أعطيكم لمحة فقط من المفارقات العجيبة في عقليات بعض الناس أصحاب العقول التريلي... تبدأ الحكاية الساعة ثمان الصبح بعدما أكون قد أشتغلت طول الليل في مكتبي ونمت الساعة ست الصباح.. �� يدق جرس البيت بقوة ولا عاد يفكله، أقوم وقد حالة أمي حالة من قلة النوم، أرد على الجرس يرد عليا واحد معك فلان أشتيك ضروري وهو مكان هاسس على الجرس، تقوله طيب فك الجرس مالك أيش أتجننت..!! وذيك الساعة قده أم الصبيان فوق رأسي وأتخيل نفسي متى أوصل لا عند الباب وأرشخه ببيب هذا اللي حرمنا من منامي...
بلال: أفتح الباب.. خير اللهم أجعله خير أيش في يأخي مالك تدق الجرس كذه أيش تشتي تحرق حريمه..؟
الشيبة اللوك: مالك يا بلال كذه تتقارح فوقي، أنا أجيت إلا أسألك على حاجة مهمة بس..
بلال: مليه يأخي وأنت كمان جبت لعاري البغايت في حد يجي بيوت الناس من صبح ربي ويدقدق الجرس بذي الطريقة لما خليتنا أفتز من فوق القعادة من الرجفة خير أيش حصل يعني الدنيا طارت، في عصر في مغارب واحد يروح بالراحة لا بيوت الناس مش كذه..
الشيبة اللوك: مليه أنا في حاجة مهمة اجيتلك عشانه وألا ماباجيش..
بلال: مليه الحاجة المهمة ذي تقدر تراعي لما الواحد يقوم زي الناس لا العصر والا المغرب مش تباغثوا الناس كذه من صبح ربي وعاد الأوادم ما صحت.. خير أيش هذي الحاجة المهمة اللي خلنك تجي بده الوقت..؟
الشيبة اللوك: يأخي أسمع أنا أشتي أسافر بريطانيا.. لكن هااا شوف مش أشتي أروح زيارة وأرجع، أشتي أكون (ريسيدنت) هناك.. ��
بلال: قد رأسي مصدع من دقة الجرس والقومة من صبح الله وماسك أعصابي، وغلق الباقي لما قال لي على موضوع روحته لبريطانيا.. كنت والله أشتي أبز أطرف شيء جنبي وأصمخه فيبه.. بس قدنا أستحملت الغتاته حقه مدري كيف وخرجت لا برع الشارع وكلي مشعتل وأتفرج لافوق العمارة حقي..
الشيبة اللوك: هااا خير أيش في يا بلال مالك تتفرج لا فوق.. ؟
بلال: لا ولاشيء بس أتفرج إذا البنديره حق بريطانيا ترفرف فوق السقف حق عمارتي ولعد بالغلطة يكونوا أخواني أجروا العمارة للسفارة البريطانية وقدهم يصرفوا الفيز من عندنا..!!
الشيبة اللوك: مالك يا بلال تتلاكع عليا يأخي..
بلال: مليه وأنت كمان يا عاقل من صدقك تجيلي بده الوقت علشان تسألنا سؤال زي ذه عاد الله بيراجعك ليش شفتنا القنصل البريطاني أوزع فيز، وعادك كمان تتخور ما تشتيش زيارة وتشتي تكون ساني مقيم.. ؟ مالك يا حاج..
الشيبة اللوك: لا أنا قصدي أسألك إذا أقدر أروح وأكون ريسيدنت هناك.. وبعدين ذه من حقنا لأنه نحنا عيال المستعمرة ومعانا الجوازات حق (البريتيش كولوني)..
بلال: ألا يا الله خراجك من ذه الشيبة اللوك قبلما ينفجر رأسي بسببه.. يا عاقل أيش من جواز المستعمرة أيش من كولوني جني شلكم أنتو وهم بيوم واحد، بالله يا حاج شوفنا بلا نوم ومدوخ وحالة أمي حالة خلينا أروح أغلق نومي خليك المصابحة أنا افدالك.. وبعد ساعات عجاف دخلت أرقد وقدنا هلكان وقلبي واقش من اللوك اللي مندري من وذفبه لا عندي، وغلق باقيته صلاح قفوع وأمين عيسى قدهم بالمقيل وطيروا لحريمي الساعة القيلولة اللي كنت بعوض فيبه نومة الصباح.. يا مخارج خارجنا بس...
