اتصل بي صديقي فؤاد وقال لي : معي لك عرطة باتخليك تتقفز تقفاز وتجري وتلعب كرة احسن من ميسي.. قلت له : خير ان شاء الله ايش معك مصباح علاء الدين؟ قال : ايش من مصباح وفانوس انا معي مقبل الرنجلة الحفار قلت : حفار ..ايش دخله في هذه الشغلة؟ ضحك وقال : ذا حفار القبور قلت : ايش معه قبر سكني تجاري لي ؟ وبعدين يافؤاد لاتعصدناش عصد من الصبح ..هات من الاخر ايش معك.. قال : اها ..على كذا بااقول لك العرض العرطة حق مقبل القبار .. بدأ كلامه بقوله : صلي على النبي رديت : عليه افضل الصلاة والسلام..قال : في واحد سافر الهند قبل ثلاثة اشهر وركب مفاصل صناعية للركبتين حقة بقيمة 6 الاف دولار وعاد الى عدن ماشاء الله يهمس الارض هماس يجري في الساحل يوميا ورجع رياضي ابن عشرين سنه وهو عقاتك سبعين سنه عمره قلت له : وبعدين..كمل الفيلم انا اسمعك قال : عبد الرحيم بابو خان مات بعد ثلاثة اشهر من العملية.. قلت له : كيف ؟ مش الا رجع رياضي بعمر عشرين سنه.. قال : يومه ياخالد يومه.. قلت : ايش دخلنا انا في قصتك هذه يافؤاد دوخت بعاري رد سريعا : اصبر واجي لك بالكلام.. لفت الى عندي وهو مبهرر وقال : شوف انت تعاني من ركبك وتشتي مفاصل صناعية ومافيش معك ملايين تعمل العملية..صح.. قلت له :صح قال : الان المفاصل اجت لما حدفك تشلهم وتركبهم وتدعي لي.. قلت : انا افدا لك يافؤاد اتكلم بلا الغاز وفهمنا ايش العبارة؟ قال : مقبل الرنجلة الحفار بايجيب لك مفاصل عبدالرحيم بابو خان.. صحت : على مجرم بايكسر عظام الهندي منشان يبيع لي المفاصل الصناعية حقة وانت كمان وسيط..على مجرمين. قال : كون افهم الكلام ابن بابو خان بايكتب لك تنازل رسمي معمد وانت ايش عاد تشتي؟ قلت : يعني بيع رسمي..رسمي.. قال : ايوه.. حكيت رأسي وقلت : عسى الله كم يشتوا قيمة ركب الميت حقهم..؟؟ قال : لاننا اعرفهم ويحترمونا طلبوا مليون بس انا قلت لهم خالد ضبحان ياالله يسلم 500 الف ريال يعني الف دولار قلت : من فين 500 الف ريال يافؤاد قدك تعرفنا متقاعد ب 65 الف ريال.. سكت فؤاد وفكر وفجأة قال : اسمع مادام اسرة بابو خان محتاجين للفلوس بااكلفت عارهم على 300 الف ريال خلاص آخر كلام قلت له : اعطينا فرصة افكر وباارجع لك جواب بس اسمع كيف بااعرف انهم صالحين لركبي والقبار ماعوجهمش لما انتزعهم من ركب المرحوم قال : لك الحق تفحص ولاتسلم الا لما الميكانيك قصدي الاخصائي يقول تمام.. قلت : حلو باقي موضوع يتعلق بالشرع ..قفز وقال : كثرت به ياخالد باترجعنا للشعراوي..يااخي قده اهل الميت واهلاته باعوا لك رسمي ليش عاد تبعسس.. قلت : طيب لاتزعل الموضوع خلاص على مسؤوليتك.. قال : على مسؤوليتي.. كلمت المدام وقلت لها : مستر خالد بايرجع شباب زي الحصان يجري في شارع الحب..ضحكت وقالت : احلم لك خلاص راحت عليك قدك محسوب على القواعد من النساء.. صحت : ايش تقولي؟ رجعتينا مكلف والله انك ماتستحي.. ردت : مله انت ايش تخطرش مو جابه شارع الحب وباترجع طرزان تجري.. قلت : اقول لك من صدق بس انت بعم ماتشتي تفهمي..على الاقل اسأليناايش الحكاية؟ قالت : مو قدك ساحر ياخالد ؟ هيا قول لي حكايتك ؟ قصيت لها الفيلم حق فؤاد كامل وعادنا كملت الا وهي قفزت تصيح : خافوا الله باتنبشوا جثة بابو خان من القبر وباتكسروا ركبه منشان تشل حقة المفاصل الصناعية ذا حرام ..والله ان مابطلت باابلغ بكم.. قلت : مالك دخل اسكتي قبل اتشعتل فوقك.. دخلت غرفتي وسمعتها تبكي وتقول حسبي الله ونعم الوكيل وبصراحة زربنا ديمي وافتجعت وخرجت وقلت لها : خلاص بطلت وذالحين بااتصل بفؤاد يلغي العملية.. دعت لي وقالت : ربنا يشفيك ويرجعك زي زينب طيري اللي لاتقر ولاتستقر وضحكنا ورجعت الغرفة ونمت.. اتصلت في اليوم التالي بصاحبي فؤاد وابلغته انسحابي من العملية.. وقلت له : قدنا على بيدلي ماعاد بالي نار .. قصف عمره القبار مقبل الرنجلة لو مت كان باينبش قبري ويكسر عظامي وينتزع المفاصل ويبيعهم لواحد ثاني..!!
