سعيد أحمد منصر.. يرفض الحديث لأحد دون أن يعطيه فلوسا، وبعد أن تعطيه الفلوس يخرج عن حالة الصمت ويتكلم بكلام تارة يجعلك تظن أنه كلام معقول وتارة تجد أنه كلام مجنون.. حاوره: عبدالله حمود السلام عليكم يا حاج.. - وعليكم الصبوح ورحمة الله . كيف حالك؟ - مابش حالي.. به مر.. رحلك ما اناش حق هدرة. للمه مش انت حق هدرة، نشتي نتعرف عليك؟ - معك شيشه.. أشرب مداع.. هات حق الصبوح.. وانا عاد أجابرك للصبح. كم هيه حق التخزينة والدخان؟ - الرئيس هو داري كلكم سرق.. بطّل معراصة. ما دخل الرئيس؟ - أنا جاوع عازب بدون عمل.. حسّك تغلط الرئيس داري كم بالشعب شعر. بتخزن يومياً؟ - شهر في الأسبوع.. جعلّك العمى. كيف تشوف الأمور.. باتسبر؟ - آخرته مدري كيف عتقع لا الملكية سبرت ولا الجمهورية سبرت.. كحوله بيبسي كولا .. يماني أصلي.. وأنت أصلي والا تقليد؟ - الخبرة قتلوا شيخ بمأرب. قتلته أمريكا؟ خرج من الباب رجع من الشباك. أيش أسمك ومن أين أنت؟ - قلك اسمي سعيد، واليمن السعيد بأيش والله مانا داري مغلاطة حتى بالأسماء.. أبي طردني من عمران ليلة عرسي وما خلانيش أتهنى بالعروسة. ليش طردك أبوك؟ - قال عادنا صغير يربونه. كم عمرك؟ - 52 سنة غير الجُمع والعطلات.. وعادنا ماكبرت مكاننا مطرود. أيش رأيك بأوضاع البلاد؟ - الضحية هو أنا في الجمهورية اليمنية بكلها من الطرف لا الركن. ليش أنت الضحية الوحيدة ما عملوا بك؟ - قمت بالثورة اليمنية وحاميت عليكم.. شوف هذا الجرح اللي في ظهري سعمن هوه، هو من الحرب.. والمكافأة خرجوني من العسكرة وابي طردني ليلة عرسي.. كلهم قليلين خير.. ذلحين أين الطريق لعمران.. أيش رأيك بأوضاع الجنوب؟ - آح.. آح شوف الحوثيين قبل ما يموت الشيخ كانت الحرب تنتهي في أسبوع، والآن قدلها سنة وهي حامية ويرجعوا الذنب فوقي.. هيا بذمتك ما سوّيت. من هم اللي يرجعوا الذنب فوقك؟ - أبي وعلي سالم البيض. تعرف علي سالم البيض؟ - أعرفه صوت حين يتصل لي.. آخر مرة حول لي بألف دولار لكن أبي شلها عليا.. مش انا عارف ليش ابي متسلط عليا ولا أنا داري ما سويت له. وليش حوّل لك بألف دولار؟ - يتفاقد الضباحى لا هاناك لا هاناك. أيش انتماءك السياسي؟ - دبر نفسك ولا تركن على احد. من الذي أسس هذا الحزب؟ - أبي طردني قلّّي دبر نفسك.. ومن هاذاك الوقت وأنا أنتمي إلى هذا الحزب. سمعت عن أسطول الحرية الذي توجه إلى غزة يكسر الحصار؟ - قد ربّك سلّم.. أنا كنت معاهم وذكروني بالتلفزيون وينك راقد، ولما رجعت صنعاء قابلني الرئيس. وأيش رأيك بالحرية؟ - حبوب حبوب لا تغضب. والحب؟ - جعجعة من شارع لشارع. أيش اشتغلت بداية حياتك؟ - كنت تاجر كبير ضماري يقع مليون دولار لكن النسوان طيحيني.. صنعاء اليمن حالية. أيش سوين بك النسوان؟ - كانين يعاكسينني وأنا اتبعهن لأني كنت في شبابي وسيم وشقي وبعدما أتبعهن يضحكين عليا ويشلين مني اللي يشتيين وما عاد أدراش أين سارين لوما حيرفت. طيب هذا العمل هو عيب والا ماشي؟ - نسوان زمان متواضعات يكلمين أي واحد أما الحين ما تكلمش الا واحد بس وتتعامل معه وتظهر للناس أنها الحاج سعد. بتشاهد مباريات كأس العالم؟ - هذه حركة سياسية قامت بها أمريكا واسرائيل من شان تلهي العالم وتشل كأس القهوة حقي وأرضيتي اللي في عصر. أيش من منتخب تشجع؟ - صنعاء القديمة وبعض الاحيان بني حشيش. أيش هو أفضل شيء عندك؟ - شارع القشلة في عمران بيقع زلط هاناك للرقبة. أين تتمنى تسافر؟ - أهم شي أخرج من اليمن.. والا أقلّك حاجة.. ما بش أحلى من بلدك حتى ولو هي جور عليك.. بس جنِّب لي عندك. أين عاتسير بعدما أروح من عندك؟ - اسير اخزن وانسى اصحابي. من هم اصحابك؟ - كم يا جن كلهم اصحابي يدورولي بالسراج يتمنوا أجي أخزن عندهم.
