ممنوع من السفر ممنوع من الغنا ممنوع من الكلام ممنوع من الاشتياق ممنوع من الاستياء ممنوع من الابتسام وكل يوم فى حبك تزيد الممنوعات وكل يوم باحبك أكتر من اللي فات حبيبتي يا سفينه متشوقه وسجينه مخبر فى كل عقده عسكر فى كل مينا يمنعني لو أغير عليكي أو أطير إليكي واستجير بحضنك أو أنام فى حجرك الوسيع وقلبك الربيع أعود كما الرضيع بحرقة الفطام حبيبتي يا مدينه متزوقه وحزينه فى كل حاره حسره وف كل قصر زينه ممنوع من إني أصبح بعشقك .. أو أبات ممنوع من المناقشه ممنوع من السكات وكل يوم فى حبك تزيد الممنوعات وكل يوم باحبك أكتر من اللي فات