كثيراً ما نمشي في طريقنا ونسمع الكثير من الألفاظ والعبارات التي لا تعنينا في شيء وأحياناً تُسيء إلينا في أشياء كثيرة ، ومن هذه العبارات " هيا معانا يا مليح" ولا ندري إلى أين المقصد .. وطبعاً عرفتم أصحاب هذه المقولة ...هم مشهورين جداً ونلاقيهم باليوم آلاف المرات "هم أصحاب الحوافل".. تخيل نفسك تكون ماشي في الخط الثاني ويقولك صاحب الحافلة هيا معانا " أنت في خط وصاحب الدباب خطه ثاني"... وطبعا كلمة يا مليح لحقة لو كانت الماشي بنت ومش أي بنت إلا بنت مليح من حق هذه الأيام عادها لو لابسة بالطو (يسكع ينكع) وبالألوان والفتحات ولا تقول إلا شماسي " يا الله هذه الأيام صيف " ما علينا خلو الخلق للخالق "شعب فضولي" والانكأ من هذا كله لما يكون الدباب ملان وصاحب الدباب يصيح و يشارع و يعازم ... هيا .. هيا .. والركاب يتصايحوا من جهة .. وين باتطرحهم يا أخي الدور الثاني؟؟!! ويجاوبهم بفم نصه اخضر ونصه اصفر والدخان فوق رأسه كأنه طاير بين السحاب " قات وسيجارة" اتفاسحوا النفس بالقلوب .. حرام عليكم تسخوا تخلوها تمشي بين الشمس .. ويناديها أمانتك " تعالي مكاني وانا بانزل" ويرفع صوت المسجلة" ويصيح هيا ببلاش ".. والعجوز تؤشر له لما تعبت وتصيح وما عاد فيش صوت وقّف يا ابني أراعي " انتظر" ولا كأنه شافها تقول عادها "صغيرة" تمام خليها تمشي لا تألف الكسل .. ما فيش رحمة ولا أخلاق إلا من رحم ربي .. ويتكرر المشهد مرات ومرات .. وكله كوم ولما يمشي وراءك الدباب كوم ثاني وما تدري من اللي يوصّل الثاني صاحب الدباب يوصل الركاب وإلا الماشي هو يوصل صاحب الدباب ..!! دنيا غريبة والله.. صح وإلا أنا غلطانة...؟؟ وأحيانا وما أكثرها من أحايين نؤشر للدباب وهو فاضي ونلاحقه ملاحقة ولا يوقف ولا يعبّرنا حتى بنظرة ونصيّح عليه طيب شل العشرين وامشي .. بس لو أنت بنت حالية والعطر يا سلااااااااام والفتحات حق البالطو من كل ناحية مثل الميازيب وإلا مثل الشماسي باتعمل زحمة مرور وإضراب له أول ما لش آخر .. و با يعملوا المستحيل علشان تطلع ويقللوا مساحة "الذباب من كثر نظافة الدباب" ويوسعوا النوافذ علشان يخرج دخان السيجارة ودخان الركاب" اعذروني" هذه هي الحقيقة ما فيش نظافة وما فيش ماء ونحن نتعامس علشان الماء غالي ومعدوم وكأنه مغترب.. والذي أشتي اعرفه "أيش با يستفيدوا من إزعاج الركاب والمواطنين ؟؟ ( طبعا أصحاب الدباب والمسئولين ) تدروا لو نعرف من هو المسؤول عن كل هذه الفوضى ومن هو الذي يخبئ الماء .. تحسبوا بانسكت والله ما كانت ولا صارت ... باشل نفسي أنا الأول والهربات زيادة لو كان هذا المسؤول خارج نطاق التغطية .. أفتهملكم .. الله يرحم والديكم لا تخلوناش نتهور .. خاطركم .. وبدون هيا معانا يا مليح
