تركيا يابو كرامة سوت باي باي لكرتون الكتب اللي يتحتّله الطالب على ظهره تقول كيس سمنت, وعطوه لوح صغير حبّوب يسمونه آي باد فيه العالم كله مش كتبه بس, وسموا برنامجهم ب(الفاتح) يشمل (15) مليون طالب. وفي ماليزيا فتحوا ( المدارس الذكية ) ودخلوا الكمبيوتر والإنترنت في كل مدرسة، ووصلت نسبة المدارس اللي دخّلوا لها إنترنت عام 1999 أكثر من 90%, وسوت ماليزيا أيضا مشروعا تعليميا سموه باسم(جي قاف ( J-QAFيابو كرامة, ويقصدون بحرف(J) لغتهم الخاصة, وحرف (Q) يرمز للاهتمام بتعليم القرآن الكريم والحرف A) ) إلى الاهتمام باللغة العربية، وأخيرًا يرمز الحرف (F) إلى الاهتمام بالعلوم الإسلامية الواجب معرفتها، والبرنامج يبدأ من المفعوصين عيال الابتدائي ولمّا الجامعي. يابورزق أنت بحسّك وإلّا لا, تبغى نحن نقع مثل تركيا وماليزيا, شربت شي اليوم وراك؟ آه ياقهر قلبي يابو كرامة, عارف أني بلاحس ولكن بغيتك تشوف الحكومات من صدق. خل نحن في موضوعنا يابورزق المدارس الخاصة طلعوا رسومها ويظهر أنهم بيوصلوها للمية على الرأس الواحد. لا توجع قلبي يابو كرامة, إللي يشوف مدارسنا الخاصة ورسومها بيقول أنهم بجيبوا تكنولوجيا أوروبا وأمريكا كلها للمكلا. لو معاك ثلاثة رؤوس على الواحد حوالي ثمانيين ألف, ولما تسألهم يقولون لك نحن نعلمه الكمبيوتر والإنجليزي من أولى. ياسلام يعني بيطلعونه مثل (نيوتن). ونهاية العام الولد هوذاك كما عبود. وكل المدارس الأهلية ما فيه مدرسة واحدة تمتلك مبنى مؤهل يصلح كمدرسة فيها ساحات وممرات وتهوية وتشجير, كلها عمارات سكنية حولوها مدارس. وفصولها غرف نوم يحشرون فيها السقل كما الغنم. والمتابعة المستمرة للطالب ما تختلف كثير عن المدارس الحكومية يابو كرامة (ميمي كما ويوا). وبعضها العود شغال فيها طالع نازل, وحتى الغش أيضا. وكم وكم بنصيح يابو كرامة, وكله ذا كوم ومكتب التربية كوم ثاني. يابو رزق أنت تعرف الجماعة ممددين رجولهم على قدر فرشهم. مامعاهم شي. لهم فرشة تغيبهم, حتى التربية فيها محسوبية وحزبية وشفط ودورات بعضها وهمية وبعضها يشفطون ميزانيتها لا يبقى منها إلا الهبوب. وتحصّل في الدورة مخصص مالي للمدير ونائبه والمسؤول المالي وزعطان وفلتان, وكل بوهم يدخلون في الكشف ونهاية الدورة ظهروا كمالجن يبغون مخصصاتهم. والتلاعب بالتوظيف والتفريغ والتوزيع والورش شيء يقشب براسك. وكم بنشتكي يابورزق وعاد مدارس الحكومة كوم ثاني, حدث ولا حرج, والتعليم هو مفتاح كل شيء إن بغيت بتطور عليك بالتعليم. كلامك صح يابوكرامة ولكن مغني بجنب صقع, وكل بوها الشلة في المحافظة حرامية, التربية والنفط والضرائب والإسكان و..و… والمدارس الخاصة تقطع وتحش وتحلق فينا والتربية آخر من يعلم. المفروض يطلع واحد منهم في الإذاعة يفهموا الناس وليه الزيادة المفاجئة, وايش الإجراءات التي اتخذوها. كل قنوات النهب والشفط شغاله في حضرموت, إلا قناة تواصل المسؤولين مع الناس ليسمعوا منهم ويقفوا على حوائجهم. يابو كرامة معنا سلطة (كوز مركوز).
