* * * * السلام عليكم ورحمه الله وبركاته أشكر اولا ً أسرة موقع " بص وطل " أرجوا من حضراتكم أن تنصحونى إلى الوجهه الصحيحة عندى 18 سنة و حصل اننا زرنا ناس اقاربنا من فترة " من كذا شهر كده " و هناك اتعرفت على واحد قريبنا اكبر منى ب 3 سنين , شاب محترم وكويس اوى , هو قريبى من بعيد شوية , ومن ساعتها وهو بيكلمنى على الانترنت بشكل شبه يومى تطور الى انه بقى كل يوم . انا بكلمه بكل احترام وزى اخويا الكبير .. بعدها بحوالى 3 او 4 شهور من الزيارة ديه قالى انه بيحبنى وانه عاوز ييجى يتقدم ويخطبنى واتكلم مع اهله من غير ما يقلّهم هى مين وهما قالوله انت لسّه بتدرس ومينفعش تتقدم لبنت وانت لسه معندكش اى حاجة . هو فى 3 هندسة وعنده شقة موجودة ومش عنده جيش . قالى كده وانه مش هيقدر يعارض اهله وفى نفس الوقت اهله عندهم حق . قالى انه مستنى يخلص الكلية وييجى يتقدم على طول ويخطبنى وعقبال ما اخلص الكلية بتاعتى نتجوز المهم انه لما قالى كده ومن البداية اصلا قولتله انى مينفعش اكلمه كده عشان مكونش بعمل حاجة غلط من ورا اهلى وان كلامنا مش هيتعدّى حدود الاقارب لحد ما يخلّص. ومن ساعتها وكلامنا عادى جدا . بكلمه اصلا والله على طول بكل ذوق ومفيش فى كلامنا اى حاجة وحشة ولاهو بيقول اى كلام مش حلو . بابا وماما عارفين انى بكلمه , عشان احنا قرايب وعادى يعنى .. بس مقولتش لأمى انه قالى اى حاجة من الحاجات ديه .انا بحبه وشايفه فيه انسان كويس اوى وهو بيحبنى . وشايفة فيه فرصة كويسة برضه انا كده صح ولا غلط ؟ ولا ديه فترة مراهقة انا عايشة فيها وهتعدّى ولا ايه ؟؟ مش عاوزة اكون بعمل حاجة تغضب ربنا او مش بحترم اهلى . هل من الاحسن انى ابعد عنه خالص ومنتكلمش اطلاقا ولا نتكلم فى حدود القرابة .؟؟ لحد السنتين دول ما يعدّوا ويتقدم ( وهو عرض علىَّ برضه نفس الكلام ) أرجوا الإفادة .. وجزاكم الله خيرا ً . صديقتنا العزيزه الحب هو ذلك الشعور الذي يدخل القلب دون استئذان ، فحافظي علي هذا الحب العفيف والشعور النقي ، هذا الحب الصادق الذي لا يشوبه اي كذب او تلاعب بالمشاعر ، ولا مانع في الحديث معه في نطاق القرابه ولكن ذلك بعد ان تصارحي والدتك بأن هذا الشاب يريد ان يرتبط بك ولكن الظروف لا تسمح له الآن ووضحي لها ظروفه ، ولا يوجد خطأ في الحديث معه ما دام الكلام لا يخرج عن نطاق القرابه ولا يخرج عن حدود الادب والاحترام واتمني ان يبارك لكي الله في حياتك ويجعله زوجا لكي في المستقبل ويتوج هذا الحب الجميل بالزواج ان شاء الله مواضيع متعلقة بص وطل
