قولوا .. ((اعوذ بالله من الشيطان الرجيم)) وزيدوا بالقول .. ((ما شاء الله تبارك الله )) وعادكم زيدوا .. ((بالصلاة على النبي)) ... عاد الا خرجنا بسلامة الله وحفظه من (( حمى الضنك)) ومن (( حمى جنون البقر والغنم والحمير)) .. ومن .. (( حمى الوادي المتصدع)) ومن .. (( الملاريا والتيفود)) .. ومن (( السعال الديكي والدجاجي )) .. ومن (( سعار الكلاب )) – اصل البلاد ملانة ((كلاب )) – ودخلنا بعدها دخلة لا بعدها دخلة .. في مرض (( الكوليرا)) .. وعندنا في لحج يسمّوا (( الكوليرا)) باللهجة الشعبية .. ((كريرة )) .. وهذي ((الكريرة)) وباء فيروسي معدي .. واذا ما يلاقي علاج في وقته يصبح (( قاتل )) .. سببه الاكل والمكشوف وغياب النظافة – على ما تقولوا – إنتشار ((الكداديف والبلاليع والمجاري والذباب )) .. واذا اصطاب واحد من الاسرة .. اصطاب اهل البيت كلهم .. نسوان مع رجال مع شيوبة مع جهال ، لقلة المناعة ، واذا تأخرت عليهم ((جرعة الوقاية )) المعروفة في المستشفيات و ((الكريرة)) هذي الايام منتشرة في الريف والحضر .. في عدن )) ولحج وابين وشبوة وحضرموت وفي (( مناطق الشمال)) وايضا - بس ذلحين خلونا في عدن .. واللي (( الكريرة)) فيها منتشرة هذي الايام .. وهنوك (( حالات موت)) واصابات مسجلة في المستشفيات – خاصة وعامة - يعني حكومية – والتكتور عبدالناصر الوالي ، مدير مكتب الصحة والسكان بعدن تكلم عن هذي الحالات بالأرقام في ((المؤتمر الصحفي)) .. اللي عقد في مبنى محافظة عدن عصر الاحد اللي جزع .. ووضح الجهود اللي تبذل لمكافحة هذا الوباء ومحاصرته ، ولانه الشيء بالشي يذكر .. فقد تلقيت اتصالات ورسائل كثيرة من مواطنين من عدن – ومن خارجها- يشكو فيها حالهم وبؤسهم ونكدهم وشكعهم من انتشار ((الكريرة)) .. وفجعهم الشديد من هذا الوباء القاتل والخطير .. اللي يدوّخ بكم من راس .. وبكم من معصور شنب ، وقالوا .. (( يا لحجي نسألك بالله .. اكتب لنا باللحجي عن الكريرة .. وقل للرئيس هادي وللحكومة الشرعية ولصحاب الصحة .. إن الناس مراض ومصابين بالكريرة .. الحقوهم .. انقدوهم .. عالجوهم .. افعلوا لهم حل ... خلاص يكفيهم اللي فيهم ، ماشي عاد يقع تعب فوق التعب .. هذا ذنوب وحرام .. لا يرضي الله ولا رسوله ، قدهم بلا مشاهرة ... ويعيشوا على الكفاف والجفاف ، وعاده زايد فوقه مرض الكريرة)).. خلاص رسالة المواطنين وصلت ومفهومة – معناته – تحولوّا الناس الى (( مكركرين كركار)) يعني يا معنى .. حياتهم كلها اصبحت .. ((كريرة)) .. تهب الدكان يقلوّلك .. صاحب الدكان مريض عنده ((كريرة)) .. تهب البريد – لعنة الله عليه – تبا (( المشاهرة )) يقلوّلك .. البيس حقت ((البنك المركزي)) اللي في عدن .. مريضة فيها ((كريرة)) .. تهب المدرسة تلاقيهم مقفلين لبواب من داخل فجاعى من ((الكريرة)) تطلع ((الباس)) حق الاجرة .. تجلس مجمشّ نخرتك وحلقك بالكشيدة .. فجعان من اللي جالس جنبك لا يكون فيه(( كريرة)) .. حتى جيرانك لمّا تقلّ لهم .. ليه ماشي تجوّا عندنا تزاورونا ..؟ يردوا عليك .. (( في بيتكم كريرة)) .. يبان الشعب كله اصبح (( مكركر)) والبلاد كلها ((مكركرة)) .. وبا نخرج من ((الكريرة)) والله يعلم شوه من مرض ثاني بندخل..؟ اه .. ايوة.. .. ايوة .. نسيت باقي مرض (( الصنج والعجم)) .. وماشي بعيد يجي يوم ونرجع كلنا .. ((شعب اصنج اعجم)) – بنكون حاجة فكاهة – بنتكلم علينا كل القنوات الفضائية ... نهرج بالاشارات ، شوه كلت اليوم؟؟ أ..أ..أ.. ((توتي واوووول)) – معناته ((روتي وفول)) .. ومنوه رئيس بلادك ..؟ أ..أ..أ((أبدووو..ربوّوووه)) على ذكر فيلم عادل امام المشهور .. ((عبدربوه يا راجل )) – ايوة تمام افصح الله لسانك.. الان فهمت اصل انا اهبل .. انته تبا تقول .. ((عبدربه)) رئيسنا الشرعي- بس قلوّله – يا ((ابدووو.. ربوّووووه)) شعبك مصاب بالكريرة ، زايد انه اصبح .. ((اصنج واعجم)) من شدة الجوع والتعب والطفر .. لا حول ولا قوة الا بالله ..شعب بحاله (( اصنج اعجم)) .. لا وين نحنا سارحين ، يبان لا الداهوفة . تبوا مني خبر امانة ديانة .. على الحكومة الشرعية ان تعمل في الميدان ، وان تعيش بين الناس .. وان تعرف ان المسؤولية امانة عظيمة ، وليست ((شور وقول)).. ولا لعب عويلة .. هذي مسؤولية على شعب .. فهمتوا .. والا عادكم ..؟ والله يبان انكم ما فهمتوا .. ولا بتفهموا .. لأن ((الكريرة)) تزيد.. والمشاهرة عند جدتي .. والعلاج في المستشفيات الحكومية اصبح ببيس كما المستشفيات الخاصة .. عيني عينك .. ادفع والا ريت ابوك لا دفعت .. ان شاء الله تموت .. محد مسؤول عن حياتك ، هذا هوه حال مستشفياتنا وحال الصحة حقتنا .. وعادكم تخبرّوا وزير الصحة والعافية .. ويا ساعية جري السنبوق..!