غريب حال أطفال اليوم وهل هم حقاً أطفال، أم أنهم كبروا دون أن نأخذ بالنا ويجب علينا أن نعاملهم معاملة الكبار؟؟ وهل صحيح المثل اللي يقول (إذا كبر ابنك خاويه)؟ "وأيش حال أخوة هذه الأيام واللي الواحد يحفر لأخوة حفرة اكبر من حفرة الميت!! ويحانب عليه ويدق له مسامير ويجلس يدور له المشاكل والبعاسس... فيا ترى كيف بايكون حال الأب أو الأم لما يخاووا عيالهم ؟ وهل بايروح الاحترام والهيبة واللي المفروض تكون خط أحمر ؟؟" الكثير من أولياء الأمور يتعبوا من تربية أبنائهم وملاحقتهم ومحاولة النصح والإرشاد ويتعبوا من تمردهم وعصيانهم وفي الأخير يسلموا بالأمر الواقع ويقولك: "خليه يعمل اللي يشتي بايسكع رأسه وبعدين بايقول ليتني؟" ليش هذه السلبية والهروب من المسؤولية وفين حق الأبناء على الآباء ؟؟ وطيب يا أبناء فين حق أبائكم عليكم وإلا خلاص انتهت مهمتهم لأنكم كبرتم وما عاد في لزوم لأولياء أموركم ؟؟؟ هذا الأمر لا يخلو من التعقيد ويحتاج فعلاً نظرة بعقل وتأني للجيل الصاعد ومسألة أنهم لم يعودوا أطفال وإن كانوا مهما كبروا في نظر أوليائهم لازالوا صغاراً رغم إن الملاحظ فعلاً إن الجهال تحب تكبر قبل وقتها يمكن بسبب الجُرع اللي يلاقوها أو بسبب التطور الحاصل أو بسبب ضيق الوقت ويالله يلحقوا يكبروا قبل ما ينتهي عمرهم !! * خلونا نتكلم عن أجيال الغد ونبدأ أول شيء بالأولاد وآآآآآآآآآخ من أولاد هذه الأيام (ربنا يهديهم ويخارجنا من شرهم) الكل يعرف الولد وتحركاته وعدم استقراره داخل البيت أو خارجه والمشاكل اللي ممكن يسويها ويعمل منها في اليوم الكثير... وطبعاً أطفالنا مكانهم المفضل هو الشارع وكأن الشارع بيته الأول والأخير....!! ونحن نعرف ثقافة الشارع الراقية وأيش تعكس من تطورات وألفاظ متنوعة ... و لما تسمع ابنك يكرر ما يسمعه بالشارع وكأنه يردد النشيد الوطني سواء بمعرفة معنى هذا اللفظ أو بدون معرفة(مجرد تقليد) ومعظم ألفاظ الشارع تستحي والله وأنت تسمعها فكيف لما ترددها والطفل يبقى طفلاً ويبقى فهمه على قدره.. وثقافة التقليد لا تخلو من الايجابيات اللي حتى ما تُذكر، أما السلبيات فحدّث ولا حرج، فلما تشوف الجاهل يشتي يعمل صبغة لشعره علشان يشبه فلان أو فلانة ما تفرقش، أو يشتي يشتري سيكل مثل صاحبه وهو معه سيكل لكن يشي مثل حق صاحبه ويشتي تلفون ويشتي بنطلون أبو تفحيطة وأنا على ما أعرف إن التفحيط يكون بالسيارات !! وهاتلك يا خبر ويا طلبات ما تنتهي وتقليد له أول ما لوش آخر وكله تقليد أحول وياريت تلاقي منهم منفعة. ولما تسأله وتقوله: يأبني مش كذا وليش هذا ؟؟ وهذا ما ينفعش عيب عادك جاهل ؟ يصيح بالصوت:قدنا كبير أنا رجال أنا مش جاهل ..! وكأنك غلطت في بخاري ومسلم وما تعرفش أيش تسوي لابنك تضربه؟؟تخليه؟؟تتعامسه؟؟ وإلا يا رب اهديه ؟ وبعض الأحيان تسمع بعض أولياء الأمور يتكلمون عن أطفالهم كأنهم يتكلمون عن فيلم رعب؟ وتحمد الله بعض أحيان على جهالك وبعض أحيان تحسدهم على جهالهم.. وإلا لما تشوف قصة الشعر واحد مثل القنفذ ...واحد عامل دبة زيت لشعره.. واحد يسكب لشعره كندا... واحد صابغ له أحمر- اصفر ما تعرفش!! ولما يمشي ويتخايل كأنه واحدة لابسة كعب عالي ..ويلعص (يأكل) لبان مثلما .... وقالك جهال! ولما تجلس شلة الأصحاب بالحارة وأكبر واحد عمره ما يزيد على إحدى عشرة سنة وتسمعهم يتكلمون على فلانة حلوة وفلانة هذه حقي ما حد يقرب منها وإلا با يوقع دم للركب...وهذه مالهاش دخل ...و,,,و ... وتشوف السكاكين والخناجر بالجيوب والأيدي ولا تقولوا أبطال عصابات ... والواحد من هؤلاء الأطفال لو شاف أمه خرجت أو واحدة من أهلاته يقول لها كلام تقولوا إنه ولي أمرها !! ويقلب نفسه عبده الرجال ويفشر ويزنط زيادة لو أصحابه الجهال معه... وضاع سن الطفولة بين الشارع والرغبة في أن يكون الصغير كبير و نسوا طفولتهم وبدأ سن الشيخوخة في بداية الحياة...لما تحتار أنت في أيش من عالم ومع أي ثقافة وعقلية تتعامل؟؟ وهل هؤلاء أطفال وإلا فعلا الجهال كبرت؟؟
