حال أدائه اليمين القانونية ..أمام (الرئيس هادي).. جانا الدكتور عبدالعزيز المفلحي.. محافظ عدن الجديد .. على أول طيارة من الرياض ساني لا عدن.. والناس في عدن فرحوا واستبشروا خيرا.. لكن(يا فرحه ما تمت). . المحافظ المفلحي جلس يوم واحد في عدن وبس.. شارك فيه في افتتاح (مجمع الدفاع في مدينة الشعب).. مع نايب رئيس الوزراء، وزير الداخلية اللواء حسين عرب .. وعقد (مؤتمر صحفي)- والله ما لأبونا درا وين عقد ومنوه حضره- بس شفنا خونا المفلحي في (التلفزيون) وهو يقول: با نرجّع لعدن حضارتها ومدنيتها وتاريخها .. وهات من هذا (الكلام المعّسل).. اللي يسلي على القلب والخاطر وكثير من قبله من المحافظين.. قالوا نفس الكلام- وبعضهم زايد قليل حوايج- وبعدها والله لا نعلم ولا ندري وين هب .. ووين ضاع خونا المحافظ المفلحي .. الأ في اليوم الثاني.. عرفنا إنه هب إلى (الرياض) .. يا أنه (بر) ببابور وإلا (بطياره).. المهم قالوا هب الرياض .. قلنا هب.. ومن هاذوك اليوم إلى ساعتك والآن .. والمحافظ المفلحي ولا رجع إلى عدن.. ولا منه خبر ولا مخبر.. وكل واحد يجيب له(خبابير من حني ومن طني).. وهات يا تفسيرات وتأويلات وتحليلات .. واحد يقول : لنسان خلاص ماشي عاد يبأ (محافظ) .. وواحد يقول( هددوه) .. وآخرين يقولوا: هب يجيب السامان والعفش حقه ويرتب أمور أسرته .. والبعض يقول : ماشي معاه (سكن) في عدن.. بعدما حولوا( سكن المحافظ) اللي في جولدمور بالتواهي.. إلى (مقر للمجلس الانتقالي الجنوبي) .. وركزوا على واجهته (برت كبير) مكتوب عليه (أسم المجلس) وصورة (الزبيدي) رئيس المجلس.. وهات من هذه التفسيرات ولا ندري ولا نعلم .. منوه على(صح ) ومنوه على (غلط) .. نحنا اللي يهمنا ليه(المحافظ المفلحي) ما يجي من الرياض إلى عدن ليقوم بعمله.. بعدما قبل بالمسؤولية.. بعدين يهب يرقد في(الرياض) وإلا في (كلكتا)- و يا نعمة الله دومي- وماشي يهم يخلي الأمور (فالتوه) في عدن.. المسؤولية يا خواني.. تبا همه وتضحيه وتحدي الصعاب والحجار والشوك.. ماشي تبا أفعلوا حساب لهذا وحساب لهاذوك..عدن كانت (عاصمة المستعمر البريطاني) على مدى (ميه وتسعه وعشرين سنه) ودرة الشرق العربي ولؤلؤة الخليج والجزيره .. وكانت ( عاصمة دولة الجنوب ) من يوم الاستقلال من (سبعة وستين ميلادية)إلى (عشرين مايو ) سنة (تسعين ميلادية) – يوم إعلان ( وحدة العصيد و السحاوق) بين الجنوب والشمال.. و ذلحين (العاصمة المؤقتة ) للدولة والحكومة الشرعية.. بعد خروج (الرئيس هدي) من صنعاء إلى عدن.. طيب شوه عاد باقي .. هذا الكلام خلاص عرفناه..؟ عاد باقي يا عيوني و يا قلبي.. إلا أن نقول.. محد يلعب بشعب .. الشعب فوش ما قد تنكد وتعذب وتعب وجاع وذاق المر والحدج.. من يوم الاستقلال إلى هذي الساعه.. وأهل عدن ومعاهم كل( أهل الجنوب) من هم لاهم.. ومن هومه لا هومه.. أسألكم بالله يا شرعية و يا(رئيس هادي) و يا سعودية .. و يا تحالف لا تدخّلوا عدن والجنوب عامة في (لعبة السياسة) خلاص قدها قلوبهم مجروحة.. هذا عيب ونقص.. واللي يدور في (اليمن) معروفة قصته.. واللاعبين في الشمال وفي الجنوب كلهم معروفين.. ومعروف منوه اللي يقرع الطبل ومنوه اللي ينفخ المزمار.. ومنوه اللي يرقص و يشترح .. ومنوه اللي يوزع (البيس) ..؟ استحوا بالله على عماركم قليل.. أرحموا هذا الشعب المسكين المظلوم.. وقل لكم.. أن عدن والجنوب يبوا عقول كبيره ويبوا دواهي يديروها.. وقيادات قويه وصاحبة قرار.. وقبل هذا وذاك ان ترضى – بالذات- (ختنا الكبرى) السعودية و معاها دول الخليج العربي وبريطانيا وروسيا وأمريكا بأنفكاك (الجنوب) عن (الشمال).. و يا دار ما دخلش شر .. لأن القضية ماشي قضية محافظ راح ومحافظ (جا)..ولا قضية (مجلس انتقالي ).. و لا قضية (إقليمين) ولا (أقاليم) ومناطق محررة .. القضية كبيرة.. وكبيرة فوق ما يتصورها عقل ولا(يتحملها ملف) على قولت الشاعر المحضار .. والمثل حقنا يقول : (ولا زبيبة إلا وفي مؤخرتها عودي).. وكثير من أهل عدن أتصلوا بي وقالوا ( يا بن دهيس تخبر لنا عن المحافظ المفلحي وين ضاع علينا..؟) قلت لهم .. طيب.. مكانه بيجي .. وإلا البلاد ملانه محافظين من حقون (أبو يومين)..!
