من شاف المحاضرة حق الدكتور طارق السويدان على التغيير والقيادة؟؟؟؟ المحاضرة كانت جدا جميلة وأتذكر أنه كان يوجه رسالة هامة إن إحنا في اليمن لازم نعمل خطط استراتيجية ورؤى مستقبلية لخمسين إلى 100 سنة لقدام..المهم وأنا بدأت أتخيل أن واحد طلع آلة الزمن (مثل عنابة) وراح لعام 2090.. يا ترى كيف بتكون اليمن في 2090؟؟؟ تخزينة القات: صاحبنا وصل لعند واحد جالس في ديوان لابس من ملابس المستقبل جنبه علبة تشبه ريد بُل بس ألوان أخضر وفضي ومكتوب فوقها قات بُل وجنبه كمان شريط أدوية... المسافر: السلام عليكم...ريحهممممممم المخزن: وعليكم السلام ....وهممممممم المسافر: ماسكة المخزن: ماسكة ونص.......حياك الله عندنا اتفضل اتفضل عاتخزن معانا اليوم.. المسافر: أنا بطلت أخزن... بس فين القات؟؟؟؟ المخزن: (يمسك القات بُل والحبوب) وهذا ما هو؟؟؟ المسافر مستغرب: إيش هذا؟؟؟ المخزن ياخذ رشفة قات بُل: هذا القات مالك؟؟؟ يالله خذ لك حبة معي هذه 500 جم تعطيك ساعتين تخديرة وإذا أخذت حبيتين 1000 جم بيعطوك أربع ساعات؟؟؟ كم تشتي؟؟؟؟ (ويأخذ حبة ويبدأ يطنن خارج نطاق التغطية). المسافر لنفسه: ليش أبو يمن بحاجة للتخديرة حتى لو كانوا في الفضاء... لا حول ولا قوة إلا بالله بس؟؟؟ المواصلات: المسافر يخرج يتمشى ويوصل لمحطة يكون في دبابات مطوبرة وتك تك ات جالسة تطير، وبعدين يقرر يطلع دباب ..قبل ما يطلع الدباب يدوا له هيلميت وفيست مضاد رصاص ويلونوا وجهه بالأسود ..وهو مستغرب.. المسافر: ليش ده كله؟؟؟ إيش بنروح نحارب؟؟؟؟ السواق: يا أخي إلبس بلا لكاعة..تشتي تودف مع شيخ وحقه المرافقين ودف لحالك بس إكتب لي تنازل عن حياتك ... المسافر: يعني عادهم ما خارجوناش من المشيخة ونخيط المرافقين ...لاحول ولا قوة الا بالله.. المسافر لنفسه: العاصمة الوحيدة اللي معباية سلاح..الجبال مليان معسكرات..النقاط تفتيش بالهبل..حراسة الجامعات تقول إلا بتدخل مفاعل نووي..تخرج الشارع الشيخ معاه مرافقين مدججين بالسلاح..التاجر المسئول باقي الشحات وإنها تكمل..الجماعة مش عارفين عزرائيل واجي لهم واجي المرافقين وسلاح أمة لا إله الا الله ما بينفعش.. نشتي دولة مدنية لكن من يفهم؟؟ هرمونا بغبائهم... فوق الباص: المسافر: إيش هذا ما فيش تطور بنظام الدباب عاده زيما هو.. الراكب اللي جنبه: حرام عليك يا شيخ ركز (ويأشر على سواق الدباب وقده يتصايح مع سواق دباب ثاني سرق عليه ركاب وخرج صميل يضوي زي حق ستار ورز وجالسين يتضاربوا هو والسواق الثاني بصمايل ستارورز وهم يسوقوا الدبابات) وبعدين الدباب الثاني فجأة ينبلع في الأرض. المسافر: ايش حصل؟؟؟ فين راح الدباب؟؟؟ الراكب اللي جنبه: أكيد عمل مخالفة والحفرة بلعته... المسافر: إيش من حفرة؟؟؟؟؟ الراكب اللي جنبه: هذا النظام الجديد بحفر أوتوماتيك بدل الحفر المانويل...الآن الشوارع لما واحد يسوق سريع تظهر حفرة أوتوماتيك تبلعه.... هذا أحسن من النظام القديم الحفر اللي قدهم داريين فين هي.... المسافر لنفسه: العالم المتقدم قد بيعمل دراسات كيف يكون ينتقل الشخص عن طريق الإنتقال الضوئي يعني الواحد يدخل جهاز زي الفاكس وينتقل من مكان لا مكان ساع الفاكس ...وإحنا عاد إحنا مستنيين السكة الحديد والقطار؟؟؟؟؟ الدباب مجنب وصاحبنا جنب الشباك يجي شحات ومعاه زي الآي باد الشحات: يا أخي جزع كرتك لله ..الله يرزقك ويزوجك جزع كرتك لله المسافر: إيش من كرت أجزع إيش؟؟ إيش من شحات معه آي باد؟؟؟ الراكب: يا أخي لا تكونش بخيل (ويمد كرته للشحات) يا أخي اخصم مليون ريال وادعي لي...