أيش اللي حاصل ياتعز والحال باحوالك عجز ومن زمن خيرك كُنّز سهمك من الدنيا العَرز تشقي وحلمك ما نجّز واذ ما ستراح قلبك يفزّ كلب المصالح بك عنز ** أيش اللي حاصل ياتعز أين ما أروح قلبي يروح كلما أرى صبحك جروح أين ما الشُقر باروت يفوح والقاهرة مغنى ينوح حمى البنادق بالسفوح دمك هدر.. وقلبك سموح ** أيش اللي حاصل ياتعز مو يشتي أحمد شوربان واصل يوزعلك جُنان رجَّعلك الطاهش هيوان ليلك طويل غُدرة المكان ويسرقك بالليل دان وأنت المراهن والرهان ** أيش اللي حاصل يا تعز أيش اللي حاصل بالقلوب ضاعوا عيالك بالحبوب وتقاسموا طهرك ذنوب وهدوك تجار الحروب ومشقايتيك لعن وسبوب لا تحسبي الخائن يتوب ** أيش اللي الحاصل ياتعز ابنك لأشواقك غريب كلما أبتعد منك قريب وأنت تربي وابن ذيب كل ما شبع يرجع يعيب و القهر لك منه نصيب ** أيش اللي حاصل ياتعز أبنك عُنيتر بالكلام شيموت عشان يرضي الامام تِولمي لجل النظام من ديمتك ولك العظام ما هوش يا تحفة حرام ؟ خمسين سنة , حاضر تمام ** أيش اللي حاصل يا تعز للشوربان سحنة جديد أحيان فقيه وأحيان عقيد يجي بوعد وإلا وعيد يشتيك على شرعه الفريد واللي معيك محد يريد! يتبلدحوا مثل العصيد ** أيش اللي حاصل يا تعز الشوربان يشتيك بلاد مفصلة بالانقياد فيبك عمامة للفساد والساكنين شغمة جراد وما قال سيدهم عُباد قرآن , وأعقلهم صياد ** ايش اللي حاصل ياتعز ما الشوربان قائد كبير أو شيخ معدوم الضمير يسير معه شلة حمير كلما عطس قالوا النفير الشيخ خور كرسي أمير ولو ما سبر مقعد وزير ** أيش اللي حاصل يا تعز لا أمن فيبك لا أمان والقول ما قال شوربان ان تذبحواعومة دخان وتفرقه وقت الاذان لكن ولا يرطن لسان والشيخ شيوسم بالحجان