على هذا السعد وهذا الهناء ساعتين بربع والا " قطع قلبي على ستة وسبع " من بيت خالتنا طفي لصي ولا هجعنا نحنا ولا جُهالنا ونشكر الله على حكومة قِصاف عُمرنا ونقول الحق محد معه حكومة مثلنا تعلمك كل الفنون بس الشريرة بالحال وعلى واقع الحال !! واحد يصافط الكيبلات بالخبطة والثاني يؤسس شركة لشراء الخبطات وكل العمل بسرعة وبالايميلات خلال يومين والا ثلاث لا كثر وبلحظات والله اكرمنا بحكومة يسهلوا لهم الحساب والمراد ياتيك بالحال وبالطيارة كمان .. وشعار حكومتنا " يتم البناء والمشتريات ومن ثم تستكمل الاجراءات " ونحنا مش اتعلمنا السرقة وخفة اليد وكحال العيون لحالنا لا كمان علمنا اللي جنبنا والبعيدين مننا , قدهم معهم قليل خبرة لكن نحنا زدناهم فوق شبرهم مترَ !! خلونا اتكلم على راحتي : ساعة نوم وساعه قبله قلقال من الحمى والحر ومراعين للكهرباء متى بتلصي ولما تلصي نحسب لها متى قدِه بتطفي وهذا حالنا كل يوم كذا واللي ما يصدقنا يجي يجرب حب حكومتنا لنا .. مرة يقولوا خلص الديزل ومرة قرح بشت الكيبل ومرة السامان اللي اشتروها طلعت هشتي وايش اكلمكم وايش اشكي ؟ قلنا مله يمكن لجنة المناقصات حكولًها المقاول والا حنجل للجنة الرقابة والتفتيش والا للجنة الاشراف على التنفيذ ؟؟ ايش اقول لكم والا ايش اشكي !! السلاح تشتريه ويخرج يجرب لك ياتوه بالطريق ولجت فوق جازع طريق يقولك كل شيء مكتوب اذا كان من ارض الجنوب اما اذا كان من طلع يا بْييي انا ولو تشوف كيف بيسيل السعبوب رزق من الله ساقه لأهل المتوفي ويبرروا لك انهم يتبعون السنة (( اعلموا اولادكم الرماية والسباحة وسباق الخيل )) . فعلا نحنا بالجنوب اتعلمنا السباحة وكل واحد لحاله يسبح ويطوس اما الرماية قده كل واحد بيسقع الثاني عين ويجيب خبرُه اما سباق الخيل عندنا فهموها من لطمك اعماك !! ويا ويل لرحت والشرطة والا شيخ الحارة ما تلومنَ الا نفسك حبيب من قللك ومن ودف بك ؟ اقولك باري بوتك احسن لك والا تستأهل اللي يجرى لك .. وشفتم كيف حالنا كيف وذه إلا قليل يا خلي ولولا إيماننا بقدر الله لكنا شتمنا ولعنا من ودف بنا وكردف , اسألتكم بالله لا تلومونا على هذه الخروعة والله من صدق ذي الحقيقة وإن كنت غلطان لومونا ,, ويا سلام يا حقنا يا سلام على سعدنا والهناء !!
