الوه .. الرئيس هادي ..؟ كيف حالك .. عساك بخير ياحاج .. وفي صحة وعافية .. وعيد مبارك .. ويا حيا ومرحبا بك في عدن .. مدينة (( الزغار والكبار)) اللي للأسف أًصبحت ((مدينة أشباح )) .. والله نحنا في شوق كبير لك .. يا ((خو ناصر)) – الله يفك أسره هوه وصحابه الصبيحي ورجب .. والناس كلهم يبوا يشوفوك .. ويسمعوا صوتك .. كم لك غايب عن عدن .. ماعليش للظروف أحكام يا ((خو ناصر)) .. أن شاء الله تجلس في عدن كثير.. ونحنا نتابع أخبارك أول بأول . ولقاءاتك بالحكومة وبالمسؤولين التنفيذيين في المحافظات المحررة .. لكن يارئيس هادي .. تبا مني الصدق أو بن عمه ..؟ شوف الناس تعبت وملت من الكلام الكثير.. كل يوم تسمع من الحكومة مواعيد .. وفي النهاية الخبر كله يرجع (طيش فيش) .. يعني لعب وملعابة .. عدن ياحاج هادي .. تعيش أزمة كرهبة بحق وحقيق .. ولاينفع معاها الترقيع ((بالتا قة المشتراه)) .. والحل لهذي المشكلة العويصة .. بناء ((محطة إستراتيجية )) جديدة .. ((جرنتي لنج )) تطرم طريم .. لأننا بالأمانة والديانة رجعنا لمعراصة (طفي لصي) .. (لصي طفي) .. على ماتقول .. (حليمة رجعت لعادتها القديمة).. يعني يامعنى .. (لعبة الحنش ) مكانيه تفعل فعلها في الكرهبة .. كما تعيش عدن بكل مديرياتها .. أزمة ماي.. وأزمة نظافة .. وأزمة مجاري وبلاليع .. وانهيار في الخدمات الصحية .. والترقات مكسرة .. وأوضاع التعليم متردية .. والكثير من المباني العامة والخاصة وبيوت المواطنين .. مدمرة بسبب الحرب .. والملايين من النازحين من المحافظات الشمالية .. نزلوا لا عدن (لحم فوق لحم) .. فارين من الحرب اللي لاراس لها ولا رجول .. وعلى قولت المثل .. (أرحبي ياجنازة فوق لموات ) .. والأمن قدك داري ياحاج هادي (دبشة فوق دبشة ) .. هذا من هنا وهذا من هنوك وكل طرف معاه (سماية) .. من نفسه .. وان كان الامن تحسن قليل من يوم ماقع خونا (الميسري) نايب رئيس الوزراء ووزير الداخلية _ ربنا يحفظه _ الوه يارئيس هادي .. ياحاج .. الوه .. تسمعني ..؟ أيوه أٍسمعك .. تكلم .. واصل الكلام يالحجي دوخت بنا .. شوف يارئيس هادي نحنا نحبك ويشهد الله علينا والوطن .. نحنا بالأمانة وديانة سمعنا كلامك عندما التقيت بالحكومة في عدن .. وسمعنا تشديدك على الوزراء .. بالعمل من داخل العاصمة المؤقتة عدن .. وأن أي مسؤول عليه أن ينزل ميدانيا .. وأن يعمل من الداخل وليس من الخارج .. إلى هنا والكلام حقك مفهوم .. لكن يارئيس هادي .. هنوك وزراء جلوس ساطحين باطحين في الخارج.. و محسوبين على الشرعية .. وآكلين شاربين وساكنين هم عيالهم وعيال عيالهم ونسوانهم وكلابه ودجاجهم على حسابها يانعمة الله دومي_ والله يخليك ياحاج هادي_ وهاذولا الوزراء ولا لابوهم ولا لجدات جداتهم أي اهمية .. على قولت المثل حقنا .. (لاتشلوني ولاتطرحوني) .. بس ركبوا الموجه مع الحرب وقربعوا لهم قليل مع اللي قربعوا .. وذلحين جلوس (كوز في تاقة) .. ويانعمة الله دومي.. وهات يانثريات .. وياهبر.. ويابيس (سعودي ودولاراتي) .. والخدود كبرت وحمرت والبطون انتفخت .. والشغل كله (طيسي فيسي ) من حق الله طلبناك.. جزعوها وحزعت .. وذولا الوزراء معروفين وبالاسامي .. بس (خلوا التبق مستور) .. وأنته ياحاج هادي .. الامل فيك كبير .. لابد ماتفعل تغيير في الحكومة .. الناس ينتظروا منك (قرارات حاسمة) .. الوضع شوفه مصيري.. كما تلزم الحاجة العاجلة دمج كافة المسميات الأمنية في جهاز واحد تابع لوزارة الداخلية .. ومثلها في الجيش الوطني تحت مظلة وزارة الدفاع .. وتعيين محافظ لعدن بصورة عاجلة وسريعة .. وتعيين نواب وزراء بدال عن المستقيلين والمقالين .. عدن ياحاج هادي والمحافظات المحررة .. شوفها تبا شغل من صح وصحيح .. ماشي تبا لعب عويلة .. ونحنا من زايد على (خمسين سنة) مكانا في (شلة وحطة) .. لا أستقرينا ولا خلينا غيرنا يستقر .. دوب أمهاتنا في مشاكل وحروب ومقتالة.. ومن سعر كم بانتحمل ومن سعركم بانصبر .. الناس خلاص قدهم في (تب التب ) .. واملهم فيك كبير يا (عبدربه) .. أنته قدك (أمهم وابوهم ) .. والحليم تكفيه الأشارة .. الوه (هادي) تسمعني .. وإلا رقدت والتلفون في أذنك .. ؟ لا ..لا .. أسمعك .. بس يا (لحجي) جاني قليل نعاس .. أتكلم .. على ماتقولوا .. يالحوج أهرج .. خلاص ياحاج هادي .. إن شاء الله بعد ( النعاس ) ننتظر قرارات حاسمه .. مع السلامة ربنا يحفظك..!
