الحكومه حقتنا تبا من هذا الكلام المسواقه..ومن هذا (العرعار) .. لأنه بيني وبينكم كثروا بها .. كل يوم – ومع دخول الحما- ونحنا نسمع . ان الحكومة حقتنا .. ولا كان ابوها حكومه – بتحل (مشكلة الكرهبه) ... طيب مش انتوا قلتوا .. أن (رفاقنا الأوكرانيين) .. خلاص صلحوا (المحطه الكهروحراريه) بالحسوه وتفاقدوها تمام .. وان (البترول والديزل) اللي تبرعت به (عمتنا السعوديه) لله وفي الله لكرهبه عدن لمدة سنه .. خلاص وصل .. وان الحكومة أعتمدت (البيس) حقت (التاقه المشتراه) الأضافيه لهذي السنه(ألفين وثمانتعشر).. وأن (الحما) حق هذي السنه بيقع (بارد صاقع) – على قولت (بن دغر) – طيب لما هذا الكلام كل يوم نسمعه .. لشوه عادكم بديتوا تطفوا (الكرهبه) في اليوم الواحد زايد على (أربع مرات ) .. والحما عاده عند (خزق الباب) ياالله عينا على هذي الحكومة .. (الكرهبه بالت .. لاخريت) بعدين عيب عليكم تسكوا علينا نفس الخباره ونفس الاسطوانه .. ان استهلاك الكرهبه في (الحما) يزيد أضعاف مضاعفه .. وأن هذا الأمر يبا (طفاي).. منشان ترتاح (المكاين) .. طيب هذا (الخبر الدامر) قدنا نعرفه ونسمعه كل سنه .. ياناس الكرهبه .. كرهبه كان (حما) او كان (برد) .. لاتزايدوا علينا ولاتضحكوا على المواطن..((ومحد يبيع ماي في حافة السقايين)).. والا كيف الكرهبه في (السعوديه والامارات) وبلاد الدنيا كلها .. لاصيه ليل مع نهار.. ولاتطفى حتى دقيقه – كان حما أو برد- الا عندنا يامكاسير الناموس..؟ شوه القصه .. وشوه هذي المرفاله ؟ (الكرهبه بالت .. لاخريت) .. والله من صدق الكرهبه حقتنا (خريت) ..وياريتها ما (خريت).. لأن البلاد من أصلها كلها (خرا في خرا) .. وعادكم أٍسألوا .. (البلديه).. قلتوا عدن (عاصمة مؤقته) .. طيب (مؤقته ) على قولتكم .. لكن (الكرهبه) وين ..؟ مؤقته أو (موتجه) ..؟ عليكم ماتستحوا .. بعد (نص قرن) من الأستقلال والثوره والجمهورية والنضال والشهداء والجرحى واليتامى والمرملات .. رجعنامن جديد لحياة المواطير والفوانيس والبطاريات والشواحن والشموع والتاقه الشمسيه والتاقه القمريه والبيتري .. والبمبه والبكمه (ام الذبايل) من حقت زمان جدتي .. ماشي موجود هذا الخبر في أي بلاد الا عندنا وفي البلاد حقتنا .. (الكرهبه بالت .. لاخريت) .. دوختوا بالناس ياحكومه.. نسينا حتى اسامينا من فعايلكم .. تصدقوا ياجماعة الخير .. من كثر المواطير والشموع والشواحن اللي في البيوت .. وحده (حرمه) ولدت وبدل ماتسمي ابنها من اسامي الله .. سمته (ماطور) ووحده ثانيه سمت ابنتها(بمبه) .. ووحده ثالثه سمته (فانوس) .. وواحد سمى ابنه (بيتري) .. اما انا ياخلق الله – من كثر (الطفاي واللصاي) هبيت قبل يومين الى (السجل المدني).. وقلت لهم : باكم تقلبوا (اسمي) من (عبدان دهيس) الى (شاحن دهيس) – يعني هكذا على ماتقولوا – لما تطفي الكرهبه .. بالصي بيتي من (مؤخرتي) – عرفتوا شوه اقصد بمؤخرتي ..؟ - ايوه تمام والله جينا عليها .. (الكرهبه بالت .. لا خريت ) .. طيب خلاص بطلنا (البلاطه).. باتفعلوا لنا حل كما الناس يا حكومه.. والا جزعتوا ابوها باطل.. لشوه عادكم حكومه ووزراء ونواب وزراء ووكلاء ومدراء .. على شوه هذا كله .. ووين ابوه هذا (وزير السراج)..؟ شوه جالس يسوي .. يايحل (مشكلة الكرهبه) يايروح له بيتهم.. كفايه (برم وسفريات وريالات ابو عقال) .. ماشي يقلنا بالصدق.. منوه هذا الشيطان بن الشيطان اللي معرقل بناء (محطة استراتيجيه ) للكرهبه في عدن ..؟ خلاص هلكنا .. (الكرهبه بالت .. لا خريت) .. الحقنا يا (عبدربه) عند الله وعندك.. كلم (عمنا سلمان) يفعل حل لكرهبه عدن .. حتى من (بيس الزكاه ) .. سمعت يا (خو ناصر) كم بتتحمل الله يعينك .. (الكرهبه بالت .. لاخريت ..!
