يا خلق الله .. خلاص نحنا بغرنا.. نحنا تعبنا وتنكدنا من الحال اللي نحنا فيه.. جوع .. طفر.. فقر.. شكع .. معانا حكومة من حق الله طلبناك.. شغلها كله(شغل روفلات).. كذب في كذب.. مدياسه في مدياسه.. وفساد في فساد .. جالسه تلاعبنا حنق .. كله هات جيب.. أطهش ألطش.. كما لعب ورق البطه .. (علام صفي الميدان).. الله يعلم وين تهب (المليارات)..؟ وعاده اللي يوجع القلب زايد وأزيد .. أن تحل علينا هذا (اليوم الحد).. ذكرى ثورة (أربعتعشر أكتوبر).. وحال المواطن اللي قامت الثورة منشانه.. في (جحر الحمار).. الزيادة (الثلاثين في الميه)عادها عند جدتي.. والله إن هذا عيب كبير.. زايد على شهر ونص من يوم ما صدر (قرار الزيادة) ..وأنته يا موظف (أطبر لما يجي الصراب)- والصراب معناته(الحصاد)- والله جينا عليها.. (يا دجاجة عمتي خربشي لش خربشي).. كله شغل.. (دحبشه خربشه دربشه) – يعني ملطاشه – ولا عرفنا وين الصدق من الكذب.. ووين ريوسنا من رجولنا .. سبحان الله الخالق الناطق .. خمسه وخمسين سنه من عمر ثورة (أربعتعشر أكتوبر).. ونحن مكانا – هنا في الجنوب – محلك سر.. ولا تقدمنا حتى (شبر) لا قدام .. سرنا في (تريق الاشتراكيه) وسقطنا على ريوسنا في (نص التريق) .. ودخلنا (وحدة العصيد والسحاوق) .. ورشنا فيها لما (الركب) .. ولا عرفنا عاد نخرج من حبال جدات جداتها لاحدك والآن .. الله يهديك يا (بيض) .. والله يهديك يا(هادي) .. الأول دهفنا فيها لما الدون.. والثاني ماشي راضي يفكلنا من أبهات أبهات أبوها.. بالله عليكم .. شوه لأمهات أمهاتنا نحنا من (الوحدة) ..؟ خلاص الناس في (الجنوب ) ماشي عاد يبوا (وحده)- يعني يحبني بالغصب ماشي يقع- واللي ماشي يعجبه الكلام يدق راسه في الجدار.. لا حد يكذب على هذا الشعب المظلوم الملكوم.. ولاحد يزايد عليه.. كلنا مناضلين .. وكلنا مخلصين .. وكلنا يحب الجنوب.. خلاص لهنا وبس كفايه.. هذا الشعب ماشي عاد فيه طافه يتحمل زايد على هذا الحمول الثقيل .. نحنا بنشتكي عند ثوره (أربعتعشر أكتوبر) .. وعند راجح بن غالب لبوزه.. مكانا في (حروب) .. طيب متى تقولوا بنرتاح..؟ واحد بجمبي قال (يالحجي في القبر) .. لاحول ولا قوة الا بالله.. ولا طعمنا ولا شفنا حاجه ولا تهنينا باللي جابته ثورة (أربعتعشر أكتوبر) .. حياتنا كلها هبت في صراعات و حروبات و مقتاله.. ونص المناضلين الكبار حقونا .. (جلوس (قسرا) في الخارج.. شوه هذا الكلام.. مناضلين من رجال الثورة الأولين.. ماشي يقدروا يرجعوا بلادهم..؟ يا باطلاه .. يا خزاتاه..؟ شوه هذا الكلام..؟ وشوه هذي المصيبه اللي حلت بهذي البلاد وأهلها..؟ طيب ونحنا ومنوه تبونا نحتفل بثورة (أربعتعشر أكتوبر)..؟ واحد كان جالس بجمبي قال: (اختلفوا أنتوا والجن والشياطين) .. والله جينا عليها.. وينك يا قحطان..؟ أسمع .. أسمع هذا الكلام..؟ ووينك يافيصل عبد اللطيف.. ويا (سالمين) .. ويا علي ناصر.. ويا علي عنتر .. ويا علي شايع.. ويا صالح مصلح.. وياسعيد صالح. ويا(مقبل) .. ويا جاعم صالح.. ويا علي سالم لعور.. ويا محمد على أحمد.. ويا أحمد مساعد حسين.. ويا جفري.. ويا عطاس.. ويا باعوم.. ويا عبد القوي مكاوي.. ويا أصنج.. ووين .. ووين والقايمه طويله..؟ هبوا (رجال الثورة) كلهم.. وجونا (عويله جهال) من حقونا أول أمس.. أمانه عليش(يا دجاجة عمتي خربشي لش خربشي).. خلاص بالله عليكم خلوا لنا حالنا .. نحتفل بعيد الثورة .. والريال حقنا في (البلاعة) .. والكيس الدقيق بعشرين ألف .. والرز بثلاثين ألف.. والكيلو الصيد بخمسة ألف .. والبترول ضايع.. والصحة تدخل المستشفى برجولك تخرج فوق مجنز.. والمشاهرة (عانه وبيستين).. وينك يا (راجح بن غالب لبوزه) .. يا أول شهيد(قرح البندق) يوم(أربعتعشر أكتوبر) من ردفان..؟ بالله عليك يا(لبوزه) أشهد عليهم .. (يوم القيامه).. إنهم باعوا مبادئ وأهداف الثورة.. ومعاها باعوا الوطن والشعب.. إنهم الانتهازيين .. صبرا يا(جنوب).. كل سنه وأنتوا طيبين..!
