قصة يرويها احد الناجين من مستشفيات عدن.. الزمان ..شهر ايريل الماضي المكان.. عدن بدا حديثه وعلت نظراته مسحة رعب.. لكنه في الوقت نفسه لم يخف فرحه عارمة بنجاته كفرحة ناج وحيد من مجزرة وحشيه.كتبت له حياة جديده اخرجته من بين اشلاء ضحايا المجزرة.. قال.. شعرت بارهاق ودوخه بعد سهر وعمل شاق. فقام مجموعه من الاقارب بنقلي الى مستشفى الجمهوريه بعدن.. نزلنا من السياره في حوش المستشفى ومشيت الى قسم الحوادث.. رحنا بعدها. لمقابله مناوب الحوادث.. وكان باين عليه ان عاده ذبل قات مدعس.. عرفت هذا من سؤ طباعه وتعامله. على طول.قال مريضكم محتاج عنايه مركزه وعندنا قسم العنايه معبى فل.. انقلوه الى اي مستشفى ثاني فيه عنايه مركزه. اصحابي افتجعوا. وبسرعه لفلفوا انفسهم وقدهم يتفرجوا قداي كانهم يلقوا عليه النظره الاخيره. طلعنا السياره. وفحطوا بالسياره.. قلت لهم مالكم الدنيا عوافي. انا مافي شي. وهم مخيم عليهم صمت جنائزي.. وصلنا احد المستشفيات.. ولسؤ الحظ كان فيه فراغ في العنايه المركزه.. المهم كلموا الطبيب المناوب بالقصه وانهم يحتاجون غرفه عنايه مركزه. الطبيب.. على طوووول هاتوامريضكم قالوا هو ذا المريض اللي واقف قدامك يالله بعدي.. مشينا بعد الطبيب. كنت قول لاصحابي ياجماعه الخير انا مااحتاج لعنايه مركزه يقولوا لي امشي.. ولا لك كلمه.. احنا باتدفع الفلوس اذا انته خايف تدفع انت. مشيت معهم. وصلنا باب العنايه المركزه قال الطبيب حط جزماتك جنب الباب بعدين دخلت مع الطبيب العنايه المركزه. طبعا عنبر فيه يجي عشره اشخاص مرضى. قال لي هذا سريرك.. تمددت على سريري. .. شويه واجت طبيبه. وجلسوا على طاوله يتكلموا.. واجوا لي. معهم معدات. لبسثنا قميص اخضر. وخلعت ملابسي. شوي ورجعوا.. يشتو يعملوا لي حفاظه وقسطره للبول.. قلت لهم .ايش في مالكم. قالوا لازم تعمل اللي نقول لك عليه ياجماعه مش محتاجها انا لما كون اشتي الحمام باروح الحمام .بنفسي. ذي الحاجات يعملوها للمريض اللي ماعد يقدر يقوم .او خارج وعيه. انا اقدر روح الحمام قالوا اي حد يدخل هنا لازم نعمل له كذا. وكلمه مني وكلمه منهم. اشتد الكلام. وحاولوا يركبو لي القسطره بالقوه.. رفضت وقاومت محاولاتهم. وحصلت مراجمه بقوارير العصير.. ومداهفه. ومداكمه. المهم تمكنت من النصر عليهم ودحرهم.. تخيل مريض عنايه مركزه يهزم اثنين اشخاص. خرجوا .شوي ورجعوا ومعهم ثلاثه اخرين. الان قدهم خمسه اشخاص.. يعني الجوله باتكون صعبه علي. هجموا علي. وحاولت صدهم .لكن مافيش فايده. وقلت في نفسي خايق لاعد اواجههم واهزمهم.. ويروحوا يجييوا باقي اصحاب الحاره يضاربوا معهم.. قلت ادحن الشيطان. المهم ربطوني بالسرير. ربطوا اقدامي. ويداتي . وربطوا على بطني بشريط عريض وربطوه بالسرير.. وركبو الحفاظه والقسطره.. الامر والخيره لله.. ماعد بقي معي الا العرعره. عرعر لهم.. بعدين شعرت انهم ربطوني ع شان ماهرب من عنبر العنايه. _ذلحين انت مسجون والا مريض؟ _والله ماعدنا داري.. كانوا اصحابي كل مايشتو يدخلوا عندي يمنعوهم. بعد يومين سمحوا لواحد يدخل. قلت له ياخي بجاه الله عليك خرجني من هنا.. وهو ساكت ولاكلمه. طيب لاعد تخرجني. بس فك الرباط وانا باخارج نفسي.. ولاكلمه..من صاحبي.. وبسرعه اجوا وخرجوه برع. بعد ثلاث ايام على ذا الحال. وفي مسا اليوم الرابع. بعد المغرب. يبان ان في مريض محتاج عنايه مركزه. اجوا لاعندي الاطبا قالوا خلاص بانخرجك من العنايه المركزه.. وبانوديك عنبر ثاني مع المرضى. امانه كانهم قالوا لي خلاص بانطلعك من زنزانه التعذيب وبانوديك الى عنبر واسع فيه مليان سجنا وباتاخذ راحتك. وانا قول في نفسي.. طيب ياعيال المنتخه المهم بس فكوني من الرباط بالسرير وبعدين باوريكم كيف.. خرجت معهم من عنبر العنايه على اساس يودونا غرفه ثاني.مشيت لغايه صاله قدام العنايه وحصلت عامل نظافه معه عود يمسح به الارض. قفزت واخذته منه. قلت والله يامن قرب مني لا اشرخ راس ابوه . وخرجت لابرع باب المستشفى.. شويه الا وقد صاحبي اللي كان مصر ان ادخل العنايه. قدهم يفارعوا بينه وبين الطبيب. طلع ان الطبيب بعد ماخرجت من العنايه. جاب الادويه اللي سجلوها لي. في اربعه علاقيات ملانه ادويه. وقال لصاحبي هذه الادويه خلاص مافيش داعي لها. بامكانك تعيدها للصيدليه. ويعطوك قيمتها. نعم انه يشتي يثبت له انه طبيب امين. صاحبي قفز ومسكه بحنجوره. طيب ليش سجلتوها له من اساسه. ثانيا . يعني اذا كان ماخرج من العنايه كنتوا باتكعفوها اياه كلها.. المهم رجعت بعدين انا فارع بينهم.. _طيب كلمه اخيرها تود ان توجهها .. والله اشتي انصح اي مريض بايودوه عنايه مركزه يكون ياخذ معه علاقي ملان قوارير عصير زجاجيه.. ع اساس انه بايشربها.. لانها باتنفعه في المراجمه مع الاطباء..ِِ
