الأب يجوز تغيير اسمه إذا هو عاصي .. لكن الأم ماشي زواج المسمار يشتي فراش ومدكى ودخان كيف حالك؟ - الحالي غالي وانا عادنا جاهل. ما اسمك؟ - تقدر تقول عبدالعزيز ناشر أنعم. وأيش لقبك؟ - يالله على ايدك لقبنا ولقمنا. من أين القرية؟ - الأغابرة - حيفان.. الأعبوس. والعمر كم؟ - 23 سنة..مع الخوراجة. متزوج؟ - قلهم عادنا قاصر. متى باتكبر؟ - البيس تكبر وتصغر .. كمّا وقع. درست؟ - لثاني إعدادي وتخرجنا.. والشغل؟ - المنجرة حق العويلة كملت الزلط والزلط كملت المنجرة وزلج ابو الليم. من هم العويلة؟ - ابن الشيخ ابن الوزير ابن الرئيس ابن المدير .. وانا مادخلي بالهدرة حقك. من يصرف عليك؟ - من عاد ابوه لا يهمه. أمك عائشة؟ - عائشة وقبول وفاطمة زعلان عليها وعلى نفسي.. كنت أحبها.. طيب أنت متحزب؟ - المرأة تحب الرجال عيب لا تتدخلش. ليش؟ - أبي مطوع وإمام جامع.. وأيش رأيك باللقاء المشترك؟ - مثلي ابن طايع لامه. ممكن تدرس من جديد؟ - ثاني إعدادي حقنا سع جامعة من حق اليوم بس ما فيش معي شهادة. اطلب وساطة واشتري شهادة؟ - الفضالة تشتي زلط ومغالطة شور وقول. ما هي المواد الدراسية اللي تحبها؟ - الغاز والقمح والسكر والرز .. لو معك مليون ريال أيش باتعمل بها؟ - با خزن بأبوها وبا آكل واشرب والباقي باخبيها عند ارجلي لبعد بكرة مصاريف. أكيد با تخبيها على شان تتزوج؟ - عندي حوالة الليلة.. أشتي جنية من حق تعز. ليش من حق تعز بالذات؟ - المعهد السويدي بمدرسة عمار ابن ياسر راقد وموضوع الإمام والمملكة المتوكلية حقه الركن تمام.. .. قلي ما رأيك بالجرع وارتفاع أسعار الديزل والبترول؟ - وزير النفط من طرف الجماعة معزوم على حسابي. أقصدلك أنت مع غلاء الأسعار؟ - ماهوش عندي كل واحد يبيع البضاعة حقه بريال سعودي. سافرت السعودية؟ - أيوه رحت مرة السعودية رجعونا بدون سفر.. أيش دراك. كم خسرت حق المواصلات؟ - 200 سعودي و36 يمني، مشقاية عمري كم خسرت.. أنت خسران وأنا طفران. والقرية تسافر؟ - القرية في مشاكل على شان الدراسة.. رحنا نشتغل عند الناس لقينا قشط سابر.. أيش أشتغلت؟ - مجنانة.. مكنونا ألبس إخلع.. اخفع اندع ولا اشتريت حاجة.. بيع نصيبك من الأرض اللي بالبلاد؟ - قا بعناها زمان ب 25 ألف.. جزعنا أبوها قات وسيجارة ورجعنا سحببة .. ترقد عند أبوك؟ - دكية وخزانة أينما كانت.. لو به معي بيس باشتري لوكندة وإلا فندق واعزم المجانين يرقدوا عندي. تجوع بالشارع؟ - لا به قات أرتعي من الظهر لليوم الثاني.. والجوع وقت العصر وإلا المغرب بلا عشاء. والصلاة متى تصلي؟ - أصلي قدام أبي النصارى تقاليدهم وحدهم.. الأب ممكن يحبس الابن.. قد أحتبست؟ - أحتبست زمان يوم 96م.. على أيش احتبست؟ - ماناش داري أبي حبسنا .. أكيد كنت عاصي وضربت أبوك؟ - لا لا بيع وشراء غيرت اسمه.. ليش غيرت اسم أبوك؟ - ما اعجبناش.. في معي شهود. بطل جنان.. كيف غيرت اسم أبوك؟ - بعدما فكوا لي خرجت بطاقة باسم أب ثاني.. كيف باسم أب ثاني؟ - اخترعت اسم جديد (شنمازح وشنخبي البطاقة) وبعدين كشفونا ناس.. مسكونا وقاموا حبسونا وانا اتكلم بشرف. أيش سميت نفسك بالبطاقة؟ - أول شي أنس عبد العزيز ناشر.. عملت اختراع وبعدين سميت نفسي أنس سعيد صالح.. وكم حبسوك على هذا الاختراع؟ - العالم يكافئو المخترعين وهاذوم حبسونا شهرين فوق البلاط. قلي بصراحة ليش غيرت اسم أب ثاني؟ - ما أخليش الأباء يسمونا كيف هم بس واحنا ما نسميهمش. واسم الأم غيرته؟ - المحدث بالتلفزيون يقول أمك ثم أمك.. ما قلش أبوك ثم أبوك.. الأب يجوز تغيير اسمه إذا هو عاصي. تشاهد التلفاز؟ - أسمعه بالشارع عبر الجهاز مباشرة. كم فلوس تحتاج على شان تصلح وضعك الاقتصادي؟ - أحتاج لورقة دولارات خليجية وأنا باصرفه عند صراف بدون بطاقة، أشتي اشتري قالوا مافيش.. ليش ما فيش؟ - طلعت عندنا زائد بثلاثة مليار مع جابيش بعدين حوشت. كيف حوشت؟ - قلت أين أطرح البيس عند أبي وإلا عند أختي، لو في فلوس ما بآخذهاش.. باكشحها بالمخبأ داخل الدرج. ليش تشرب سيجارة كثير وتلصي الثانية من الأولة؟ - ما فيش معي كبريت كله شمع ولا عيد ميلاد.. متى عيد ميلادك؟ - أمس واليوم وبكره تعال وجزعت لي معك هدية.. متى كان عيد الوحدة؟ - لما آكل واشرب وأخزن هذي السنة على حساب حمادي صاحبك. أيش تطلب من المعارضة في ظل الغلاء المتزايد؟ - يندولي بيس.. أهم شيء البيس إذا في بيس ما تسبرش البلاد.. افتح شريط بالمسجلة. أيش من شريط تشتي؟ - منوه قلك.. راشد الماجد البرتقالة .. من أين أجيت أنت؟ أنا أطلبك من قبل أسبوعين.. قلي تحفظ موالد خاصة برمضان؟ - زادوا عليك.. مو شفتنا فقي أنا لا اترعويت ولا رعيت غنم. أيش هي أفضل وظيفة عندك؟ - كلهن ملاح.. الاقتصاد أزمة.. أيش هي الأزمة الاقتصادية؟ - إذا في زواج وعرس ونكاح وجهال وفلوس موعاد باقي الكدافة على طول. سمعت بزواج المسيار؟ - زواج المسمار حق المسدس والدخان.. في رائحة دخان حق مسدس.. (يريد أن يمشي) أقلك ما في لا دخان ولا مسدس.. أجلس خلينا نكمل الحوار؟ - ما فيش فراش، جزع لي فراش وبطانية ومدكى بدل حق المطعم.. أشتي مخدة ووسادة وملابس داخلية شوقع ثاني. تصوم رمضان؟ - أبي يصوم رمضان ورجب وشعبان يصوم لي وله.. يتعب نفسه.. يا جناه خلاص يكفي أحس بضغط على الرقبة. من فين يأتي الضغط؟ - من الأشعة.. البلاد أي حاجة تقرع نار.. مو شتعمل؟! شاصورك.. - لا تصورناش وقف أنا مبهذل.. بسك خلاص صورتين تكفي.
