اليوم خلونا نتكلم على مغامراتنا في السفر مع خدمات الطيران في بلادنا الرائعة خصوصا بعداللي حصل للطائرة اللي كانت متوجهة لجدة وعادت بسبب خلل فني وخرج تصريح حناني طناني من اليمنية يدين التهويل الإعلامي للركاب لما حصل لهم من فجيعة..أولا هل تعلم ان أسطولنا الجوي من طيران اليمنية.. (الأسطوووووول ) هو عبارة عن 10 طائرات في الخدمة .. مدري ليش يسموه أسطول وهو 10 حبات تروح وتجي ل24 مطار حول العالم ..طبعا بحول العالم قصدي 4 دول أوروبية و5 دول أفريقية و5 آسيوية والدول العربية.. بس الحمدلله يعتبر إنجاز لطيران يمشي على بركة الله....ووضعنا أحسن من جيبوتي هم معاهم بس 5 طائرات ..صح إنهم دولة منها شبر ونص مقارنة باليمن يعني اليمن 23 مرة أكبر من جيبوتي ..بس الواحد يقول الحمد لله على كل حال ...بس نفسي أعرف فين الطائرات الجديدة اللي قالوا بتجي..في 2010 اليمنية عملت طلبية 10 طائرات ثانية على أساس يتم تسليمها بين 2011-2013 على دفع ..فينهم إن شاء الله .. ما يكونوش زي القطار والسكة الحديدية... وقت التشيك إن وطلوع الطيارة يا جماعة في حد لاحظ ان الشعب اليمني عنده مشكلة مع الطوبرة؟؟؟؟ في حاجة اسمها بيرسونال سبيس يعني مساحة خاصة بالواحد وبالمعايير الدولية هي عبارة عن مدت يدك لقدامك والدائرة اللي تكونها حول نفسك ويدك ممدودة هذه هي المساحة الخاصة..اي واحد غريب يخطى عليها انتهاك لخصوصيتك..طبعا في اليمن هذه مفقودة تماما....أما الخطوط الصفراء.. هذه الخطوط الصفراء تحصلوها قدام كل كاونتر المفترض ان اول واحد في الصف يكون واقف عندها...الا عندنا هذه الخطوط من كثر ما هي مفحوسة قد فسخ لونها ومحد معترف بها خالص...طبعا في المطارات الدولية في البلدان الثانية يرتبوا الطوابير عن طريق اشرطة يرصوها على شكل ممرات زجزاج تعرفوا كيف المسافر اليمني يتخطى هذه الممرات والله انهم اللي يقفز من فوقها او ينزل من تحتها عشان يوصل مش فاهم كسل ولا مش معترف فيها ايضا؟؟؟؟؟؟؟ انا احاول ما زاحمش اللي قدامي وبعمل شنطتي من وراي عشان محد يزاحمني لعل وعسى الناس تفهم ..لكن للأسف إذا عملت فسح بسيط مع اللي قدامك فجأة يظهر لك واحد يجي ينكشح قدامك بكل بساطة... وعلى فكرة ما فيش احترام للمساحة الخاصة حتى لنا النساء في المطار تختفي..قدهم مطربقين النسوان من كل جانب لا وقت طوبرة المطار المكاشحة حلال اللي يدهفك واللي يزبط الشنطة ..كله كوم ووقت طلوع الطيارة كوم تقول الا الطيارة بتهرب؟؟؟ في المطارات الأخرى أولا يدعوا الناس كبار السن وبعدين اللي عندهم عائلات وبعدين يفتحوا مجال للآخرين....ما اعتقدش ان شيء بسيط مثل هذا لا يمكن تنفيذه بمطاراتنا الأسطورية.. أو تكون جالس في صالة الانتظار اللي ما فيش داعي انتقد نظافتها او نظافة الحمامات.. فجأة يجي واحد يصيح فوق رأسك: "الركاب المسافرين لبيروت ..الركاااااب المساااافففرريييين لبييرووووت" ..عندنا يمكن المطار الوحيد في العالم اللي يعملوا اناونسمنتس اعلانات بالصياح مش عن طريق المكرفون.. لا بالصياح.. المواعيد طبعا اليمنية بالمواعيد ما شاء الله مضبوطة جدا تتأخر ساعة ساعتين ثلاث ولا بعض الاحيان تقرر تقلع أبكر بنص ساعة هذه بالذات لما تكون رايحة لعدن ولا من عدن راجعة لصنعاء..مدري ليش هذي يبكروا بها... احلى حاجة لما تكون مقرر تروح ماليزيا وفي نص الطريق يجي يكلمك الطيار سوف نهبط في مطار جاكرتا ..