تمارين سهلة وبسيطة ممكن تعملها في أقل من 5 دقايق آية خالد الجلوس في وضع ثابت لمدة طويلة مجهد ومتعب للظهر ولعضلات الجسم المختلفة، ولأن كتير منا بيقضّي على مكتبه في الشغل وقت طويل من غير حركة أو حتى في البيت قدام الكمبيوتر، بنقدّم لك النهارده تمارين سهلة وبسيطة ممكن تتعمل في أقل من 5 دقايق، لتنشيط الدورة الدموية وإنعاش الذهن والجسم.. 1- تمارين أسفل الظهر أسفل الظهر بيكون من أكتر المناطق في الجسم اللي بتتأثّر بالجلوس لمدة طويلة، وده تمرين بسيط بيساعد على شدّ عضلات الظهر.. - اقف واسند أسفل ظهرك بإيديك الاثنين، وبعد كده ارجع بالجزء العلوي من جسمك لورا بزاوية 45 درجة، واثبت على الوضع ده لمدة 20 ثانية، بعدها افرد جسمك وخد نفس عميق، وكرر الحركة مرة تانية. التمرين ده بيساعد على تقليل الضغط على عضلات أسفل الظهر وتوترها، وهيكون مفيد لو كرّرته كل ساعتين 5 مرات. 2- تمارين للرجل والفخذين نتيجة لعدم الحركة والجلوس المتواصل، تحتاج عضلات الرجلين والفخذين للتمرين وتنشيط الدورة الدموية فيهم، وده من التمارين اللي ممكن تساعدك على كده.. - افرد ظهرك وإنت واقف مع ضم الرجلين، وحط إيدك اليمين على رجلك اليمين، وارفع رجلك بشكل مستقيم على قد ما تقدر، وثبّتها على وضعها المفرود لمدة 10 ثوان ونزّلها ببطء، وكرر الحركة دي مع الرجل التانية، مع تكرار نفس الحركة أربع مرات. التمارين دي بتساعد على تنشيط عضلات الرجلين والفخذين وحمايتها من التقلصات والتشنجات، وممكن تعملها مرتين أثناء اليوم. 3- تمارين للكتفين الأكتاف من أكثر الأماكن اللي بتتأثّر، خصوصا لو كانت مهام شغلك بتتطلب حمل صناديق أو ملفات تقيلة، أو لو كنت بتقضي وقت طويل في وضع الكتابة، وده من التمارين المفيدة لتخفيف آلام الكتفين وتنشيطهم.. - افرد ذراعك اليمين وبعدين حطّها على كتفك الشمال، وإيدك الشمال حطها على وسطك من ناحية اليمين، بعد كده شد كتفك الشمال لقدام مع شد عضلاتها جامد، واستمر على نفس الوضع لمدة 10 ثواني، بعد كده نزل إيديك واسترخي، وكرّر الحركة دي الناحية التانية. التمرين ده مفيد لاسترخاء عضلات منطقة الرقبة والكتفين، وبيقلّل من الألم الناتج عن شدّهم والتحميل عليهم لمدة طويلة. 4- تمارين للبطن من أسهل تمارين البطن اللي ممكن تجرّبها أثناء جلوسك على المكتب.. - اقعد على طرف الكرسي، واسند إيدك على مقعد الكرسي، وافرد ظهرك أوي، وارفع رجليك الاتنين وهما مفرودين، مع شد وشفط البطن، واثبت على الوضع ده لمدة 10 ثواني، بعدها نزل رجل واتنفس بهدوء، وكرّر الحركة دي تاني. حاول تعمل التمرين ده مرتين في اليوم، كل مرة فيهم اعمله 10 مرات، هيكون مفيد جدا لشد عضلات البطن، وحمايتها من الترهلات نتيجة الجلوس وقت طويل. 5- تمارين الجلوس والوقوف التمرين ده يعتبر من أشهر التمارين وأفيدها، لأنه بيحرّك وينشّط مجموعة كبيرة من عضلات الجسم.. - افرد ظهرك وإنت قاعد على الكرسي بحيث إن رجلك تكون ثابتة ومستقيمة على الأرض، وبعد كده اقف واقعد كذا مرة ورا بعض، التمرين ده بينشط الدورة الدموية، وبينعش الذهن وينبهّه. وبالإضافة لأهمية التمارين دي، فيه عادات يومية بسيطة ممكن تعملها علشان تساعدك في الحفاظ على صحة جسمك وعقلك، زي شرب المية بكثرة أثناء اليوم، واستغلال فرص الحركة زي طلوع السلم بدل استخدام الأسانسير، أو المشي لمسافات بسيطة بدل استخدام العربية أو المواصلات، كل دي خطوات بسيطة وسهلة جدا، لكنها بتحافظ على صحتنا من آثار الإرهاق والعادات اليومية السيئة.
