مقهى شعبي لبيع الشاهي على الطريقة العدنية ، امياز و كراسي تتناثر امام بوابة المقهى ، الزبائن يملئون المكان ، اصوات الزبائن و المباشرين و قرقعة الاكواب بالسياسر : يصل 3 شباب يجلسون ويطلبون الشاهي : - الأول : بكرة لازم نغلق كل المنافذ والحوافي و الشوارع ، ولازم نستعد من ألان !!! - الثاني : ايوه العصيان لازم ينجح يا إخواني ،، - الثالث : طيب !! كيف بانقفل كل الشوارع و الحوافي و نحن مافيش معانا حاجة نغلق بها الطرق .... - الاول : عندكم دا الاهبل ايش يقول !!!! نعم هي عكارة . براميل الكداديف نسيتهم يا اهبل . - الثاني : ايوووووووووووووا الكداديف ننكبها لوسط الشارع و البراميل نسد فيها الطريق ( رجل عجوز يجلس بقربهم ويكون سمع الحوار الي دار بين الشباب ) - العجوز : ماشاء الله !!! ايش على معويلة معانا ، قالوا باينكبوا القمامة وسط الشارع منشان ينجح العصيان حقهم و احنا نمرض !! سوى و الله سوووى ! - الشاب الاول : من جاب لك المرض يا عاقل ، و ايش هذا الكلام الي تقوله ؟؟ - العجوز : الكلام هذا انتون قلتوه الثلاثة وانا كنت الا اتسمع ،، و قد كنت ما باتفاظلش ،،، لكن حرقنا قلبي لما سمعت انو تقفيل الشوارع و الحوافي مابيتم الا برمي الكداديف و البراميل ،،، منشان ينجح العصيان على قولتكم ،،!! - الثاني :: لحظة لحظة ياعاقل انت الظاهر لك موقف من العصيان و يبان مش راضي عنه !!؟؟؟ - العجوز : اذا بيقع عصيان بعمبصة شوارعنا بالكداديف و براميل القمامة ،، لا عاد كانه و لا كونه - الثالث : نحنا نستخدم الوسائل المتاحة ،، لإرغام الاحتلال على الرضوخ لمطالبنا ، و أيضا منشآن يسمع العالم صوتنا!!! - العجوز : تمام!!! إحنا معاكم و نؤيدكم ، بس اوصلوا اصواتنا بطريقة حضارية و متمدنة .. - الاول : بكيف يا عاقل منكم نستفيد ....؟؟ - العجوز : اولا حافظوا على نظافة مدينتكم وكنوا القدوة ، و انزلوا و بادروا الى جمع القمامات من الشوارع بدل طعفرتها بالطرقات !!! ثانيأً اكتبوا بطريقة متحضرة لوحات (( اكتبوا عليها عصيان مدني ممنوع حركة السيارات )) ،، و حطيتوا اللوحة مع حاجز صغير من الخشب وبرضة بطريقة متحضرة بدل هذه الرمم و الكداديف ... ( بصوت مرتفع ) أيه ياولد يامباشر !!! تعال شل فلوسك !! - الاول : اجلس يا عاقل مالك قمت ما خلصناش الهدرة معك !!! - العجوز : انا شربت الشاهي حقي ومعي مهرة باروح اسويها !!! و انتوا اجلسوا لكم لأنكم بلا مهرة
