في هذي الظروف العصيبه والحرجه اللي تعيشها البلاد .. من شرقها لا غربها.. ومن شمالها لا جنوبها.. ويتجرجع مرارتها المواطن التعبان.. ماشي معانا حد يواسينا .. ويحسسنا بالأمان والحنان .. وينقذنا من حياة البؤس والشقاء والجوع والطفر والتعب والنكد .. إلا (رئيسنا هادي).. فأنته أبونا وأمنا وخالنا وعمنا وعمتنا وجدنا وجدتنا.. والله العظيم يا(عبدربه) يا(خو ناصر) – الله يحفظه ويفك أٍسره- إنك أنته ((أبونا)) .. شوف ماشي معانا ((أبو ثاني)) غيرك.. أنته ((سراج بيتنا)) وأنته ((الفانوس والنواره)) و أنته ((الشمعه )).. وأنته ((اللمبه)) حقتنا .. .. وعلى قولت شاعرنا القمندان .. ((سراج البيت لاغدر سرج )) والله من صحيح لا ((غدر البيت)) حق هذي البلاد.. وحق هذا الشعب .. أنته يا ((هادي)) السراج حقه اللي يتضاوى به – على ما تقول - انته أبو الزغير والكبير والعجوزه والشيبه.. والأعجم والأصنج والأعمى والمفتح.. وأبو الشهداء وأبو الجرحى واليتامى والأرامل .. وأبو الحريم والنسوان كلهم حقون البلاد.. وأبو الرجال .. وابو المتقاعدين والمتقاعدات الأحياء منهم ولموات.. وأبو العسكري وأبو المدني اللي يشقوا مع الحكومه والدولة – إنه كان عاد باقي دوله- وجلوس بلا مشاهره من شهور الشهور.. ودهور الدهور.. ذلحين خلونا بالله عليكم من خبابير (المشاهرات والزيادات )) اللي نسمع عليها كل يوم .. وكل ساعه وحين.. والله يعلم أن الزيادة صدق أو أنها كذب .. العسكر صحاب ((الجيش والأمن)) اللي فوق العمل زادت مشاهراتهم (ضعفين) .. الله يعطيهم ويزيدهم ماشي نكره لهم .. والمدنيين اللي فوق العمل والمتقاعدين المدنيين والعسكريين والأمنيين .. مكانهم على مشاهره ((عانه وبيستين )).. شوه هذا اللوك وشوه هذا الظلم ..؟ شوف يا((أبونا هادي)) .. هذا ماشي يقع ولايرضى به انسي ولا جني .. كيف بالله عليك يا ((عبدربه )) في ظل رئاستك .. ناس مشاهراتهم من ((سبعميه ألف )) ومن ((خمسمية ألف)) ومن ((أربعمية ألف)) ومن ((ميتين ألف)) .. مش هذي إلا((بطره)) ..؟ وناس من ((عشرين ألف )) على ما تقول بالهندي ((روبيه ونص)) .. هذا عيب وهذا ظلم في حق الموظفين.. حتى (البنك الدولي ) ماشي بيرضى بهذا الكلام .. والله العظيم أنا أعرف ناس.. مشاهراتهم أقل من ((عشرين ألف ريال)).. وين العداله يا((عبدربه)) .. هل هذا يرضيك..؟ قلولنا إذا كان هذا يرضيكم نحنا خلاص بانقتنع وبنقفل حلوقنا بقفل .. طيب بنسألك .. يا رئيسنا وتاج رأسنا .. منوه هذا اللي يخترع ويقترح لكم ((المشاهرات)) ويقرر مصير شعب بحاله .. بالله عليكم قلولنا منوه هذا العفريت بن العفريت .. والفالتوه بن الفالتوه.. وشوه وأسم أمه واسم جدته .. فيا ((أبونا هادي)) ياسراج البلاد بكلها .. شوف ((الريال اليمني)) أقتلب على رأسه .. وفلت سرواله والأسعار زادت (مثنى ومثلوث ومردوف ) والجونيه الرز قده قيمتها لاهنوك .. لاهنوك.. وعادكم أتخبروا ((رمسيس)) سايق ((البابورالتيكسي)) المشهور في عدن.. اللى كلما تلاقيه يقل لك .. ((تبا أنجيز.. ومعاك باوله و بيستين)).. وين أنته تعيش .. هب خلي بقره تلحسك .. والدقيق والسليط يهرج من نخرته .. بس أسكت ساكت وخلي التبق مستور.. عسى الله كم الديك وكم مرقه ..؟ ولا درينا وين عاد نهب.. وعلى قولت الأغنيه حقت العطروش.. ((جاك السيل وا هارب لاوين الهراب)).. خلاص الناس قرنت .. باقي معاها طرف العقل .. ألحق شعبك يا ((عبدوربووه)).. -بحسب المسرحيه المصريه -.. عيب تسكت على هذا الباطل.. لا مشاهرات كما الناس .. لا ((بيس)) لا بترول.. والماي والكرهبه الله يعلم كيف بتكونوا هذي السنه .. المواطن خلاص في (تب التب) .. والشيطان قده في نخرته .. والجرايم كثرت والقتل والتفجيرات والسرقه زادت والفوضه والبسط على الأراضي من شق ومن طرف .. من دار سعد لما عند باب المعاشيق .. أفعل حل يا (رئيس) عند الله وعندك .. خلي المواطنين والموظفين المدنيين والمتقاعدين المدنيين والعسكريين .. يفرحوا قليل .. حتى لا يقول الناس .. أن هادي (رئيس العسكر) وبس.. أما المدنيين لهم الله .. كما قل لي (عاقل حارة السنافر ) بالمنصوره محمد أحمد دبان .. وكما شكا لي العقيد المظلوم من أستحقاق ((الرتبه وتأخر المشاهره)) .. - ومثله كثير من العسكر - خونا العقيد مهدي بن مهدي قاسم (الرهط ) من (لحج الخضيره) اللي طلبوا مني أن أكتب وخاطب (الرئيس هادي ) بزيادة مشاهرات الموظفين المدنيين والمتقاعدين المدنيين والعسكريين والأمنيين وعلى أستحقاق ((الرتب العسكريه)) .. ونسأل الله أن يستجيب ( هادي) للمظلومين .. ويرفع المشاهرات حقتهم كما رفع (مشاهرات العسكر) .. وأن يصدر قرار حاسم بتثبيت (المتعاقدين والمتعاقدات ) الأحياء منهم ولموات.. اللي لهم (سنين ومنين ) وهم مكانهم (متعاقدين) وقده معاهم من (كورجه جهال) .. وهذي (أم القضايا)) أن جيتوا للحق.. أفعلها يا (هادي) قبل حلول شهر رمضان المبارك.. كما نسأل الله أن يكون الخبر صدق حق (مكرمه الملك سلمان) .. الله يسلمه ويحفظه من كل شر .. ومحد عاد معانا يواسينا بزايد ناقص الا هوه .. بس الله يعلم وين تهب (الريالات حقت السعوديه ) ..وهذي (بوسه) مني فوق راسك مع (مجمره بخور لحجي) تحت عقالك .. يا حبيبنا يا (سلمان ) . وعند الله وعندك أصرف لنا ((المكرمه)) اللي يهرجوا عليها الناس من شهور ودهور وهيه عادها ولاجت .. ولو حتى من (الف ريال سعودي ).. بس كفايتنا.. الطمع ماشي عجيب.. وما بننسى لك هذا الجميل والناس كلهم يسلموا عليك .. حتى أمي وجدتي وخالتي .. ويدعو لك بالنصر .. يا (سيف العرب ) .. ذلحين خلاص في الختام خلونا مع (أبونا هادي ).. أمل المظلومين فيك كبير .. وما عليك الأ تقوي قلبك وتشخط بالقلم وتصدر (قرار جمهوري) حناني طناني يفرح كل الناس بزيادة ( المشاهرات ) .. وأنته ماشي خسران حاجه.. قدك جنب (الولي حق البيس) .. بس هذا اللي نباه منك .. وأنته رئيسنا مدى الحياه .. كما ( الرئيس الصيني) .. وحياك الله يا ((سراج البيت)) يا (خو ناصر) ..!