* * * * السلام عليكم ورحمة الله وبركاته .. فى البداية أحب أشكركم على مجهوداتكم العظيمة فى هذا الباب وربنا يجعله فى ميزان حسناتكم .. أنا طالب فى كلية من كليات القمة كنت مرتبط بواحدة زميلتى من أيام الثانوى وحصلت مشاكل كتير بينا بسبب تدخل اخواتها البنات الزائد فى حياتها الشخصية؛ لان شخصيتها ضعيفة وكانو بيتحججو إنها متعرفش حاجة ومتعرفش مصلحتها وكانوا بيحاولوا دايما يبعدونا عن بعض وكنا بنتخانق كتير لكن كنا بنرجع نكلم بعض .. كان فيها عيوب كتير زى التشاؤم والنظرة السيئة للمستقبل واليأس والامبالاة وده اتسبب أنها مجبتش مجموع حلو فى الثانوية؛ بسبب استسلامها بس شاءت الأقدار انها تدخل كلية خاصة وبقينا احنا الاتنين ف نفس المجال .. ده شئ فرحنى جدا وقتها لانى افتكرت ان اخواتها هسيبونا فى حالنا لاننا بقينا عندنا مكانة فى المجتمع وكده .. حصلت برضو مشاكل بسبب اخواتها وأسباب أخرى تتعلق بيها والله الغلط كان من ناحيتها وبعدنا عن بعض واحنا فى الكلية وهى اتخطبت وأنا قعدت فترة زعلان ورضيت بالأمر الواقع .. بعد فترة أعجبت بواحدة زميلتى فى الكلية ومجاتش فرصة إنى أتكلم معاها فروحت اتكلمت معاها ع الفيس ولاحظت برضو من صورها وبوستاتها إنها ليها نفس الشخصية من حيث الحزن والتشاؤم و حسيت من بوستاتها إنها كانت مرتبطة بحد وسابها .. سألتها انكرت تماما واستغربت من سؤالى لاننا زمايل ومتوقعتش انى يعنى أسألها سؤال زى ده .. أنا اعترفت لها أنى معجب بيها وبدأت أغير فى شخصيتها والحمد لله اتغيرت كتير ( ع عكس حبيبتى السابقة اللى حاولت معاها كتير ومتغيرتش ) بس بعبع حبيبتى السابقة بيطاردنى من ناحية إن التغيير يبقى وقتى وترجع تانى لنفس الصفات اللى كانت سبب فى المشاكل بينى وبينها وخصوصا برضو إن زميلتى دى اخواتها كلهم بنات .. زميلتى حست من كلامى وافعالى معاها انى مش مجرد ان معجب بيها وقالتلى كده بس انا قولتلها انى بس معجب بيها ومش عارف بعمل ليه معاها كده .. أنا خايف أحبها بسبب الحاجات اللى أنا قولتها دى وف نفس الوقت خايف اعلقها بيا مع أنى دايما بقولها اننا زمايل وبس وبرضو ف نفس الوقت مش قادر أبعد عنها ..أنا مش عارف أعمل ايه ... وآسف ع الاطالة. صديقنا العزيز كل انسان فى الحياة له شخصية تختلف عن الآخر ...كلنا لنا مميزات وعيوب.. وممكن أن يكون هناك تشابه فى بعض الصفات فى بعض البشر ولكن المسأله هنا فى قابليه هذا الشخص للتغير والتخلى عن الطباع الغير مرغوب فيها. مشكلتك يا أخى الكريم إنك خائف من الارتباط ومن حب فتاة أخرى ويصير معك نفس ما صار فى السابق، وان لا تستطيع تغير الطباع التى لا تتناسب معك ، أحب أن أوضح لك بعض الأشياء البسيطة: أولاً: كل شخص يختلف عن غيره فى الطباع ثانيا: كما فى هذه الفتاه طباع انت ترى أنها بحاجة للتغير فمن المؤكد أنه يوجد فيك أنت أيضًا بعض طباع تحتاج إلى التغيير يا أخى لا تدع شبح الماضى يطاردك ويؤثر على حياتك القادمة, ما مضى من حياتك قد مضى... لا تضيع المستقبل بخوفك من الماضى . أقبل على الحياة بشجاعة ولا تربط ما حدث فى الماضى بما سوف يحدث بالمستقبل لقد عوضك الله بفتاه أخرى وبدأت أن تتجاوز ما حدث فى السابق.. فدع الماضى وافتح قلبك مرة أخرى. مواضيع متعلقة بص وطل
