نصيحتي للرئيس(هادي) وهذي النصيحة - وماعندي لكم يمين – إنها من داخل قلبي وقلب قلبي- رغم إني مريض بالقلب والسكر- من يوم (إعلان الوحدة) بين (الجنوب والشمال).. هذي الوحدة اللي كنت عضو في أحد لجانها المعنية بتوحيد (النقابات) والأخرى بتوحيد (الصحفيين) .. والله وحده هوه العالم.. كم جلسنا سنين طويله .. طالعين نازلين بين عدنوصنعاء .. وصنعاءوعدن .. وتعبنا نفوسنا وقلوبنا . وكسرنا رجولنا.. منشائش يا وحدة – ولا كان أبوش وحدة – وفي الأخير .. طلعت الوحدة..(فالصوة)..على ما تقولوا ..(هشتي) يعني يا معنى (طيش فيش ).. لعبوا علينا .. وضحكوا على أمهات أمهاتنا.. وجدات جداتنا .. وقلولنا.. أن الوحدة اليمنية.. (قضية وطنيه).. ونحنا على نياتنا صدقنا .. وفرحنا بالزبادي والحقين والبسكت (أبو ولد) وبالقات اليومي.. وكلن عندنا حق- لأن الحزب قفل علينا كل شي وخلانا داخل سجن - وشلينا فرشانا .. وثيابنا وشما طيرنا وعزما عندنا .. وركبنا البوابير والطيارات كما (يوم الحشر والنشر) .. وساني إلى صنعاء (العاصمة التاريخيه) لليمن .. ودقدقوا مشاعرنا وعواطفنا وجوارحنا بهذا الخبر (الطيسي فيسي) .. وختموها – على قولت المثل (بضفعة) – يعني .. بحرب (أربعه وتسعين).. واحتلوا (الجنوب) عن بكرة أبوه وأمه .. ولطشوا وطهشوا ونهبوا .. ترابه وحجارة وبحره وجباله وثرواته – حتى السماء – ماسلمت من طهشم ولطشهم .. وكله كان باسم (وحدة الباجيه والسمبوسه) .. وباسم (القضية الوطنيه) والفرع عاد للأصل .. شوه من فرع .. وشوه من أصل.؟ إن جيتوا للحق .. كان كله (نهب وسرقه) .. جونا (حفاه عراه).. وأصبحوا أحسن مننا لابسين (كوات وسراويل طوال وكرفتات).. سكتوا بس سكتوا.. طيب خلاص هذا الكلام ماشي وقته الآن .. خلونا ذلحين بس مع نصيحتنا لرئيسنا (هادي) – ربنا يقويه ويقوي عظامه ورجولة.. ويحفظه ويحفظ صلعته من عيون الحاسدين.. وكلما زادت صلعته تلمع كلما تفاءلنا بخير .. ونقل له .. يا (هادي) . المواطن فوش ما تحمل من متاعب ومصايب وبلاوي.. ومن حياة النكد والجرجعة والجعثة... ومن آثار الحرب اللي طالت وطولت .. نحنا نباك يا(رئيسنا).. تقوي قلبك وتشخط بقلمك اللي (مداده سعودي) .. أصلي ميه في الميه اللي ما يمتسح.. وتعلن (عفو عام) لكل المواطنين في البلاد – الشريحة المنزلية - من (بيل الكرهبه والماي) .. يعني يا معنى-على ما تقول – تعفيهم من كل (المتأخرات ) .. حتى (ديسمبر) سنه (ألفين وسبعتعشر).. ويلزموا بالدفع من بداية سنه (ألفين وثما نتعشر).. وبعد هذا ماشي عاد غلط عند الحكومة لا قامت بقطع (الكرهبه والماي) على المواطنين .. أو إذا عاقبت اللي يربطوا الكرهبه والماي عشوائي.. بحجه أن (البلاد فالتوه) .. فيا (رئيس هادي) .. إذا عفيت المواطن من (بيل الكرهبه والماي) والله إنك بتدخل التاريخ من أوسع أبوابه.. وبيذكروك الناس- النينوه والكبير والحريم والنسوان كلهم بالخير.. وبيدعولك من داخل قلوبهم .. أن الله يصحك ويعافيك ويجنبك كل شر ومكروه .. وينصرك على عدوك وانته رئيسنا (مدى الحياه) ولا نبا رئيس ثاني غيرك – حتى لاقعت انتخابات رئاسية – بندخل كلنا.. نحنا وجهالنا وحريم حريمنا.. داخل (صناديق الأقتراع ) منشان ناكد لك أننا نحبك .. وأنك أنته مكانك رئيسنا .. لأنك عفيتنا وسامحتنا من (بيل الكرهبه والماي) .. هذا اللي يباه منك المواطن (ياخو ناصر) .. وأنته قدك داري بحال الناس.. خليها بس على الله .. قدهم في (تنك التنك) .. أسعار (السبار) من جمب.. والمشاهره(بيسة وأردي) من الجمب الثاني.. ورمضان قده يتخاوص .. وصحاب (الكرهبه والماي) قاتلين نفوسهم يجيبوا (الأبيال) – على ما تقولوا الفواتير.. كل شهر بشهره .. نعم نحنا معانا (بنك) يقرف لنا (بيس) هيه شلوا .. المواطن يا (هادي) يحتاج نجازيه بكل خير على صبره وتعبه.. أكثر من (خمسين سنه) من عمر الثوره.. ونحنا في قاع وقرمباع .. ودبيش الدبيش.. ولا أستقرينا ولا خلينا غيرنا يستقر .. ولاعرفنا للراحه تريق .. حياتنا كلها في حروب.. وقتال وأنقلابات وتصفيات ونزوح.. وآخرتها ضاعت البلاد وضاعت الثوره.. وهبت (كبع بوري) .. ورجعنا للحروب من جديد .. وكأنك يا(بو زيد ما غزيت) .. خلاص ماعليش هذا قدرنا .. أسألكم بالله عند الله وعندكم .. لا تخرجونا من حقنا الخبر الأولي .. شوفوا (هادي) قده يعجبه الصوت فيسع ما ينسى .. لا .. خلونا نذكره قبل ما ينسى .. أن المواطن يا (هادي) .. نعم يبا (أعفاء ) من (بيل الكرهبه والماي) شوه قلت ..؟ أسألك بالله شوه قلت ..؟ هل عندك مقدره وإلا نكلم (عمنا الملك سلمان )..؟ بالله عليك أمسك القلم وأشخط على بركه الله.. ((أرجم بها عوجا تجي سمح)).. والله يا (هادي) .. إن الناس كلهم بيخرجوا في مسيرات تأييدا لك ودعما لرئاستك مدى الحياه.. لأن تحقيق مطلب العفو من ((بيل الكرهبه والماي)) للمواطن .. تأخر كثير .. وكان مفروض يقع حال ما تم أنتخابك (رئيسا للجمهوريه) .. ماعليش (الغلط مرجوع).. وكل شي يتصلح .. مكانيه هنوك فرصه.. أما صحاب المحلات التجاريه والمصانع وما في حكمها .. إذا كان عندهم متأخرات عليهم أن يدفعوا وأن تجدلوا لهم مبالغ الأقساط .. حتى لا تتأثر تجارتهم وأعمال مصانعهم .. ذلحين خلاص يا (رئيسنا هادي) عساك فهمتنا .. أو عادك ماشي فهمتنا .. المواطن شوف يبا (إعفاء) من (بيل الكرهبه والماي) .. هكذا كلام باللحجي .. ودامت لك (العافيه) ونحنا بنوكل باميه..!
