انا خاطب من سنتين ونصف وسافرت بعد الخطوبة بثلاث شهور وكنت انا وخطيبتي في الاول اتصالات كتير ورسايل لحد بعد ما سافرت بحوالي 7 شهور وابتدا البرود من عندها , لمتها كتير على كدا قالت دا طبعها قلت مش مشكلة خصوصا اني عارف اهلها ناس بالهم طويل فقلت يمكن موضوع البرود وراثة واستحملت عدم اهتمامها مع انها وعدتني كتير تتغير بس محصلش اي تغيير ومع مرور الوقت وزيادة عدم اهتمامها ومع اهتمامي انا بكل حاجة تخصها استغربت وقلت يمكن دخل حد تاني حياتها سألتها بطريق غير مباشر بالكلام عن حالات مشابهة وكان ردها يدل على ان مفيش حد تاني يمكن السفر والبعد السبب , من فترة قالت لي انا زهقت من التليفونات عايزة اعيش خطوبتي زي البنات مع ان فاضل على نزولي وجوازنا تقريبا شهرين ان شاء الله , قولت لها اصبري فات الكتير , اتصلت بيها في الفترة الاخيرة في اوقات متأخرة وكذا مرة الاقي التليفون مشغول وكل مرة تقولي واحدة صاحبتها , اخر مرة كلمتها مكناش كملنا نص ساعة لقتها بتقولي عيني بتقفل يعني عايزة تنام وقالت خلينا نتكلم بكرة قلت مفيش مشكلة وقولتلها لو مجنيش نوم ممكن اتصل عليكي وقفلت وبعد ربع ساعة من المكالمة رنيت عليها مردتش فقلت تبقى نامت ومعايا تلفون ابوها قلت ارن عليه اسلم عليه لأنه شغال باليل لقيت التليفون مشغول قلت ارن على الخط التاني لأنه معاه خطين لقيته مغلق استغربت لأن ابوها المفروض مركب الخط المغلق وشايل التاني (المشغول ) في البيت فشكيت انها تكون واخده الخط التاني ومركباه في عدة تانية وبتكلم وبالصدفه كان اخوها قاعد علي النت فسألته عن تليفون ابوه مبيردش عليه ليه ومديني مشغول قال ابويا سايب التليفون في البيت المهم فضلت طول الليل دماغي تودي وتجيب لحد الصبح لقيتها بتتصل عليا بدري وبتقولي ايه اللي حصل انبارح امي بتقولي انك كلمت اخويا على النت وسألته عن تليفون ابويا فقلت لها اللي حصل قالت التليفون كان معايا وكلمت واحده صاحبتي ومردتش على رناتك لأني مش عايزة اعرفك عشان متزعلش اني قلتلك هنام واتكلمت بعدها وعشان كدا اتكلمت على تليفون ابويا عشان انت متعرفش , الصراحة الحركة دي خوفتني منها قوي بس اتصالها عشان تفهمني ريحني شوية بس المشكلة انها في الاخر قالت لي متقولش لخويا حاجة انا هحكيله عشان ميزعلش لأنها خافت اني اشكي لأخوها من الحركة مع اني عمري ماهعمل كدا , المهم حصل شوية زعل لأنها حست اني مبثقش فيها فقالت انها هتقفل التليفون باليل عشان انا مشكش في حاجة بس انا قلت في نفسي ماهي ممكن تشيل الخط وتشتري خط تاني وتتكلم وطبعا الشيطان اشتغل في دماغي وصورلي انها اكيد بتقعد طول الليل تتكلم مع واحد وانها يمكن بتقابله والشيطان ميتوصاش في الوسوسه وتلبيس المسلم في الهم والغم وكنت بأستعيذ بالله من الشيطان والوساوس بتزيد لحد ما وصلت لحالة من التعب تصعب على اي حد من الوساوس على الرغم من ان خطيبتي من نفس شارعنا واخواتي رشحوها لي على اساس انها متربية وانا اعرف امها ست محترمه جدا وفي حالها وعايشه مع القرأن على طول بس الوساوس مش سيباني في حالي والجواز مبقاش عليه غير شهرين تقريبا فهل افكاري دي مجرد وساوس ولا انا مخدوع وايه اللي يخلي واحدة تتجوز واحد وهي في بالها واحد تاني وهل يمكن لبنت تكون بتحهز لفرحها ومتحمسه لأختيار العفش على زوقها زي خطيبتي هل يمكن لها انها تكون مشغوله بحد في الفترة الحرجة دي برجاء من حضراتكم الرد الشافي لأني خايف اكون ظالمها ومش عايزها تكون بتخدعني وللعلم انا طبعي في الاصل شكاك جدا فهل دا ممكن يكون له دخل في حالتي دي واخيرا اسف على الاطاله صديقنا العزيز أخي الكريم أعتقد أن السبب الرئيسي في فتور العلاقة بينكما هو البعد ، خاصة وأنك لم تقضي معها سوى فترة قصيرة جدًا كانت غير كافيه لنمو المشاعر بالقدر الكافي ، فالتمس لها العذر فهي مثل باقي البنات تريد أن تعيش فترة الخطوبه التي كانت تحلم بها وبعد أن ذاقت لذة القرب جاء البعد ليولد الجفاء فلا داعي لكل هذه الأفكار التي نشاهدها في الأفلام ،ولا تفترض أشياء من خيالك وتبني عليها ، فأنت من أجبت على حيرتك بحديثك عن أنها حريصة ومهتمه بأدق التفاصيل في البيت الذي سيجمع بينكما، فلما هذا الحرص من جانبها لو كان الأمر لا يهمها ويوجد شخص آخر في حياتها استعيذ بالله من الشيطان الرجيم واغلق هذا الباب الذي سيكون سر عذابك، وينغص عليك حياتك ويفسسد أي مشاعر جميلة. تقرب أكثر منها وعزز الثقة بينكما وليكن شعارك الحب والمودة والرحمة تجني سعادتك وسكينتك كما قول الله تعالى"(وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآَيَاتٍ لِقَوْمٍ يَتَفَكَّرُونَ) بص وطل