منوه يصدق يا خلق الله ..أن حوطة لحج ومناطق وقرى أخرى في لحج .. بلا (ماي ولا كرهبه) .. وتجلس على هذا الحال ..أيام وشهور.. والمواطن مسكين- لاحول له ولا قوه – يتجرجع المرين.. لا وين أنا لا وين.. والله أنها جريمه .. لحج اللي تسقي أهل عدن بالماي من (بير ناصر) .. أهلها جلوس بلا ماي.. شي هذا الخبر يدخل في عقل بني آدم .. أو حتى في جحر الحمار..؟ بالله عليكم مش هذا باطل .. والله جينا على قول الشاعر : (الما بجمبي ونا بجمبي الما .. هلكان ميت ضما .. ونا تفرج على الما).. أما( قصة الكرهبه) .. فيكفي أن نقول .. أن كرهبه لحج عطوها( مقاول).. من سنوات ( أيام القحط ) .. وأهل لحج وشارع لحج كلهم يعرفوا القصة كلها من أولها لا آخرها .. ويعرفوا منوه هذا قليل الحيا.. والملعون بن الملعون.. من المسؤولين السابقين- اللي وقع وهوه (مأمض).. على الاتفاقيه - والآن يعيشوا في القاهره – حقت مصر مش حقت الشيخ عثمان.. وفي الاردن – وكم شلوا (كميشنات) .. وكم هبروا .. وكم لهفوا .. وكم خزنوا(قات مطول) وكم كلوا (برم لحم ) .. بأسمش يا(مولدات إسعافيه) و يا (تاقه مشتراه)-والله إن هذا (باب) ماشي(تاقه)..! مع بداية شهر رمضان المبارك .. أتصل بي عدد من الأهالي (رجال على نسوان ) من سكان حوطة لحج .. ومن الوهط ومن صبر .. ومن المحله وبيت عياض ومقيبره وجول اليماني .. ومن الفيوش والمجحفه وهران ديان .. والحمراء وطهرور .. وعبر لسلوم. . ومن مناطق أخرى كثيره ماشي أتذكرها الآن .. وقالوا : ((شوف يا بن دهيس .. يا صاحب كلام با للحجي .. أنته مننا وفينا- على ما تقول .. دهل خرب في خوه .. وتعرف مشاكلنا وهمومنا بالوفا والتمام .. نحنا يا بن دهيس .. خلاص تعبنا من مشكلة الكرهبه .. وتعبنا من مشكلة الماي .. بالله عليك .. هل تصدق أن ماي عدن .. يجي من لحج من ايام بريطانيه.. ونحنا هنا في حوطة لحج .. وفي مناطق وقرى ثانيه كثيره.. في لحج.. جلوس بلا ماي .. نشرب هوى..؟ وهل تصدق يا بن دهيس أن الكرهبه حقتنا عطوها مقاول في عهد المسؤولين السابقين.. وكانت الكرهبه تجينا من عدن .. وكنا نحنا نعطي عدن الماي .. وعدن تعطينا الكرهبه .. وبعدما عطوها (مقاول) .. دخلنا في (لعبة الحنش ) حقت الكرهبه .. أيام وشهور يا (بن دهيس) .. تجلس الكرهبه عندنا طافيه يا عافيه.. وساعات تلصا .. وبعدين أمسك لك ريح.. كيف نسوي .. شوه نفعل .. كم كلمنا المسؤولين حقونا.. وكم تابعنا لما زحفنا وتكسرت رجولنا .. والنهاية (وادموعي سيلي) يا لوماه.. وين (الرئيس هادي).. ووين (بن دغر) ووين وزير الكرهبه .. ووين وزير الماي .. وجدات جدات الماي – اللهم أني صايم- ووين الحكومة الشرعية .. اللي عددهم بيجوا ملات طياره.. بين وزراء ونواب وزراء ووكلاء ووكلاء مساعدين .. مع مستشارين وسكرتيريين وإداريين .. مع كتبه وخدم وحشم.. و بايعين هرجه وهدره .. وهات من هذا الكلام الحامض..؟ ووين (المحافظ الخبجي)..؟ يا ناس أرحمونا .. يا ناس أنقذونا .. نحنا هلكنا .. نحنا تعبنا.. نحن نجحنا .. نحنا متنا.. نحنا خلاص قدنا في تب التب.. نسألكم بالله يا حكومة شرعية .. بس خلونا نرجع إلى الحياة جدودنا .. وجدات جداتنا .. وعز ما عندنا – اللهم أني صايم – على سراج الفانوس و البكمه - على قولت أهل عدن (البمبه)- وعلى الماي من البير .. بالرشا والدلو .. بالله عليكم يا شرعية أرحمونا – انتهت المكالمه..)) .. والله العظيم يا خواني .. لما كنت أتسمع على مكالمات الأهالي اللي أتصلوا بي من حوطة لحج ونواحيها.. والله إني بكيت من داخل قلبي .. لأني تذكرت السلاطين العبادله . علي وفضل عبد الكريم ومحسن بن علي وعبدالله وفضل بن علي .. والأمير أحمد بن علي .. (أبو صديقنا القايد علي بن أحمد ) وتذكرت الامير القمندان.. ومحافظ لحج في عهد (جمهورية الجنوب) المحافظ فرتوت .. والمحافظ عوض الحامد والمأمور (الطلي)- الله يرحمه – وكثيرا من المسؤولين الميدانيين في ذوك الزمان الجميل.. والله إنها مأساة.. لحج وقراها بلا ماي ولا كرهبه .. ونحنا في شهر رمضان .. صيام وقيام .. وين يقع هذا الكلام .. ومنوه هذا الهبل المسمخ اللي بيقبله .. هذي حياة ناس ماشي لعب.. نقول لخونا المحافظ الخبجي – وهذا من محبتنا له – خليك مع قضايا الناس وبس .. واللهم أني صايم..!