المستشفيات الحكومية في عدن ,حالها شمات في شمات ,وتجيب العمى والطراش ,ووضعها سيئ وتعيش للغاية ,تدخلها وكأنك دخلت (زريبة البقر ) او (سوق الحراج ) حق المواشي والخدمات فيها .... (على قدر فراشك مد رجلك ) .. اما المستشفيات والمستوصفات والعيادات الخاصة (اخس واضرط) .. لكن بعضها –وهذا للأمانة – تستحق الاحترام والتقدير والاشادة , من حيث النظافة والخدمات الطبية الي تقدمها للامراض – وان كانت اسعارها نار , واما عن (الصيدليات )المنتشرة في عدن كما جراد المطر فحدث ولا حرج عددها زايد على عدد سكان الصين من كثرتها وتحولت كثير من البيوت والدكاكين والحوافي والصندقات وشوارع بحالها في كافة مناطق عدن الى اماكن للصيدليات وبيع الادوية وكل واحد قام يركز له (برت)..وكل (تختر)يتحارف ويفتح جمب عيادتة صيدلية ..وهات ياكتابه دواء..وهات ياخريط بيس ومن معة شهادة (من حق الله طلبناك)فتح صيدلية تسال وين الرقابة ..؟يقًولولك ..باتحصلهم في (سوق القات )مخزنين من صبح الله ,كان معاهم اليوم (هبرة)..يابلاشاه..ياحراجاه..يارواجاه..تدخل الصيدلية معك (التختر)اللي عالجك..مكتوب فيها دواء(حق الحمًة)..تعطيك (الوليده)اللي في الصيدلية (شربة الملح)ولما ترجع لاعندها..وتقل لها وراش شوه اعطيتني من دواء ..بطني تمشي ..؟تقلً لك..تمام كان عندك (يبوسة) وشوه من (إمساك) ..؟اناراسي يوجعني..وديمي حامي يفور..عندي (حمًة)..طلعت لا مخيً وبركعتني بركاع.. شوفوا بالله عليكم قالت ..(يبوسة)..للاسف هذا حال كثير من الصيدليات التي تعمل في عدن,لاكن بعض الصيدليات -للامانة- للامانه فيها كفاءآت محترمة –كانوا نسوان اورجال-اما المستشفيات الحكومية تدخلها وانت تسير على ارجولك ويخرجوك (ميت) داخل (مجنز) .. لا اله الا الله ماباقي الا الله .. (ساني الى المقبرة )...بعدين انته وحظك , قد يلاقوا لك مكان للقبر وقدلا , لأن المقبرة تقول وضيقي ملانه ميتين , حتى الميت يقبروه ببيس , لاحول ولاقوة الا بلله , لنسان كان قبل قليل (حي )..دخل المستشفى برجوله .. ذلحين قده ميت , منوه لعياله وبناته من بعده ..؟ ويقلب المستشفى الى معزى .. وهات يا بكاء , وهات يادموع يكون عندك ضغط "دم " أو ارتفاع في (الشاهي ) – قصدي .. (السكر ) يعطوك دواء حق (البواسير ) .. شوه من (بواسير ) وشوه م (بوابير ) ..؟ حتى الي تكنس في المستشفى تقتلب (أردلية ).. ويخلوها تجلس عندك تشوف (الدريب ) .. وتقيس الضغط حقك .. وتفتح (حلقك ) وعيونك .. بعدين تقلك شي معانا (حق الصبوح ) .. والمسألة كلها اصبحت كلها معراصة ومعوالة , لاكان ابوه ولا أمه (مستشفى ) .. ولاكان جدات جداته (مرض ) .. يخلوك تدخل في غيبوبة في اليوم عشر مرات , وانته صحيح متعافي , ويموتونك فجايع انته واهلك وعيالك وحريمك وعز ما عندك .. , شوه هذه المصايب والبلاوي ..؟ الخدمات الصحية في عدن انهارت تمامأ وراحت فطيس , والمستشفيات الحكومية تشكي حالها لحالها ولا من يسمعها ووضعها مؤسف جدأ .. جدأ وتحت الصفر.. والنظافة فيها أسألوا (جدتي ) وجيوش الفيران والكلاب والنامس والبسام .. في عدن يقولوا .. (البسة ).. الي توكل وتشرب وترقد مع المراض فوق الفراش عيني عينك .. تدخل ببيس .. وتخرج ببيس .. وتخزن قات داخل المستشفى ببيس , ويقنعوك ان الناس ضباحى وبلا مشاهرة .. عادي عند الله مايضيع .. اعطيهم زايد ناقص , كل شي بأجرة اصبحت الامور كلها هبرو وأبتزاز وارتزاق , والله هذا عيب وجريمة في حق المراض لكن عند منوه باتشتكي يافصيح ..؟ مستشفيات زمان وين كانت لاتوصف ..؟ ومستشفيات اليوم شوفوا كيف اصبحت , (البيس ) اللي بتدفعها للعلاج في (المستشفيات الخاصه)..عليك ان تشل معاك ملان جونيه بيس ..كلهم بلالاف..تقابل(التختر)ببيس..يفتح حلقك ببيس..يدهف ببيس حديد داخل حنجورك او بطنك اوتحت (سرتًك)ببيس,ينحش ضرسك او ينفخ اذنك ببيس..يسجلون ويدخلوك ويخرجوك كلة ببيس,واخرتها يقلولك..الفحصوصات حقتك صافي,هب اتملس بسليط جلجل مع(حبة سوداء)-معناتة رجعنا للدواء العربي-مالة يا(تخاترة)..ماتقلولنا هذا الكلام من الصبح ,كنا بانهب عند(محمدعبداللاه)صاحب الاعشاب في الشيخ عثمان 'ولاهذا وجع القلب..والله لوكان الاطباء العضماء حقون زمان امثال..الشبوطي وصدفة وحرسي وحيدره عوض ناصر احياء ..لآمروا باغلاق المستشفيات والعيادات والصيدليات الهشتي البشتي اللي تعمل على طريقة شيري بيري..والامر مطروح على وزير الصحة والسكان د.ناصر باعوم..وانتة ياحليم افهم..!
