المشاهرة والكرهبة والماي اصبحت الشغل الشاغل داخل كل بيت ، وشلّت وقتنا كله .. نسير و نهارج نفوسنا وكأننا مجانين .. مشاهرة ..كرهبة.. ماي ، حتى ونحنا رقود نهترش من النوم في الليلة عشر مرات ، ونقوم نحسحس تحت الوسادة شي معانا (بيس) خاف جاب لنا (ساعي البريد ) المشاهرة في الليل ... و(ساعي البريد) حق اليوم ، ماشي كما (ساعي البريد) حق زمان .. وانته يا غشيم افهم.. ما عليش الناس كلهم ضباحى طفارى ، حتى (بقرة جدتي) ضبحانة جيعانة طفرانة .. وعادهم زادوا علمّوها تخزن قات .. يا مُصيبتاه ، شوه هذا الخبر .. بقرة تخزن قات ..؟ جانا زمان مقلوب .. ماشي عاد معانا خبر ثاني غير البريد مفتوح ...؟ يه .. مفتوح .. من صدق مفتوح ..؟ لا مقفل .. جابوا (بيس)..؟ لا ماشي جابوا (بيس) .. البنك المركزي عنده (يبوسة) .. لعنة الله عليهم ، الكرهبة لاصي .. ؟ لا طافي .. لعنة الله عليهم طافي ولاصي، والماي مقطوع والا (يتلتل)..؟ لا مقطوع .. القصبة يابسة عندها مرض الجفاف ، ولا فيها حتى قطرة .. لعنة الله عليهم .. تهب الشغل تسمع هذي الهرجة تجلس في المقهاية تشرب شاهي ، تسمع نفس الاسطوانة ، حتى النسوان حقوتنا نسيّوا زواجهم ، ماشي عاد معاهم كلام ثاني الا خبر المشاهرة والكرهبة والماي ، يا فلانة شفتي كيف.؟ زوجي بلا مشاهرة له (خمسة شهور) شهر ينطح شهر ، وانتي ..؟ اني زوجي له (عشرة شهور) .. حتى رجوله تكرمحوا من السرحة والروحة الى البريد ، وديناه قبل يومين لاعند (المصعبي) يمرّخ له رجوله ، والماي عندكم يجي .؟ لا .. مقطوع له (سنة ونص) نسينا حتى اسمه ، والكرهبة ..؟ قدش دارية ياختي .. (طفي لصّي) .. وشوه تأديتوا ياختي اليوم .. معناته تغديتوا..؟ تأدينا (زربيان كرهبة وماي) وانتوا شوه اداكم .؟ تصدّقي ياختي .. زوجي جاب المشاهرة كلها مقطعة ، من ابو (مية ريال) .. ولا دكان رضي يقبلها ، رجعنا كلناها ورق صافي ، ايش من اكله وقعت ياسلام ، الى ساعتش والان وحنا نتجشع ريالات ، طيب كيف الكلام؟ لنا زايد على (عشرين سنة) ونحنا في معاصدة الكرهبة ، والحكومة قالت من ايام قريبة .. انها باتصلّح (محطة جديدة) في عدن وفي حضرموت ، وهات من هذا الكلام الصاقع ، والله ما عاد درينا وين الصدق من الكذب ..؟ لنا (نص قرن) من يوم ما ثرنا على بريطانيا وعلى الامامة ، واخرتها اصبحت المشاهرة كل خمسة شهور وانته وحظك بيمة، والكرهبة والماي خبرها عند جدتي ، رجعنا لحياة الفوانيس والبكمة والبمبة وللماي من البير وفوق الحمير.. يا عيباه .. و يالومتاه.. ((واحد صومالي)) قال .. ((ورية ايس – معناته ايش- هذا التعب عندكم ، حتى الصومال حقنا .. فيها مشاهرة وكرهبة وماي .. نحنا ما نستي – معناته مانشتي- هذه البلاد حقكم .. خلاص با نروح تنكا بلاد النامس .. حتى الحرب حقنا في الصومال مااستوت زيكم ورية..)) ..تعبنا ورجعت ديامنا حطب .. بس يا جماعة الخير ، وين تقع هذي تنكا بلاد النامس..؟) .. اللي قلّ لنا عليها هونا الصومالي ..؟ واحد (لكيع) سمع الكلام حقنا وقال.. ذلحين انتوا على شوه تتصايحوا من صبح الله .ز؟ (تنكا بلاد النامس) .. تقع هنا (واشر على مؤخرته) الله المستعان اخر عمارنا يبونا نتبهدل .. يا لوماه .. هذا عيب في حق الحكومة الشرعية حقتنا.. خلاص يا ناس ريوسنا وجعتنا من هذا الكلام .. اسالكم بالله خلوّنا نرقد قليل ..!
