معانا هتكوني قمر 14 أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، والنهارده بمناسبة أعياد الميلاد المجيد والكريسماس، حلقتنا هتكون مميزة جدا هنعمل فيها ماسكات كتيرة للبشرة علشان تظهري متألقة مع السنة الجديدة.. ماسك الأرز والبرتقال لتفتيح البشرة المقادير: ملعقة كبيرة أرز مطحون عصير نصف برتقالة الطريقة: اخلطي المكونات دي مع بعضها، وقلّبيهم كويس، وبعد كده افردي الخليط ده على بشرتك بعد ما تغسليها كويس. لو بشرتك دهنية أوي أو مختلطة مائلة للدهنية ممكن تضيفي عصير نصف ليمونة ونصف ملعقة كبيرة عسل نحل على الخليط السابق، وبعد كده استخدميه على بشرتك وسيبيه لمدة من 30 دقيقة، وبعد كده اشطفي وشكك بالميه العادية. أما بقى لو بشرتك حساسة أو جافة، يبقى بتضيفي نصف ملعقة صغيرة زيت لوز حلو على خليط عصير البرتقال والأرز، وبعد كده افردي الخليط على بشرتك، وسيبيه لمدة 30 دقيقة، وبعد كده اشطفي بشرتك كويس. الماسك ده من الحاجات اللي ممكن تعمليها بسرعة لو عندك مناسبة؛ لأنها بتعمل نتيجة هايلة جدا وفي وقت سريع وبتعطي للبشرة نضارة ولمعان طبيعي. إضغط لمشاهدة الفيديو: خل الورد خل الورد من الحاجات المفيدة جدا للبشرة، اللي بتدّيها نضارة ولمعان. المقادير: خل أبيض ورد بلدي الطريقة: هاتي برطمان زجاجي واملي نصفه بالخل الأبيض، وبعد كده انقعي فيه كمية مناسبة من أوراق الورد البلدي، وبعد كده غطّي البرطمان واحتفظي به في مكان دافي أو في مكان مشمش، وسيبيه لمدة من 3 أسابيع إلى شهر. ماسكات طبيعية لامتلاء الوجه دلوقتي هاقول ماسكات مفيدة جدا لكل البنات اللي عايزين منطقة الخدين عندهم تبقى ممتلئة ومنحوتة، الماسكات دي بتظهر نتيجتها بعد المواظبة عليها لمدة شهر. إضغط لمشاهدة الفيديو: ماسك الحلبة المقادير: 3 ملعقة صغيرة زيت حلبة ملعقة كبيرة زيت خروع ملعقة صغيرة زيت عنبر الطريقة: اخلطي الزيوت دي كلها مع بعضها في برطمان زجاجي صغير، وممكن تحتفظي به وتستخدميه من مرة لمرتين في اليوم، بس راعي إنك ترجي البرطمان كويس قبل الاستخدام، وبلاش توزّعي الزيوت دي عند منطقة العين. الماسك ده بيساعد على امتلاء الوجه والخدين، وكمان بيعمل على امتلاء التجاعيد الرفيعة اللي بتكون موجودة على البشرة. ماسك بزيت جنين القمح المقادير: 3 ملعقة صغيرة زيت جنين القمح 3 ملعقة صغيرة زيت عنبر الطريقة: اخلطي الزيوت دي مع بعضها، وحطّيهم في برطمان زجاجي واستخدمي منه مرتين في اليوم بعد ما ترجيه كويس، وبتوزّعيه على بشرة وشك والرقبة لكن تجنّبي منطقة العيون. إضغط لمشاهدة الفيديو: البقدونس والريحان لشعر صحي ولامع المقادير: حزمة صغيرة ريحان أخضر حزمة صغيرة بقدونس الطريقة: قطّعي الريحان والبقدونس قطع صغيرة جدا، واضربيهم في الخلاط مع كمية صغيرة من الميه، وبعد كده صفّي الخليط ده. لو شعرك دهني أو مركب أو فيه قشرة، ضيفي على الخليط السابق عصير نصف ليمونة ونصف ملعقة عسل نحل، ووزّعيه على فروة الرأس وعلى الشعر بالكامل بعد ما تغسلي شعرك كويس، وسيبيه لمدة 20 : 30 دقيقة وبعد كده اشطفي شعرك بالميه العادية. أما لو شعرك جاف، فممكن تضيفي قطعة بلسم أو حمام كريم على خليط الريحان والبقدونس، وتحطّيه على فروة الرأس وعلى الشعر بالكامل، وسيبيه لمدة 15 : 20 دقيقة، وبعد كده اشطفي شعرك بالميه العادية. إضغط لمشاهدة الفيديو: وبكده تكون خلصت حلقتنا النهارده.. وكل سنة وإنتم طيبين وبخير.. وعام جديد سعيد على الجميع..
