ماسكات لعيون مشرقة وجذابة أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، النهارده حلقتنا هتكون مخصّصة للعناية بمنطقة العينين علشان كل الناس اللي بتشتكي من الهالات السوداء وانتفاخ المنطقة تحت العين.. النعناع لعلاج انتفاخ العينين والهالات السوداء المقادير: 2 ملعقة كبيرة أوراق نعناع أخضر مفرومة ملعقة كبيرة خيار مبشور الطريقة: اخلطي النعناع مع الخيار، واعملي كمّادات من الخليط ده على منطقة العيون كلها، وسيبيه لمدة ربع ساعة مع تغيير الكمادة مرة كل 5 دقايق، وبعد كده امسحي المنطقة دي بقطنة مبللة بمية الورد؛ لأن أنا مش بافضل إنك تغسلي وشك بالميه بعد الماسك ده مباشرة علشان تقدري تستفيدي منه بشكل أكبر، لكن لو هتتعرّضي للبخار في المطبخ أو هتخرجي يبقى الأفضل إنك تشطفي بشرتك بالميه، وممكن تعملي الماسك ده من مرتين لثلاث مرات في اليوم. إضغط لمشاهدة الفيديو: الجزر للبشرة الحسّاسة المقادير: ثمرة جزر صغيرة (أحمر أو برتقالي) 1⁄2 كوب ماء الطريقة: قطّعي الجزر واسلقيه مع الميه على النار، وبعد كده اضربيهم مع بعض في الخلاط بعد ما الجزر يستوي تماما، وبعد كده ممكن تحتفظي بالخليط ده في زجاجة برفان قديمة وترشّي منه على بشرتك الصبح وبالليل، والماسك ده بيدّي نضارة للبشرة، وبيعمل على إزالة التجاعيد الصغيرة اللي بتظهر على المنطقة حول العين، وهو مفيد جدا للبشرة الجافة والحسّاسة. تقدري كمان تخلطي بيوريه الجزر (نفس المكوّنات بس بتقللي كمية الميه شوية علشان الخليط يبقى سميك شوية) مع نصف ملعقة كبيرة زبادي، وتحطّي الخليط ده على منطقة العيون، وممكن تكرّريه مرة كل يوم. إضغط لمشاهدة الفيديو: البرتقال والزبادي لبشرة مشرقة المقادير: 11⁄2 ملعقة كبيرة دقيق 2 ملعقة كبيرة زبادي عصير 1⁄2 برتقالة كبيرة الطريقة: اخلطي الزبادي مع الدقيق وعصير البرتقال، وقلّبيهم مع بعض كويس لغاية ما تحصلي على عجينة ليّنة، والماسك ده ممكن تعملي منه كمية كبيرة شوية وتحتفظي به في الثلاجة وتستخدمي منه يوميا على بشرة وشك، ولو كانت بشرتك دهنية ممكن تضيفي معاه ملعقة صغيرة عصير ليمون، ولو بشرتك جافة ممكن تضيفي معاه زيت لوز حلو، أو زيت جوجوبا أو زيت جنين القمح لو كانت بشرتك متقدّمة في العمر شوية، وبتشطفي بشرتك بعد كده بالميه العادية. والماسك ده ممكن نستخدمه على منطقة العيون وبشرة الوش بالكامل وعلى الجسم كله، ومع المواظبة عليه هيساعدك في تغذية بشرتك ونضارتها ولمعانها. إضغط لمشاهدة الفيديو: العسل لتهدئة منطقة العيون الماسك ده هنعمله بعد أي ماسك من الماسكات اللي هنعملها على منطقة العينين. المقادير: ملعقة صغيرة عسل نحل 3 نقط زيت لوز حلو الطريقة: اخلطي العسل مع زيت اللوز الحلو، وقلّبيهم مع بعض كويس، وادهني المنطقة تحت العيون بالخليط ده وسيبيه على بشرتك لمدة نصف ساعة، وبعد كده اشطفي بشرتك كويس. إضغط لمشاهدة الفيديو: وبكده تكون خلصت حلقتنا النهارده.. استنونا في الحلقة اللي جاية.. وكل سنة وأنتم طيبين.. سلام،،،
