من الساعة سبع ونص وانا مراعي دوري عشان اعمل مقابلة عبر الانترنت مع مستر( جون ) يمكن الاقي منحة تدريبية في المسرح .. كنت خايف لان المتقدمين هبشة وقليل وانا الانجليزي عندي ركيك والعمد على الله ثم جوجل ولو انه مباود اخص مني احيانا .. ولما اجى دوري باشرنا الرجيلي وهبالي من فوق .. لانه معي سبع دقائق فقط لاغير عشان يقرر .. باشرنا بثلاثة اسئلة اسمك سنك ومن فين؟؟ عرفته على اسمي وسني ولما قلتله انا من اليمن .. طول شوية حسيت انه جالس يبحث عن الموقع المذكور أعلاه .. وقلت سرحت الست الدقائق الباقية وكان نفسي يكون معانا (كولينا) عشان يحسبلي وقت بدل ضائع لصالحي .. واخيرا ردلي جون بثلاث علامات سؤال ؟؟؟ وكأنه ماعرفش انا من فين ..
حاولت اسهله المهمة واقربلة اكثر قلتله انا من ( عدن ) دي لازم يعرفه بحكم الاحتلال البريطاني وماكانت عليه عدن زمان بحكم الميناء والمطار والمكانة الثقافية .. الخ .. برضة طول شوية ورسلي نفس علامات السؤال .. هنا بدأت اشرحله ..واشترحبه .. عدن ياجون اللي فيبه صيرة والصهاريج .. اللي فيبه لطفي جعفر امان ومحمد سعد عبدالله .. اللي لما تمشي فيها تشوف البحر من كل جانب بس الايام دي ممكن تشوف البقع من كل جانب .. عدن اللي لما تروح للحافة بتلاقي الناس المثقفين والدكاترة وبنفس الحافة بتلاقي عيال مكرعين وضاربين تخميسة عالمي ..
عدن ياجون اللي فيبه نفوس طيبة يخرجولك اللقمة من لقوفهم وناس لو يقعلهم يطهشوك من الحقد .. معقول ماتعرفش عدن ؟؟ عدن اللي تخرج من بيتك وبابك مفتوح ولا تسترق حاجة من بيتك بس بالحافة الثانية في واحد فيبه زباااع واكبر لوبيش .. عدن اللي الناس فيها متحضرين ومتعلمين بس كمان ممكن تشوف حد يبول بالشارع وحد يهبلة تمبل مليان الرصدة .. عدن ياجون اللي الجيران يوصوا للي جنبهم لو نجحوا مطفاية وفي ناس لو نجحوا دست زربيان والله مايعطوا ولا يعزموا احد ..
عدن اللي الفلوس فيبه تتبارك وتكفيك الشهر كله وايام تجزع عليك متلاقيش حق الكبريت حتى .. عدن ياجون ؟؟ للان ماعرفتيش ؟؟ طيب اسمع انت لو اجيت من جهة البحر بتجي على صيد ملياااان اشكال والوان .. بس اول مابتنزل للسوق ولا بتلاقي قرم صيد تقول العراري اكلنه واللي موجود محجوز لاصحاب ابو تل والبنادل الكبيرة .. ولوأنت واجي من جهة البر بتلاقي مدينة سكنية مرتبة ومخططة وكمان احواش بالكيلو مترات خاوية لصالح الشيخ الفلاني والبيوت عشوائي بالهبل .. اما لو صنفت تجي من الجو انتبه لفوشتك وشنطتك لان مطار عدن مدوخين والشنط تتضايع بس مليح ماشاء الله والناس هناك متعاونين وكل شي بالنظام .. ها ياجون عرفته ولا لاء ..؟؟
عدن ياجون اللي الدراسة فيها كانت متقدمة والامية محدودة عدن اللي يوقفك واحد عمره عشرين ويقولك اقريلي الرسالة دي من الليدة .. عدن ياخي لما تشل انجيز لامكان يوديك بدون مايلفبك كل الزغاطيط عشان يزيد عليك الحساب ويمكن مايشلش منك لما يعرف انك اجنبي .. بس اوبه تتطمن كثير لانه في ناس يشلوا صاحب التاكسي لا خبت وهبولوا مليان ديمه وشلوا السيارة .. ؟؟ عدن اللي المساجد فيها من سنة نوح بن قندوح وعادوا بناءه لانه بتسقط فوق المصليين ونسوا يكتبوا عام البناء واتخارجوا وكتبوا عام الترميم .. معقول بعد دا كله ماعرفتاش عدن ؟؟ اخص عليك ياجون ؟؟ *خاص عدن الغد