أنا شيخ النكد.. وأنت دوس بعد عملك. للمه.. أشتي أتكلم معك؟ مابش عندي كلام الحياة نكدة وزوجها طافش.. مابه الا جارتها هايلة والباقي كله هدير من شيخنا إلى عند بوباما. من هو هذا بوباما؟ هذا رئيس بيت غفر وبني عرجله. طيب قلنا ما أسمك؟ المنحوس.. المدحوس.. دحان المهووس. ليش لقبوك بالمهووس؟ خلقت قبل آدم على ضوء فانوس. كم عمرك؟ مابش معي عمر.. قدنا منتهي. أسمعك تتكلم مع حالك من بتكلم؟ هذه حفيظة كودها بتشغلني يوميه تشتي البصاير والضمانة وتشتي تتمشيخ علينا، قليلة حياء . من هي هذه حفيظة؟ هذي محفوظة حقكم بترسلولها لا عندي ورجعتم تتمعرصوا أو مه.. يالله قوم اقلع. طيب أحنا آسفين.. بس قلي البصاير اللي تطالبك بهن محفوظة حقنا ما هن؟ وأنت مادخلك سير اسأل حفيظة البغيضة وقعت المشكلة بينها هيه والشيخ شطفة لمخة سجلوني غريم. أيش المشكلة اللي بينها وبين الشيخ؟ وأنا مادراني.. فوق البودي من نازل. طيب أنت كنت حاضر؟ كنت حاضر ومهلنيش وراس حفيظة جعلها سمي. يا خبيصاه .. أيش رأيك بالجنان؟ الجنان الجنان والهدرة بشعبان.. من هم الي بيمنعوك من الهدار؟ من سمعني يتضايق ويقول مجنون. وأنت صدق مجنون؟ هو هذا اللي عايزعلني منك حرام ما عاد أزيد أحاكيك. لا تصدقش أمزح، أنت أعقل مني ومنهم .. قلي أنت مزوج؟ كنت اسمعهم يقولوا زمان. طيب أين هي زوجتك الآن؟ في بيت أبوه حنقت وبعدين طلقوها أهلها. ليش طلقوها منك؟ قالوا قدنا مجنون وأنا صدقني أعقل من أبوها بخمس سنين. معاك منها أولاد؟ ولد وبنت وشيبه وسارق. أيش اسم بنتك وابنك؟ هم سموا أنفسهم ما أذكرش نسيت. طيب بتشوف أولادك؟ مدري أنا طلقت أو ماشي شفتهم إلا مرة واحدة وهيه. طيب أيش كنت تشتغل من أول؟ كانت معي ورشة سمكرة عبدالحليم حافظ، كان يجي يصلح سيارته عندي زادت مرة أداها وقد الصندوق مبنشر .. تسمع أغاني عبدالحليم حافظ؟ هو ما يطلع أغنيه إلا بعد ما يستشيرني نسم الهواء من تحت الكفر والتيوب.. طيب أيش رأيك نتكلم في السياسة؟ السياسة تخلي وجه الواحد ملون شعره أصلع سعما الجن. أيش رأيك بما يحدث في الجنوب؟ الجنوب والصغير والكبير والفاصولياحقي . ايش أحلى حاجة تحبها؟ المزمار.. زيادة إذا معي شمة يقع يوم نوري على كيفك. تعرف ترقص على المزمار؟ بين أتغشش من صاحبي اللي بيرقص جنبي.. أيش رأيك نطلعك في الصحيفة؟ وبعدين من عاينزلني ..