كثرت الخبابير .. وكثرت الهدره الزايد.. وكثر القيل والقال والتقوال.. أن ((البنك المركزي)) بعدن.. موقف الصرف والمعاملات الماليه من عدة أسابيع .. وأن ((التحالف )) في عدن أوقف خروج((البيس)) من ميناء عدن.. اللي جت من (( روسيه )) بلاد الرفيق ((لينين)) .. هذا اللي نسمعه .. ولا حد يعرف شوه هوه السبب.. وأم أمهات السبب .. وحتى هذي اللحظه لم يصدر أي ((توضيح رسمي )) ..لامن ((البنك المركزي)) ولامن ((التحالف)) .. ونحنا ولا درينا الى حدك والأن .. شوه هيه القصه .. وشوه هوه الخبر الصدق ..؟ ونتمنى من قلوبنا أن يكون هذا الخبر كذب .. طيب ونحنا شوه لأمهاتنا وجدات جداتنا .. من دخل في هذا الباب بكله .. – كان صدق أو كان كذب – العسكريين والمدنيين جلوس ساهنين للمشاهره من شهور.. وبعضهم من سنين ومنين.. ياخلق الله استحوا على نفوسكم قليل .. استحوا على عماركم .. ماله خلاص شكعنا .. ماله خلاص كلعنا .. ماله خلاص نكعنا .. ماله خلاص جوعنا .. ماله خلاص انقرضنا .. والله انكم بلا حياء كثرتوا بها .. محد عاد يقدر يصبر على هذي المسخره .. عيب عليكم خلوكم المعواله .. خلوكم المرزاله .. أصرفوا للناس العسكريين والمدنيين ((مشاهراتهم)).. شوفوكم كثرتوا باللعب والملعابه.. يبان عليكم تلاعبونا حنق((سته في سبعه)).. عليكم ماتستحوا .. على كيف أنتوا بتقودوا بلاد .. وكيف بتحكموا شعب .. وأنتوا ماتقدروا تصرفوا ((المشاهرات)) حقت الموظفين.. قدها ((باوله وبيستين)) ماشي تسقيك ماي .. وعادكم تفعلوا لها ((قاع وقرمباع)) .. تخضبوها وتنقشوها وتحنوها وتكحلوها وتمشقروها .. وتزفوها على مطربين ..سمعتوا بنا الناس اللي يسوى واللي مايسوى .. طيب ولشوه عادكم تطبعوا ((بيس )) في ((روسيه)) .. كلما جيستوا قليل جبتوا ((بيس)) ملات بواخربحالها .. بالله عليكم وين تهب .. كيه قلولنا ..؟ ولشوه جلوس ((ساطحين باطحين )).. في ((الرياض)) .. شوه معاكم.. عليكم ماتستحوا ..؟ مشاهراتكم ونثرياتكم .. كما ميزانيه ((عشر دول)) .. ومعاكم ((بوابير)) آخر موديل .. وآخر طراز (( مكينة قفا)) .. وحراسات وخدم وحشم.. ولابسين ((قمصان وعقالات )) .. وكنتوا تلبسوا شمزان ابو ((عشر بيس)) ومعاوز كار .. وتوكلوا ((برم لحم )) وكبسه سعوديه مع اللوز والزبيب والقرنفل .. ومندي وتمر من حق المدينة.. وتشربوا كل يوم (( ماي زمزم)) .. وهات ياسكيب.. وهات ياقريف من ((الريالات السعوديه)) اللي عرفها يفوح عود وعنبر .. ويانعمة الله دومي.. الله يخلي ((الملك سلمان)) وأنته ياموظف.. وأنته يامواطن .. يامسكين.. ياكلحان.. ياجيعان .. روح لك في ستين داهيه .. الله وكيلك..! طيب ذلحين تبوا مني الصدق وإلأ بن عمه .. ماشي هنوك عذر ولا مبرر .. ولا كيني ولا ميني لتأخير صرف ((المشاهرات)) حقت العسكر والمدنيين في أوقات كثيره .. يا أما تلتزم (الشرعيه ) بصرف هذي(المشاهرات) أول بأول .. وإلا تقول لنا .. إنها ماشي عندها مقدره تصرف المشاهرات .. وأن البلاد ماشي فيها أمان .. هكذا كلمونا بالصراحه .. ونحنا بنشوف لنا حل .. اللهم نجيب حتى ناس من (الصين) يشاهرونا .. أما نعيش حياتنا كل يوم في (كلع) .. وفي (سلف وديون) .. فهذا عيب ونقص في حقكم يا (شرعيه).. وعلى قول المثل .. (تف قال في اللحيه).. بعدين كل واحد بيعمل لنفسه (تريق) .. ماله يا(شرعيه) ماشي يقع هذا الخبر.. شوفوا (العسكر).. قد بدوا من الأسبوع الماضي يخرجوا في (مسيرات حاشده) .. يطالبوا بمشاهراتهم اللي ينتظروها من زمان الزامنين .. (جاك السيل واهارب لا وين الهراب ** لاتهرب من الوادي في الوادي ذياب – والله صدقت يافنانا الثاير محمد محسن العطروش أطال الله في عمرك- بعدين شوفوا ماشي عاد بيقع.. (عندالله وعندكم) .. ولا (ياأماه أرحميني).. لاجاك السيل أوبه لنفسك.. تحاووا المسأله من ذلحين وعادكم في النسم .. أصرفوا للناس (مشاهراتهم) بأثر رجعي حقت كل الشهور بلا تأخير ولا مماطله.. رمضان قده عند الباب .. كيف الخبر .. شوه الحل ..؟ خلونا نصوم كما الناس.. ونعيش رمضان بروحانيه وسكينه . . ونعيد بكبش .. بطلوا اللعب والملعابه .. قعوا مسؤولين بحق وحقيق .. عيب عليكم ماشي يقع هذا الخبر .. الحرب من جمب وأنتوا بهذلتوا بالمواطن من الجمب الثاني .. عسى الله كم هذا المواطن بيتحمل .. قده فوق ظهره(وقر حمار) من الهموم والمتاعب.. ومن المعراصه اللي تدور في هذي البلاد .. عند الله وعندك يا (عبدربه ) يارئيسنا .. وتاج راسنا .. احكم سوقك.. أمل الناس فيك كبير .. لايشوهوا بسمعتك ذولا (العويله الجهال ) في آخر عمرك.. وأنته إنسان مناضل وتاريخك معروف .. لاتخليهم يبهذلوابك.. (الأستقالات)) من جمب.. والفساد من الجمب الثاني.. شدها يا (هادي) شوفها تبان رابخه.. شوف وين العله.. هل في الحكومه ..؟ شوف كيف الخبر .. أنقف الفاسدين والسرق.. المواطن يا (هادي) يبا (مسؤولين نظاف) .. نحن نقدر مسؤوليتك الكبيرة .. ونعرف أن البلاد تعيش في حرب .. بس لازم .. من حلول للمشاهرات .. وهذي (بوسه ) مني فوق راسك يا (خو ناصر) ربنا يحفظك ويعطيك على نياتك .. طيب وأنا أكتب هذا المقال قبل يومين سمعت أن (مشاهرات المتقاعدين المدنيين) جابوها لا البريد.. وبعض الموظفين المدنيين أٍستلموا مشاهراتهم من مرافقهم بعد أن كانوا (فجاعى) عندما سمعوا أن (البنك المركزي) أوقف المعاملات المصرفيه .. وأن ((التحالف )) حجز ((البيس)) في الميناء .. بس الله .. الله .. يا(هادي) بمشاهره العسكر .. ومايفهم رطني إلا ولد بطني..!
