قدمي المشروم المقلي كطبق جانبي شهي مع أي وجبة أعدّتها لكم: آية خالد من الأطباق الجانبية المميّزة والشهية اللي ممكن تقدّميها لأسرتك جنب أي وجبة "المشروم المقلي"، والنهارده هنقول لك على طريقة تحضيره بخطوات سهلة وبسيطة... مشروم مقلي على الطريقة الفرنسية المقادير: 1⁄2 كيلو مشروم طازج 1⁄2 ملعقة صغيرة كزبرة ناشفة 1 ثمرة بصل مفرومة ملعقة صغيرة بهارات 2 فص ثوم مفروم 1⁄2 كوب بقسماط 1⁄2 كوب دقيق زيت للقلي 2 بيضة ملح وفلفل الطريقة: 1- اغسلي المشروم ونضّفيه كويس وحطيه في طبق غويط، وحطّي عليه البصل والثوم والبهارات والكزبرة، وسيبيه في التوابل دي نص ساعة. 2- سخّني زيت القلي، وحطي البيض على المشروم في الطبق وقلبيهم كويس، وبعد كده خدي كل واحدة من المشروم حطيها في الدقيق وبعدين البقسماط، وبعدها حطيها في الزيت على كل جنب، لحد لونها ما يبقى دهبي، وخرّجيها على ورق مطبخ عشان تصفّي الزيت، وقدّميها مع سلطة الزبادي كأطباق جانبية مع أي وجبة.. وبالهنا والشفا. وبكده تكون خلصت وصفة النهارده.. جرّبوها وقولوا لنا على رأيكم فيها.. واستنونا بكره مع وصفة جديدة.. سلام،،،