وايش في الجونية يابورزق ولاوين سارح من غبشه؟ كيف اليوم ربوع يابو كرامة يوم الوقفة. وايش من وقفة يالمرزوق, وبعدين ويش فيها خلني أشوف؟ هه … وكن ذا إلا عصيان وين بغيت بها, شي هدّة معاك؟ اليوم عصيان يا بوكرامة, ونته وين عصيانك؟ ويش من عصيان يالمرزوق, انته فاهم عكس. كيه عكس يابو كرامة الناس كلها تقول اليوم عصيان, ونا جاهز ومستعد بعصياني وان شاء الله بترجع دولتنا رغم عن بوهم, وبذي العصيان يابو كرامة. قم جيب عصيانك وخل نحن نسرح يابو كرامة. يابورزق يابورزق العصيان ما هو عيدان وهدة وإرهاب وتخويف؟ العصيان يقصدون به إضراب عام للمجتمع كله طواعية تتسكَّر فيه المحلات والإدارات والمدارس وتتوقف حركة الناس, يعني جلس في دارك يابورزق. العصيان صورة من صور الاحتجاج السلمي ولما يكون بلاوعي -كماك يابو رزق- يصبح عيدان وحصيان. كيه نا حسبته هده وعصدة وكل واحد يجيب العصيان حقه, على شان نطرد المحتل. وايش من محتل بتطرده يابورزق, والحكومة ما هي دارية بعصيانك ولا عيدانك, ولا هو في بالها صاحب الخضرة والدكان والكشك سكّر وإلا فتح. نحن يابو كرامة مع القوم, والموت مع الجماعة رحمة, قالوا لنا عصيان قلنا عصيان, قالوا مسيرة قلنا مسيرة, قالوا عدن قلنا عدن, فوق عليه, نحن مع الرفاق يابو كرامة. يابورزق العصيان لابد يكون مؤثر على الدولة وعلى مصالحها الحيوية عشان تستجيب, ومدام دولتنا أهم حاجتين في حضرموت ماشية وما تضررت, توكم إن بتعصون وإلا بتوبون ماهي داريه بكم, ولاحد داري بسعادة في سوق البصل. وايش هي الحاجتين ذي يابو كرامة البترول والقات..!! البترول وعرفناه يابو كرامة ولا بنقدر عليه, بيقع موت عنده, ولكن القات وايش اللي يحنق الحكومة في القات. البترول يحنق الحكومة يالمرزوق, والقات يحنق صحابك؟؟ صحابي من؟؟ صحاب العصيان, وكيف بتجي قرحة العصيان إلا بعد تكييفه على كيف كيفك. ويش اللي يخليهم كما الشياطين في المطاريق بعيدانهم وحبالهم وياويلك لو ما قفلت وعصيت معنا. يالمرزوق القات عندنا مكون أساسي من أساسيات لجان أي فعالية أو لقاء أو مؤتمر, ما يكون التجهيز والإعداد إلا بعد تخزينه تصلب الرأس, ما شفت مؤتمر الحوار راحوا يخزنوا وخلوا المؤتمر مع نفسه, وبن عمر يصرقع بينهم. وبعدين يابو رزق القات في اليمن يعتبر في حكم الوزارة, وأهم حتى من مؤسسة رئاسة الوزراء, ولو يوم واحد وقفوه أو منعوه بتشوف القيامة يوم تقوم, وبتشوف المحافظ والأمن والمحلي وحتى صندوق القوش وكل العفاريت تتركّر وتطمّر. تصدق يابو كرامة أني أقول لنفسي ليه سياراتهم رايحه جايه محد يكلمها, وعيالنا وخوانا وأهلنا قلنا لهم سكروا وبالقوة وياويل بوكم لو فتحتم, وعفاريت القات شغلهم سابر وماشي عال العال. هذا هو العصيان يالمرزوق..!!! والله يابو كرامة كلامك صح, ومن صدق ذا عصيان لله مو طاعة ولا قربة, صدق اللي سماه عصيان, نعوذ بالله من العصيان ما ظهر منه وما بطن.
