جمالك من الطبيعة مع رانيا أعدّتها للنشر: آية خالد أهلا بكل بنات "قمر 14" في حلقة جديدة من "جمالك من الطبيعة مع رانيا"، والنهارده هنقدّم لك ماسكات طبيعية للبشرة الجافة والمرهقة، علشان تتمتعي ببشرة نضرة ورطبة وصحية.. ماسك الجزر والقرع العسلي للبشرة شديدة الجفاف المقادير: ملعقة صغيرة زيت لوز حلو ثمرة جزر متوسطة مبشورة ملعقة كبيرة لوز مطحون كوب قرع عسلي مبشور ملعقة كبيرة لبن بودرة كوب ماء إضغط لمشاهدة الفيديو: الطريقة: 1- اسلقي الجزر المبشور والقرع في المية لحد ما يستووا كويس، ولما يبردوا شوية اضربيهم مع بعض في الخلاط لمدة دقيقة. ملحوظة: ممكن تستخدمي الخليط ده على بشرتك بشكل يومي من غير ما تحطّي باقي الإضافات. 2- حطّي الخليط في طبق، وضيفي عليه اللوز المطحون واللبن البودرة، وقلّبيهم كويس مع بعض، وبعد كده حطّيه على بشرتك لمدة نصف ساعة أو ساعة إلا ربع واشطفي جسمك، وبعدها حطّي كريم أو زيت مرطب. الماسك ده بيساعد على تجديد خلايا البشرة وتنظيفها ويعمل على تأخير ظهور التجاعيد، وممكن تحتفظي بيه في الثلاجة لمدة أسبوع أو 10 أيام. إضغط لمشاهدة الفيديو: ماسك الأفوكادو لترطيب وتغذية البشرة المقادير: 2 ملعقة كبيرة لوز مطحون ثمرة أفوكادو طرية 2 ملعقة لبن حليب ملعقة كبيرة عسل الطريقة: 1- قطعي ثمرة الأفوكادو، واهرسيها بملعقة، لحد ما تبقى ناعمة خالص، وضيفي العسل واللبن واللوز المطحون، وقلّبيهم كويس أوي لحد ما يبقى المزيج متجانس وناعم جدا. 2- اغسلي وشك بالمية والصابون، وافردي الماسك على بشرتك كويس، وتأكّدي إن كل بشرتك متغطية بالماسك لمدة 30 : 45 دقيقة، واغسلي وشك ورطّبيه بأي كريم أو زيت مرطب. الماسك ده بيكون أفضل للسيدات فوق الأربعين، وبيحافظ على نظافة البشرة ونضارتها، ويحميها من التجاعيد. إضغط لمشاهدة الفيديو: ماسك صنفرة بالطمي والترمس للبشرة الخشنة والباهتة المقادير: 5 ملعقة كبيرة ترمس مطحون 3 ملعقة صغيرة زيت لوز مر ملعقة صغيرة زيت الزيتون ملعقة صغيرة زيت الورد 3 ملعقة طمي مغربي قطعة صابون مغربي ملعقة كبيرة عسل عصير ليمونة كوب ماء الطريقة: 1- ابشري قطعة الصابون، وحطي المية في حلة، وضيفي زيت اللوز، وزيت الزيتون، وزيت الورد، وبعد دقيقتين ضيفي الصابون المبشور، ودوبيه مع الخليط، وقلبيه كويس على نار هادية لحد ما يعمل رغوة، وضيفي عصير الليمون، والطمي. 2- قلّبي الخليط كويس، وضيفي عليه الترمس، وقلّبي بالراحة، لحد ما يبقى الخليط ناعم أوي وحبيباته صغيرة، وشيليه من على النار. 3- حطي الخليط في طبق وضيفي العسل، وقلبيه مع المزيج، ولما يبرد شوية حطيه على جسمك كله بعد ما تغسليه، وصنفري جسمك بيه بحركات دائرية، واشطفي جسمك، وبعدها حطي طبقة تانية من الماسك على جسمك بفرشاة الصبغة، وسبيبه لمدة نص ساعة واغسلي جسمك، وبعدها ادهني جسمك بزيتك العطري المفضل أو أي كريم مرطب. استخدمي الماسك ده يوم بعد يوم، واستمري عليه لمدة 3 شهور، هيرطب بشرتك ويغذّيها ويفتّحها ويحافظ على نضارتها. إضغط لمشاهدة الفيديو: وبكده تكون خلصت حلقتنا النهارده.. استنونا في الحلقة اللي جاية.. سلام..