كتب: خالد محمد شمسان وقع لك امس شمات في الحافة صياح وشتم وعراك بين ثلاثة مهمشين ( اخدام يعني) وبين الحاج ياسين صاحب محل الادوات المعدنية تحت العمارة وعماله (ياسين اللي عزمنا زربيان عند الغريري وخلانا اتكعف الحساب) نزلت والناس متجمهرين تقول مظاهرة كل مجموعة ممسكة بواحد مهمش ( خادم يعني) وهم يتقفزوا ويهددوا ويشتموا وياسين قميصة مقطع وينهف وصلت الى عنده اقول له : ايش في؟ قال : اجانا واحد صغير سرق دبة شاهي والعمال شافوه ضربوه قليل حتى ماتعور وبدأ يجدل حجار على المحل جرينا وراه هرب.. راح جاب العصابة هذونا ودخلوا المحل وبهدلوه وضاربوا العمال حقي حتى انا داهفونا يشتوا يسرقوا وينهبوا قلت له : اهدأ ودخلت بين الناس شفت واحد كان يشتغل معي منظف في الادارة زمان رجل كبير في السن بس صحتة ماشاء الله تمام وعرفت انه زعيم العصابة والبقية عياله.. رحت الى عنده اصيح مالك ياعلي ايش هذه الفوضى؟ شافنا قال : اهلا ابا خالد شفت جاركم كيف سوى بلوليد حقي ضربوه العمال وصاحب المحل لما طعفروا دميانه..قلت له : اسمع ياعلي صيح لعيالك مافيش داعى للشمات والفوضى وانا بااحل المشكله.. قال : على طول ابا خالد انت ادعس على رأسي والحكم لك وصاح يايحي هات اخوانك وتعالوا.. لحظات الا وانسحبوا الى عندي انا وابوهم وانا قلت للناس : رجاء كل واحد يروح لحاله خلاص انتهت المشكلة سحبت علي وعيالة الى ركن الحافه الاخر بعيد من المحل وحكوا لي ان ابنهم راح يشتري دبة شاهي ومعه الفين ريال والجماعه اتهموه بالسرقه وضربوه وضيعوا فلوسه فهمت انهم اوغاد يكذبوا وان ابنهم تورط بالسرقة بس يشتوا يتشعبطوا..قلت لهم : اجلسوا بعيد وانا بااتفاهم مع ابوكم.. سمعوا الكلام وجلسوا بعيد قلت : ياعلي انا بااحكم بينكم موافق ؟ قال : اللي تقول عليه ابا خالد بايمشي حتى على قطع رأسي..قلت لهم : اجلسوا هنا ولا احد يتحرك وانا باتفاهم مع ياسين.. كلمت ياسين يتخارج منهم وقلت له هاذونا اشرار بايبهدلوا بالمحل ويمكن يفعلوا جريمة ومافيش شرطة ولا امن واثنين من عياله جنود مسلحين يشتغلوا مع التحالف في المخا وبايدوخوا بك.. قال لي : والحل..؟ قلت له : هم يشتوا عشرة الف ريال لكن انت هات خمسة الف ريال وبااشوف يمكن اقنعهم قال : والله حرام مايستاهلوا ريال ذولا سرق بس خلاص الدنيا فالتو واعطانا خمسة الف ريال رجعت لعلي وسحبته على جنب وقلت له.: خذ هذا وروح خزن لك وادعي لي.. اخد الخمسة الف ريال وباسنا في رأسي وقال : ابا خالد انا ماارجع لك كلام ياسيد الناس..قلت له : شل عيالك وبوك لك من الحافة ضحك وباسنا في رأسي مرة ثاني وسحب عياله وروحوا .. رجعت لياسينو اللي خلانا ادفع حق الزربيان اول امس وفحط قلت له : شوف الجماعة بالغصب اقتنعوا وبكرة بايجوا هم وابوهم الى عندك لاثبات حسن النوايا وانت اعتذر لهم وهم بايعتذروا لكم تمام.. قال : لا عند الله وعندك لاتخليهم يجوا المحل ياحاج اتصرف معاهم قلت له : طيب بااحاول معهم بس على كيف التعب حقي ياياسين؟ الغداء عليك زربيان عند الغريري رد بسرعة : انت تأمر موافق.. قلت له : اوبه تخدعنا زي ذيك اليوم شوف مفلس ولامعي ريال، ضحك الوغد وقال : عيب عليك بااعطيك الفلوس بيدك تحاسب.. قلت له : اتفقنا.. رجعت البيت اغني على قد الشوق اللي في عيوني ياياسين سلم..سلم ..!!