(الشحات يعمل سوايب للكرت ويرجعه للراكب) المسافر: مليون ريال يا ساتر ليش كم صرف الدولار الآن؟؟؟ الراكب: انت من فين أجيت أكيد من القرية...إيش من دولار الآن فيه عملة اسمها الجلوبار ..العالم قد وحد عملته..الآن الجلوبار الواحد بمليون ريال ... المسافر لنفسه: فين الخطة المستقبلية؟؟؟؟ فين المعايير الدولية التنافسية؟؟؟؟؟ فين التجارة العالمية وفين الاستثمار الأجنبي المباشر؟؟؟؟ فين القضاء على الفقر ولا هذا يمكن قد قضوا عليه وثقافة الشحت نسوا يقضوا عليها؟؟؟؟ التعليم: المسافر يحصل نفسه جالس داخل فصل دراسي والطلبة من حوله والمعلم: المعلم (يتكلم زي مقدمة عدنان ولينا): اندلعت الثورة اليمنية الثالثة عام 2011 بقيادة المرأة الحديدة (يأشر على صورة توكل كرمان ببدلة أيرون مان) استخدمت فيها أسلحة بيضاء وسوداء بين الأطراف المتخاصمة كان سلاح المبادرة الخليجية يفوق في قدرته الأسلحة التقليدية ونتيجة لذلك حل الحاوار في البر والبحر وانقلبت محاور الجمهورية اليمنية (المعلم يبدأ يصيح فوق أحد الطلبة ليش مش مركز) المعلم: يا عدنان ركز ركز ويضغط زرار عنده فوق الطاولة تكهرب الولد شوية عشان يركز المسافر لنفسه: يعني التعليم ولا اتطور ولا شي مكانه تلقين والحاجة الوحيدة اللي اتطورت العقاب.. الماء: المسافر حميان وعطشان يتوجه لبقالة يشتي يشتري ماء في المستقبل: المسافر: واحدة ماء لو سمحت؟؟؟ البائع: (يخرج قارورة صغيرة جدا ساع صبعه ويقول): 3 مليون ريال المسافر: إيش هذه؟؟؟ تبيع لي دغمتين/رشفتين ماء؟؟؟ ب 3 مليون ريال؟؟؟؟؟؟ البائع: هذه الاسعار هذه الأيام وهذا مستورد من سعودستان بس صنع الصين؟؟؟ المسافر: ما هي سعودستان يا أخي؟؟؟ البائع: مالك من فين جيت؟؟؟ أكيد من القرية؟؟؟ سعودستان هي السعودية ودول الخليج الباقية قد اتوحدوا....قدهم دولة واحدة مالك؟؟؟ المسافر: وحقنا الماء فين راح والأمطار اللي تنزل تغرق الدنيا... البائع: كمل الماء الجوفي قبل 50 سنة ومياه الأمطار ما عرفوش يلفلفوهن سوى عملوا كم سد وبعدى لما غرقوا الناس فيه بطلوا يعملوا سدود لأنها خطر على المواطنين.... المسافر لنفسه: كم قد لهم بيقولوا صنعاء بتنشف صنعاء بيكمل الماء فيها .. والآن الأمطار ما شاء الله تنزل تنزل وإحنا نتفرج للماء يغّرق السيارات في الشوارع وكله يروح سدى... المخزن والكهرباء: يرجع المسافر لعند صاحبه المخزن في الديوان وفي التلفزيون يكون في دعاية لألبوم صباح الجديد .. جديد الشحرورة الفنانة صباح البوم اللي بيعمر شو بنقوله.... لا تفوتك الأغاني الجديدة...سلموا لي على سعودستان ...يقبرني الزوج ال25 على عينيه الحلوين...يادلع دلع ل2090 .. وبعدين يدخل إعلان جديد ألو ألو عايزين سمن الأيفون ذلحين... المخزن: فجأة يقوم من التطنينة ويصيح هاه عاد خزنت؟؟؟ المسافر: لا فجأة تطفي الكهرباء والظلام دامس ..ترجع تولع الكهرباء وبيد اللي كان يخزن ريموت.. المسافر: إيش هذا؟؟؟ المخزن: هذا ريموت الكهرباء لما تطفى من الخط الأول في الشارع الرئيسي أولع الثاني بالريموت المربوطة على الشارع الفرعي... المسافر لنفسه: انا أشتي اعرف الآن مشكلة الكهرباء دي الآن مش قادرين يحلوها ليش؟؟؟ يعني بتكاليف التصليح مش أسهل تنقلوا المحطة لا وسط البحر ولا لا رأس جبل وتخارجونا؟؟؟؟ أو طيب استلفوا سفينين توليد الطاقة حق تركيا بيولدوا 400 ميجا وات أكثر من محطة مأرب الغازية بكلها وخارجونا من لوك كلفوت رجاءا.... عودة المسافر: المسافر يرجع ويستنتج: يعني باختصار يا جماعة إحنا نشتي تغيير ثقافي جنب التغيير الاقتصادي والتنموي والاجتماعي...ما فائدة تتغير التكنولوجيا ومشاكلنا هي ذيك هي لم تنحل؟؟؟؟