انت هذاك الساع بعد 7 ساعات سفر وانتظار 4 ساعات تكون قدك تشتي تقفز من الطيارة خصوصا لما تشوف بحقهم الشاشة ان الطيارة جالسة تمشي من فوق ماليزيا..ليش يا جماعة ليش غيرتوا رأيكم؟؟؟ يا يكونوا حابين يطلعوا شوية ركاب معانا أو واحد مسئول ما فيهش من ينتظر في ماليزيا قبل ما يروح اندونوسيا.. فوق الطائرة في حد ركز انه يمكن المطار الوحيد اللي عاده ينقل الركاب بالباص للطائرة هو مطارنا في اليمن؟؟؟ متى بيعملوا لنا الممرات اللي تخرج من الطائرة لا وسط المطار على طول؟؟؟؟ وعاده مفرحين تدخل موقع الهيئة العامة للطيران المدني والأرصاد وهم كاتبين يتمتع مطار صنعاء الدولي بأهمية إستراتيجية وطبيعية ..ركزوا "طبيعية" ويتميز بمكانة دولية كبيرة "هممممم؟؟؟؟" هو صالتين اقلاع وصالة وصول من فين له هذه المكانة كلها؟؟؟؟ انا متفق مع الطبيعية يعني عاده على طبيعته ارض منها 5 مليون متر مربع فاضية قاحلة مع حبتين حشيش ناشف وروائح الروضة العليلة....اسمعوني هاه نصيحة خذوا الفلوس اللي في بند المزايا العينية 148 مليون ريال والمليار ريال حق المكافأت و 28 مليون ضيافة (يا مجرمين ضيافة ايش لو تعزموا كل المسافرين شيباني كل يوم قاعتكم حق الدرجة الأولى فيها عصير يماني) و 345 مليون بدل السفر والاتصالات ( بتتصلوا لمين وتسافروا فين في السنة 345 مليون خافوا الله) والمستلزمات الخدمية الأخرى 288 مليون ريال (هي أخرى ايه ياعم) اجمعوا هذه المبالغ كلها واعملوا لنا مطار محترم هو مش مكلف يا جن هو الا هناجر كلها زجاج وقد معاكم الأرض 5 مليون متر مربع بتشطحوا فيها؟؟؟؟[1] كان زمان قبل ما نقلع وهم يجيبوا فلم السلامة في اليمنية كان يجي دعاء السفر..الان بطلوه؟؟ ليش يبطلوه؟؟؟؟ احنا محتاجين نتوكل على الله الان أكثر وقد عمر الطائرة أكثر من 15 سنة مع الصيانة ابو كلفته يعلم الله...وبعدين يا جماعة انا شاكة في موضوع سترة النجاة يعني يقولك تحت الكرسي انا مرة فتشت الكرسي وما حصلتهاش... أحلى حاجة لما يقولوا لك استخدم وسادة الكرسي للنجاة في الماء؟؟ يعني لو قد إحنا في النص بنفضي ندور وسادة الكرسي؟؟؟؟؟؟؟؟؟؟؟؟؟؟؟؟؟ الواحد ينسى روحه عاد إلا وسادة الكرسي.. لا الصدق سمعت خبر أنهم عملوا صيانة ثقيلة للطائرات لأول مرة من لمن جابوهم هممممممم ايش يعني ثقيلة؟؟ كان زمان يعملوا لها صيانة دايت؟؟؟؟؟؟ قده وقت توزيع الاكل انا اتعلمت إني ما أكثر الاكل في الطائرات تعرفوا ليش؟؟؟ لانه بعد الاكل الواحد يحتاج يروح الحمام ولما كل الراكبين يشتوا يروحوا الحمام ونص حمامات طائرة اليمنية خارج الخدمة مش شغالين والنص الثاني منتجع صراصير والنظافة ما شاء الله ..لا أحسن الواحد يصبر على الجوع ولا يضطر يعمل رحلة للحمام فوق اليمنية.. عملية التفتيش للشنط في مطار صنعاء عندنا عملية التفتيش للشنط ما زالت بدائية مين عاده يستخدم الطباشير؟؟؟؟ انا بشخط بالطباشير وبمسح وبمشي لي ...في الدول الثانية معاهم كلاب تتشمشم المتفجرات والمخدرات..ومعاهم آلات واختبارات يعرفوا لو بس هاه مشيت من جنب واحد معاه متفجرات..واحنا عفوا الطبشور هو الاختراع اللي نعتمد عليه... وما ظهر كان أعظم،،، [1]المصدر/ الحسابات الختامية للهيئة العامة للطيران المدني والأرصاد 2011 منزلة من وزارة المالية
