* * * * أنا سيده متزوجة من 17 سنة وعندي ولدين أكبرهم 16 سنه وأصغرهم 12 سنة مشكلتي مع زوجي وهي مشكله تقريبا من أول يوم جواز وهو عصبي وبيتلكك علي أي حاجة أعملها وبيتريق علي لاأكل رغم إنه بيعجب الأولاد وبيتدخل في أي حاجة جوه البيت وبره البيت وفي تعاملاتي مع الآخرين وفي علاقتي مع الأولاد ولازم كلامه هو اللي يتنفذ سواء كان صح أو غلط أو نقدر نعمله أو.. لأ، وبحس إن طبعه قاسي وجاف وخصوصًا لو أي حد عارضه في شئ وعلي فكرة علاقته بأهله برضه فيها مشاكل وعشان كده مش بيتدخلو في أي مشاكل تحصل بينا، ودايمًا يتدخل في لبس الأولاد وفي اختيارتهم وتحصل مشكلة بينهم ومش مقتنع إنهم كبروا ويريدوا أن يختاروا لبسهم بنفسهم وطريقه قص شعرهم وبيتجنوا يتكلمو معاه ويقولولي مش عايزين بابا يقعد معانا في البيت وعلي فكره الشقة بأسمي وهما حنينين عليا رغم إنهم لسه أطفال بس بحس إنهم حاسين بيا لدرجة إن الكبير مرة إداني مصروفه، وقالي عشان مش تطلبي حاجة من بابا، وعلي طول فيه فرق في تعاملاته مع الأولاد ودائمًا يزعق للكبير رغم إن الصغير بيكون هو اللي غلطان وبيتأخر بره البيت ولما أكلمه يقولي طالما بابا في البيت أرجع ليه وعلي فكره أنا مش ملاك برضه ولي أخطاء ولي حاجات تغيظ بس ده بيكون رد فعل لحاجات تحصل حاجه تانية إحنا كلنا ساكنين في عمارة واحدة مع أهلي ولو أي حد عايز مني أي حاجه من وجهة نظره عيب لما يطلبوا أو أنا أطلب منهم حاجة رغم إن دا عادي يعني إيه المشكله لما يطلبو مني شويه ملح مثلاً ويعمل مشكلة كبيرة معايا بسببهم، أنا بصراحة مش قادرة أتأقلم علي تفكيره وعلي اسلوبه ولما تحصل مشكلة يفضل يعيد حاجات حصلت من أول يوم جواز ويحاسبنا عليها ولو أي حد تدخل لايحترم رأيه ولايحترم أبوه ويقول أنا مش صغير عشان حد يوجهني..علي فكره هو كريم جدًا في بيته ولايتأخر عن أي طلب يطلبه الأولاد، ولو أهلي تدخلوا يفضل فتره كويس ويرجع زي الأول.. أنا حاسه إني مش هقدر استمر علي الوضع دا؛ لأن نفسيتي تعبت وصحتي في النازل ومش قادره أكون في مكان هو موجود فيه وقولتلو كده قالي أنا أخلص بمزاجي وأنا عارفه إنه بيقول كده، لأن مفيش مكان يقعد فيه غير هنا وخصوصا بعد مشاكلو مع أهلو حاسه إنو مالوش كبير اشتكي لمين وكل من حواليه يقولولي لازم تستحملي عشان خاطر الأولاد بس أنا شايفه لو مفيش تفاهم واحترام بين الزوجين العيشه تبقي صعبه قوي يعني الواحد يتحمل شخص يكون متضايق منه لكن يتحمل شخص بيكره ده صعب ودي وجهه نظري أنا نفسي أبعد عنه شويه نفسي أسافر في أي مكان آخد منه هدنه يمكن أعصابي ترتاح وأفتح معاه صفحة جديدة لكن هو مش موافق ودا اللي خانقني منه أكتر. أنا من كتر يأسي الدنيا اسودت في وشي أخدت أدويه وشرايط كتيره مرة واحده ولكن ربنا عاقبني ومحصليش أي حاجة أفيدوني أرجوكم أفادكم الله. صديقتنا العزيزة أسرة «بص وطل» تعتذر عن التأخير أقدر ما تشعرين به من احساس بالحزن على نفسك وعلى ابنائك ، وأيضًا ما تعانيه انتى وابنائك من هذا الزوج. الحياة الزوجية مليئة بالأيام الجميلة والأيام العصيبة أيضًا ، وكل زوجة تمر بظروف لا يعلمها إلا الله، وأنا أنصحك أختى الحبيبه أن تصبري ولكى الأجر . تعالى نفكر معًا فى بعض الحلول لنفرض أنك قررتي الانفصال عنه نهائيا: كيف ستواجهين الحياه بمفردك ؟ هل ستتطيعى الحياة وتحمل مسؤلية أبنائك بمفردك خاصة أنهم شباب ومهما كان والدهم سيئ الطباع هم بحاجة له.. هل تستطيعي توفير مصدر للرزق كافى لكي وأولادك ؟ ليس هدفى من كلماتى أن أعقد لك الأمور ولكن لتعلمى أختى الحبيبة أن الحفاظ على البيوت من أصعب ما يكون، لن أقول لك حاولى أن تبتعدى عنه وقت الغضب أو أن تتفادى المواقف التى تجعله يعصب عليك أو على ابنائك فقد مر 17 عام على زواجك ومن المؤكد أنكي قد حاولت الكثير والكثير لتغيرى من طباع زوجك ولكن بلا فائدة. انصحك بأن تصبري ولكي الأجر ، وإن الله سبحانه وتعالى لا ينسى عبادة وعليكي بالصلاة والدعا ء وأنتي ساجدة وادعى بهذا الدعاء (اللهم سخر لي زوجي كما سخرت الرياح لسيدنا سليمان وكما سخرت البحر لموسى والحوت ليونس وآلنه لي كما ألنت الحديد لسيدنا داوود واجعل غضبه بردًا وسلامًا علي كما جعلت النار بردًا على سيدنا إبرهيم) وآرجو من الله أن يهدي زوجك وأن تتحلي بالصبر والدعاء ويعينك على ما أنتي فيه. مواضيع متعلقة بص وطل
