زمان لما كانوا يطفوا الكهرباء كانت خالة فاطمة تقول لنحنا ان الحكومة اكيد تهرب اسلحة او مساجين .. اما الان الكهرباء تطفي كل يوم وكل ساعة وكل ليلة .. لو رواية خالة فاطمة من صدق ان الحكومة تهرب اسلحة ومساجين فنحنا بكارثة .. لان ابسط مثال قبل ايام لما طفت الكهرباء ست ساعات يعني انهم هربوا مساجين غوانتنامو كلهم من عندنا واسلحة المافية الايطالية كمان اتهربت من عندنا .. وانت احسب عدد ايام السنة مع ساعات طفاي الكهرباء يخرج الناتج رهيب من عدد المساجين والاسلحة المهربة .. بس بصراحة انا الخبر دا ولا دخل مزاجي واحس ان خالة فاطمة كانت متأثرة باشاعات ايام الحزب اللي كان معتمد على نظرية الاشاعة بشكل كبير في سياساته .. اما الان لازم خالة فاطمة تفهم ويجلسوا معه عقال الحافة كميليا وسوسن وسعاد .. عشان يقنعوها ان حكومة الايام دي مش محتاجة لاشاعة الكهرباء عشان تمرر بقشة اسلحة ولا محتاجة للغدرة عشان تهرب المساجين ..
الحكومة دي تربية علي عبدالله صالح يعني يمشوا الاسلحة من فوقنا بكل وقاحة ونحنا نتفرج واللي مش عاجبة ممكن جدا يتحول لفأر تجارب ويضربوا عليه عينة من السلاح عشان يجربوا فاعليته انه يقتل وانه سلاح حقيقي مش مسدسات ابو مي .. وكمان لازم يقنعوا خالة فاطمة ان المساجين معد هلهمش بالسجون المعروفة وان الحكومة عملتلهم خنادق يمشوهم من هناك للسجون الجديدة ..الدولة ماعاديش زي اول ياخالة فاطمة تستحي من الشعب وتقول عيب في انتخابات واجبة لازم اصلح صورتي.. الحكومة اللي معانا موديل حديث حتى الانتخابات غيروها وقده لصالح ( وكيل حصري ) .. مع انه وللامانة الوكيل الحصري امس مزلي راسي لما قشع بالريوس الكبيرة بس ايش الفايدة اذا واحد زي مدير المؤسسة الاقتصادية لما اقالوه جابوا واحد اخس منه وعاده كمان سوالهم هوشلية واقتحم المؤسسه ..الله يستر الريوس الكبيرة ايش بيعملوا بالبلاد ..
المهم ياخالة فاطمة اقتنعي ان الكهرباء تطفي مزاج وتلصي مزاج .. وان الحكومة تمشيها عماسة .. بس حرام والله نحنا كمان مانقدرش الناس عندهم مشاغل هبشة وقليل .. اولا بيصلحوا الجهاز الامني اللي عاده بيد علي عبد الله صالح وبعدين الاقتصاد اللي بيد اهل علي عبدالله صالح .. وبيقلصوا الفساد اللي ربانحنا عليه علي عبد الله صالح .. والتعليم والسياسة الخارجية والصحة والاراضي والارهاب وكل حاجة خربه علي عبد الله صالح لما يوصلوا للكهرباء بعد عمر طويل وبعدين بيهتموا بالقضايا الاقل اهمية من وجهة نظر الحكومة زي التشجير والحدائق ورياض الاطفال والقضية الجنوبية .. بس اهم حاجة الان اقتنعولي خالة فاطمة عشان لما تطفي الكهرباء ثاني مرة ماتجلسش متشجنة على الاسلحة ولا على المساجين..
