كتب: خالد محمد شمسان صاحبي سالم رجل كبير في السن متقاعد ومتزوج وليس له اولاد ويسكن في الطرف الاخر من شارعنا وهو رجل فحاس من داخل قلبه كل يوم في مشكلة بسبب الفحس والفضالة التي اشتهر بهما .. ترك موقعه امام بيته وجاء مع كرسيه يجلس بجانبي تحت عمارتنا ومن يوم انتقل الى ملعبي وانا افارع بينه وبين الناس.. هذا الصباح مرت الحجة نوري من جنبنا واول ماقالت لنا صباح الخير نط لها سالم الفحاس قائلا لها : كيفك ياحجة مالكم امس ربشتم الحافة ربش زحمة وطماش ورصاص ايش كان معاكم زواج قالت : ايوه عقدنا لبنتي قال : من فين جبتوا هذا الزوج القاشعة ؟ شفته لما نزل من السيارة مخزن جنبين الله يهديك ياحجة نوري كنتي باتسألي نحنا.. الحجة اشتعلت واتشعتلت وصاحت فوق سالم : انت رجال ماتستحي على نفسك وتحسب الناس مشاطلين زيك وزوج بنتي هذا احسن واشجع منك ومن اهلك كلهم ايش تشتي منه رجال وبعده رجال لو بس اقول له حقك الهدرة البايخة هاذي بايجي يسنتفك سنتاف يامبعول.. قال سالم : انتم ماتحبوا اللي ينصحكم.. قلت له : مله مش كذا ياسالم تعرها عرور النصيحة تكون بالكلام الطيب المفيد قالت : قل له هذا الاهبل والله ان مايحترم نفسه بااخلي العيال يجوا يكسروا رأسه.. صاح سالم : على ايش يكسروا رأسي انت هبله وتحسبينا اهبل زيك والله اي واحد يقرب جنبي باارازع ابوه بالعصا هذه .. انا شفت الامور باتخرج عن السيطرة تدخلت وقلت : خلاص ياحجه نوري هذه المرة امسحيها فيبي وان شاء الله ماتتكرر .. قفز سالم يقول : عسى الله ايش سويت ذالحين انت ايش تخطرش ..قالت الحجة : قلت لك هذا مصيبة مايقدر يبطل الفضالة حقه.. قلت لها : خلاص انت روحي وانا بااتفاهم معه.. قالت : هيا مع السلامة واخالد قال سالم : طلعت بطل الفيلم واخالد ضحكت وقلت : مله ياسالم فحست الحجة فحس وعايبت على زوج بنته وماتشتيها تزعل.. جلسنا قليل الا وابراهيم الرديني جارنا في العمارة اجى من السوق يرشح وحالته حاله حامل حبه حبحب فوق ذراعه وكيس خضرة بيده الاخرى واول ماقال السلام عليكم قال له سالم : وعليكم السلام بكم الحبة الحبحب قال ابراهيم : خلي لي حالي ياسالم اروح الدنيا حمى وانا تعبان .. قال سالم : ذالحين انا ايش فعلت بك؟ انا الا سألتك عن قيمة الحبحبة قال إبراهيم : بالف وخمسمائة ريال ياسالم.. صاح سالم : زادوا عليك والله انهم زادوا عليك هذه ماتسوى حتى مأتين ريال صغيره مره ومهفسه.. قال له إبراهيم : خلاص يااخي مش شغلك انا مقتنع فيها .. قلت لسالم : ايش تشتي من الرجال يافحاس خلي له حاله يروح قال سالم : لو كانت من مأرب او احور بانقول عادي تستاهل لكن ذي يزرعوها في البساتين عند الصومال.. قال ابراهيم : يزرعوها عند مكلفك ياشيطان .. زعل سالم وقال : احترم نفسك وعيب هذا الكلام قال ابراهيم : والا ايش باتسوي يااهبل؟ والله احتراما لخالد بس والا بااقوم اشاطل بك في الشارع .. قال سالم : اتحداك ونط الى وسط الشارع ولوح بالباكورة حقه ابراهيم عند محاولته وضع الحبحبة على الارض سقطت عليه وانفجرت وتحولت الى قطع مرمية في الارض.. شاف ابراهيم حبحبته اشلاء قفز وهجم على سالم ومسك كل منهما بشميز الاخر وتدخلت وفارعت بينهم وصحت : ياسالم اسألك بالله تروح من هنا والا بانتقاطع انا وانت لفت الى عندي وقال : حنقت على صاحبك طيب ياخالد انا بااروح ومشى باتجاه بيتهم .. ابراهيم جلس يأخد افقاش الحبحب الى كيس بيده وقال لي : كله منك انت تجيب هذه القواشع الى عندنا هذا ماخلى عينا تنام فحاس وفضولي قلت له : توبة مابااسمح له يجلس جنبي ابدا من الصبح وانا افارع عليه.. قال ابراهيم : امانتك كيف شفت الحبحبه حمراء قلت له : ياسلام حبحب احمر حالي ذا وارد احور من هذا اللي يقدر يزيد على ابراهيم ويغشه . ابتسم ابراهيم وقال : والله انك خواض كبير ..ضحكت وقلت له : هيا طلعنا البيت ياصاحبي.. دخلت بيتنا وانا اضحك من داخل قلبي على عمايل هذا المصيبة سالم الفحاس لكنه بصراحة اعجبنا سلانا وجزع لي الوقت ..!! تعليقات القراء 484693 [1] ياعم خالد الناس بتخاف منك الخميس 20 أغسطس 2020 علاء | عدن لنجعلها بلا وصايه تجيب قصصهم واسمائهم الحقيقيه طبعا انا مااعرف سالم لكن ابراهيم الرديني الموظف بالجامعه (اعتقد انه على المعاش) هو جارك بالفعل بالعماره فوق مكتبة الشيباني المشهوره امام مسجد النور وحتمال سالم هو اللي معك بالصوره او ابراهيم بعد عوامل التعريه للشيخوخه لاننا اخر نمره شفته بالتسعينات استمر ياعم خالد الشمساني ولكن غيّر اسماء الشخوص حتى لاتلاقي بالعصا حق سالم 484693 [2] الحمدلله ان هناك ناس يخرجوننا من كلام السياسة الخميس 20 أغسطس 2020 علي طالب | كندا احسنت وحاول تستمر بالترفيه على الناس مثلي الذين اثقلتهم الاخبار المحبطة 484693 [3] من حسن اسلام المرى ترك مالايعنيه الخميس 20 أغسطس 2020 محمد العدني | اليمن صاحبك سالم متحانب وليس فحاس وكتاباتك حلوه تخرجنا من غثى انقطاع الكهرباء والماء
