مع موسم الأعراس الشغال في عدن كالعادة من بعد عيد رمضان وبعد العيد الكبير وهات يا عزايم والحريم شغالين قرحة على أزواجهم يشتوا يظهروا بالأعراس أحسن من العروسة وأمه مع حالة البلاد الصعبة وهبوط العملة .. تعالوا لندخل في تفاصيل هذه الحكاية التي يدور الحوار بين عتيق وزوجته فوزية: فوزية: هاا هو أنت جالس هنا بغرفة الإستقبال مقفع وأني أدورلك بالغرفة أحسبك راقد..!! طيب أسمع أشتي أكلمك حاجة مهمة.. عتيق: الله يستر من الحاجة المهمة حقك ما بعدك إلا الخاوي, هاتي أيش معك وخارجينا.. فوزية: شوف لكنك بلا لكاعة لكن يا عتيق, مش كلما أجيت أتكلم معك تتقارحلي زي الطماش..!! عتيق: طيب خلاص سكتنا أيش معك أسرعي خلينا أخزن.. فوزية: سمعت على عرس بيت الجيران ..؟! يقولك نعم فاعلين عرس كبير مُكبر وقدهم عاملين استعدادات وقاتلين نفسهم قتل من كُثر ماهم مشغولين بالعرس.. عتيق: أيوه سمعت يا شيخة أيش تشتينا أسوي لهم ؟!! وبعدين أيش بيسوا أكثر مما يسونه الأوادم الثانيين..!! فوزية: أنت أصلاً أيش دراك كيف الناس تفكر وتسوي وأنت مُقمبر بغرفتك ليل نهار وولا داري بالناس .. أني سمعت نعم وصووا للعروسة الطرحة والثوب حقه من مصر, والثوب إلا لحاله عشرة وار ..!! والا الجهزة اللي أتجهزوا بها جنان يا عتيق شوف الناس لافين الشطارة حقهم مو زينا مساكين الله.. عتيق: إيييه دحين انتي أجيتي تخوينا بذه الكلام اللي كلما أستوت زواجه تخوينا فيبه..!! أيش لك من الناس أيش يعملوا والا يتركوا مكانك طبازة وعينك مُزرق .. إذا معاهم فلوس الله يفتح عليهم.. فوزية: مُزرق في عينك يا بعيد ياريتك زي الباقين يا مليح, بس فالح تتفاصح عليا كلما طلعت كلمة..!! بس بصراحة دلع با يدلعوا بتهم وعلى قولة المثل: "هي اللي تهد رمشهم" الواحد إن كان معه فلوس بايفعل أحسن من الثاني, مش زي بعض الناس.. عتيق: لا وأنتي الصادقة على قولة المثل: "لو العيشة نكد حسن المرقد" آلا يا الله خراجك من ذي الحُرمة اللي ولا با تخلينا أهجع قليل هي واللوك حقه..!! حتى وأنا بالبيت جالس مش عاجبه .. شوفي باسيب لحريمك البيت وباروح أخزن برع عند بيت أخي أحسن لأهلاتك..!! فوزية: أوو أوو أوو .. مو جابوا يا عتيق..؟! بعدين تعال هنا ذكرتني بالقُوميزة مرة أخوك ذيك اللي جالسة تتشطح قدام الناس والجيران أنه أخوك جابله وجابله.. قول لأخوك عيب يساني حرمته ويخليها تهجه بالبيت, مش زي زينب طيري من بيت لا بيت تتفشخر بذهبه وثيابه قدام الناس كلهم..ودحين شوف أني ماليش دخل ولا تلمحش أنه مافيش معك بيس, أني معزومة بالعُرس وأشتي جهزه للعرس زي الأوادم كلهم أثنين ثلاثة أثواب .. وأحمد ربك باقي أيام العرس بلبسك من اللي لبستهم بعُرس بنت كلثوم قبل ستة شهور لأنني ما أشتيش أكلف عليك..!! عشانه على الأقل أشتي ثوبين مُلاح للسمرة, وثوب مُزركش للزفاف عشان أبان مليحة قدام الناس, عشان ما يقولوا زوجة عتيق مش لابسة مليح وشرفك.. شوف كيف أفكر فيبك وأنت ولا داري بزراطي فين..!! عتيق: دحين ذه كله وعادك تفكري فيبي وتشرفينا..؟!! كيف لو ما كنتي تفكري فيبي أيش با تعملي..؟!! ايوووا.. قده نص المشاهرة بتروح للدين حق الشحاري, ونصه يالا تكفي نحنا أسبوع مصاريف البيت, من فين عادنا جيبلك مصاريف الأثواب حقك وأنتي قدك عارفة البير وغطاه من فين عاد نحنا با نصرف باقيت الشهر..!! روحي يأما دوري لمسجدك مؤذن بلا خاوي حقك ودبري حالك بثوب واحد كفاية على قدك.. فوزية: أيش .. أيش .. أيش .. ثوب واحد على قدي..!! أيش شفتني شحاته جنب باب المساجب أقول يارب ياكريم .. وييه عتيق أهجع شوف هااا وبطل الهبالة حقك, شوفك كثرتبه لكن, وباقيت الأيام أيش ألبس بالزواج..؟ أيش با يقولوا الناس عليا..؟!! أني ماليش دخل لازم ألبس ثياب زي الأوادم, وخرج حقه من حق القات اللي تحسكه كل يوم وتستكثر عليا قيمة ثوبين ثلاثة اللي ما أطلبهم منك إلا كل حين ومين.. شوف إنداني أكلمك من دحين لو مابا تشتري لي اللي أشتيه با سيبلك البيت وباروح بيت أهلي وولا عد باتشوف صورتي إنداني أزكن عليك من دحين... عتيق: يتمتم بينه وبين نفسه.. روحة بلا رجعة يا شيخة مع أم الجن تشلك وتعجن.. فوزية: أيش جالس تبرطم تقول, أهدر بصوت عالي وسمعني كيه..!! عتيق: أيش من قات يا شيخة..!! قدنا أخزن أبو ربل وكله شُطف, حسستينا إننا أخزن هرري من أبو عشرين ألف حق السرق.. وأنتي كمان حوشتبك مليه أيش تشتينا أسرق علشان تروحي العُرس مُلبسة..؟! فوزية: بالله يا عتيق يهون عليك أروح بيت الناس وأني بثياب قديمة أيش بايقولوا عليا عيب عليك يارجال..!! عتيق: شوفي يا حُرمة يالا وأنا بتسلفلك حق ثوب وهو ذه اللي أقدر عله, اما أكثر من كذه مافيش معي خليك النكد والرفاس ذي الساعة.. فوزية: سوا سوا .. باتقدر غصباً عنك وييه وباشوف كلام من بايجزع, حق القات تعرف تخرجه ولا عندي أني تقفل أبوه الكاك..!! قدني طول عمري عايشة معك بجحتته أخور الثوب كما الحريم وساكته .. وغيري أفقر مني وهم مُلبسين ومُزركشين على سنجة عشرة, الوحدة فوقه ثوب ما تستاهلوش..!! مرت سعيد مشاهرته أنقص منك وهي كل إلا حلا ودلا لابسة الأزرق والمنقش .. وأنت على أثنين أثواب عاملي زيطه وزمبليطة كما إنك تشتريلي كليوم, خاف الله هي مرة بالعمر.. عتيق: أصلاً أنت ما تجمليش يا لبوة .. مرة بالعمر..!! كل شهر شهرين وانتي معك عُرس ومن اللي يوكس مش أنا يا فصيحة..؟!! يا شيخة حتى لو كان معيه بير با ينشف من كثر العرسان حق .. سوي زي الناس البسي اللي معك وأحمدي ربك .. ناس معاهم وناس مافيش معاهم, وأنت كلما طبل تشتي جهزه وشليتي شيدر كويا دوره زي زينب طيري..!! أستون جهزاتك ولا تخلص أعود بالله..!! سكيتي عليا فلان أتجهز لمرته, فلان أشترى لمرته, زعطان أشترى لجدته .. جننتيبي يا شيخة.. يجي الواحد يشتي ينفه من نكد حق الشارع والشغل تخليه يشوف أمه عروسة..!! فوزية: أيش معناتك أنت دحين سكيت عليا أسوي زي الحريم الباقيين..؟!! أصلاً أنت مهلكش علشان تشوف أيش يلبسوا الحريم واللي حرمتك بينهم تبان مشاطله..!! الناس عُقال ويعرفوا كيف يرفعوا البيسة مو زيك جالس يا تخازين ويا صرفيات وأني وعيالك نخور الكيلو الموز... عتيق: لاحول ولا قوة إلا بالله, صلى على نبيك يا حرمة حرام عليك, قده كل بيسي أصرفه فوقكم أنتي والجهال أيش البطرة حق هذي ما تحمديش الله .. منو اللي يصرف عليكم يا نكاره..؟!! ومكانك أنتي ما تحمديش الله تأكلي وتنكري زي البسه يا بلا معروف, وبعدين لما تتكلمي على إنك تشتينا أرفع الفلوس..!! ليش المشاهرة أصلاً تكفي بهذا الزمن..!! راح زمان ما كان الدولار يساوي سبعة شلن وا حجة, دحين عملتك ولا له قيمة وكاليوم ترتفع الأسعار, وأنتي تشتينا أهكب علشان تشتري أثواب منشان العرسان حقك اللي ما تخلص... فوزية: مليه مو أنت تهبلي ياته هي والخرقة..؟!! كله قده بيدك وأنت اللي تصرف .. واني أيش عرفني فين تروح البيس..!! عتيق: لا أبا قبل أقرح فوقك أحسلي أخرج وأسيبلك البيت بلا خاوي حقك .. ويسيب عتيق البيت ويخرج. بلال غلام حسين 28 أغسطس 2018م
